YEREMIA 30
30
Jani' Tuhan Kuan Inul Yakub
1Tuhan Allah lun Israil, 2nepebala ni Yeremia “Do' ngayud bang aceh surat amung-amung luk bilaKu namu. 3Ngaceku tarekneh malé macing kareb Ui miak muit pupuKu, lun Israil idi lun Yahuda. Ui miak nguit nedeh lemubed inan tana' luk biréKu kuan tepundeh. Idi ideh miak ngalap tana' ineh ku babpatdeh. Ui ini Tuhan pangeh nepebala.”
4Kebala Tuhan kuan lun Israil idi lun Yahuda:
5“Ui ninger lemulun ngarod,
ngaceku megagap idi matot,
ngaceku na awang niatdeh.
6Do' muyuh ngitun idi ngerawé!
Miakké seburur deléi nenganak?
Ngudehké Ui nier anid-anid burur deléi ngakem batekdeh,
mepad kudeng decur luk mét nenganak?
Ngudehké amungdeh mebudi kiung?
7Aceh kareb luk pelaba dereh miak macing;
luk meluun dat ratnan amung kareb luk baken —
amung inul Yakub miak mesusa' niat;
iamo' ideh miak mulun.”
8Kebala Tuhan luk Melalud, “Kareb aco ineh macing Ui miak mutul paga' luk luun dierdeh idi neka kalingdeh, pad ideh na mangun ku demulun pupu baken teh. 9Iamo' ideh miak mangun ku demulunKu, ieh ineh Tuhan Allahdeh, idi Daud, luk barénKu nedeh mangun ku raca'deh.
10 #
Yer 46.27–28
“O pupuKu, aleg muyuh matot.
O muyuh lun Israil, aleg muyuh merapang.
Ui muit nemuyuh ratnan bawang luk mado,
ratnan tana' Babil luk inan muyuh tiban.
Muyuh miak muli' dengan mawang niat,
pad muyuh do' udeng, idi seburur pana' nateh luk miak ngatot nemuyuh.
11Ui ngedengan nemuyuh idi ngulun nemuyuh.
Ui miak ngusag amung-amung bawang,
luk inanKu nengatad nemuyuh,
iamo' na Ui ngaté nemuyuh.
Ui na muit nemuyuh ratnan amung ukum;
iamo' Ui miak méi' nemuyuh.
Ui ini Tuhan pangeh nepebala.”
12Kebala Tuhan kuan pupuNeh,
“Et muyuh pelaba bura'
idi urat muyuh na miak mepali'.
13Seburur pana' nateh luk miak ngasa' nemuyuh
idi kimuh muyuh na miak mepali'.
Na tu-tu iko miak uen ngedo'.
14Amung rurum muyuh nekelupan nemuyuh,
idi na ideh méi' nemuyuh.
Ui nenecat nemuyuh mepad kudeng bunu',
idi ukum muyuh pelaba berat,
ngaceku sala' muyuh luk mula',
idi dat muyuh luk rayeh.
15Aleg muyuh medureng ratnan urat muyuh,
ngaceku ét muyuh na miak uen ngedo'.
Ui nengukum nemuyuh kudeng ini,
ngaceku sala' muyuh luk mula',
idi dat muyuh luk rayeh.
16Amung lemulun luk ngedereh nemuyuh miak uen ngedereh,
idi amung bunu' muyuh miak tebanen.
Amung lemulun luk ngesusa' nemuyuh miak uen ngesusa',
idi bawang amung lemulun luk ngaro bawang muyuh,
miak uen ngaro teh.
17Ui miak maré nemuyuh do' ulun,
idi ngedo' urat muyuh,
sagan tu pana' bunu' muyuh pebala,
‘Sion pangeh tila';
seburur pana' nateh luk méi' neneh!’
Ui ini Tuhan pangeh nepebala.”
18Kebala Tuhan,
“Ui miak nguit pupuKu lemubed amé' inan tana'deh,
idi Ui méi' inan anid-anid tetek ruma'deh.
Anid bawang miak piduten baruh
idi anid ruma' pana'.
19Lemulun luk tudo déi' miak menani idi ngubur Tuhan.
Ideh miak ngitang ku awang niatdeh.
Ui miak maré nedeh amé'-amé' mula',
idi ngedita' nedeh.
20Idi amung anakdeh mepad kudeng luk atun,
idi bawangdeh miak uen ngeletep pa kiungKu.
Ui miak ngukum amung pupu luk ngedereh nedeh.
21-22Penguludeh idi raca'deh
miak tumui rat arang pupudeh sebuleng.
Kareb Ui nawar neneh, ieh miak amé' muneng Negku.
Seburur pana' nateh luk mekuu' amé'
kudeng ieh na tinawar.
Ideh miak mangun ku pupuKu
idi Ui miak mangun ku Allahdeh.
Ui ini Tuhan pangeh nepebala.”
23-24UsehNeh mepad kudeng barui, idi kudeng libuleh luk macing luun uluh lemulun luk dat. Ieh na miak ugka' pad Ieh nganau' amung-amung luk pian ruenNeh. Muci aco pupuNeh miak kali' ilungneh dengan megala'.
Currently Selected:
YEREMIA 30: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
