YEREMIA 24
24
Dueh Tayen Mepanu' Ku Bua' Gita'
1 #
2 Rac 24.12–16; 2 In 36.10 Tuhan nemada' sirenku, dueh tayen mepanu' ku bua' gita' luk rireng pa atun Ruma' Allah. Ieh ineh muci ratnan Nebukadnesar raca' Babil nenaban tuda'-tuda' burur lemulun rat Yerusalim amé' Babil, ieh ineh Yoyakin Yoyakim, raca' Yahuda, dengan amung lun rayeh Yahuda idi amung-amung lun luk mileh ngakem. 2Tayen luk pun-pun mepanu' ku bua' gita' luk do', luk saget melak, iamo' tayen luk baken mepanu' ku bua' gita' luk pelaba dat, luk na miak kenen. 3Idi kebala Tuhan negku, “O Yeremia, anunké luk sirenmu?”
Idi ui nengor balaNeh, kebalaku, “Bua' gita'. Luk do', ieh ineh pelaba do', idi luk dat, ieh ineh pelaba dat, pad ieh na miak kenen.”
4Idi kebala Tuhan negku, 5“Ui ini luk Tuhan Allah lun Israil ngerawé idi pupu luk tiban iné' Babil mepad kudeng bua' gita' luk do' ini, idi Ui miak méi' nedeh. 6Ui miak matar nedeh idi nguit nedeh lemubed amé' bang bawang ini. Ui miak ngeperuan nedeh, idi na miak ngukum nedeh; Ui miak nibu nedeh, idi na miak mubput nedeh. 7Ui miak ngegio niatdeh, pad ideh pian ngiti Negku. Ideh mangun ku pupuKu, idi Ui mangun ku Allahdeh, ngaceku ideh miak lumi Negku dengan amung niatdeh. 8“Idi Ui ini Tuhan miak nganau' kuan Sedekia, raca' Yahuda, idi kuan amung penguluneh, idi kuan lun Yerusalim luk ketecan bang bawang ini, idi luk iné' Masir pana', mepad kudeng luk ruenKu kuan bua' gita' luk dat ini, idi luk na miak kenen. 9Ui miak ngacing ukum luk dat kuandeh, pad amung pupu bang tana' ini miak matot. Lemulun miak situnga nedeh, meriruh nedeh, idi ngedat nedeh, idi ngadandeh tetanendeh ku kediman bang amung bawang luk inanKu nengatad nedeh. 10Ui miak ngacing bunu', lau, idi ét kuandeh pad seburur pana' rat arangdeh nateh luk ketecan bang bawang luk biréKu nedeh idi inan tepundeh.”
Currently Selected:
YEREMIA 24: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
