YEREMIA 14
14
Rikan Luk Mio
1Kebala Tuhan ni Yeremia ratnan rikan,
2“Yahuda nacung,
idi amung-amung bawangneh medereh,
idi lun Yahuda telubid luun tana' ngaceku dat niat
idi Yerusalim ngitang mutuh pedengan.
3Lun do' ngecuk demulundeh ngalap abpa';
ideh amé' inan subuk, iamo' na abpa'.
Idi ideh muli' dengan sidangur luk na uang.
Ideh ngebpu uluhdeh
ngaceku migu' idi dat niat.
4Lun luk amé' lati' pelaba susa' niat
idi ngebpu uluhdeh,
ngaceku na udan idi tana' tekering.
5Déi' luun amug payo tineh necan anakneh luk isuut,
ngaceku na uduh.
6Idi keladai luk meliput tuped luun surud,
idi nginiat mepad kudeng galau.
Meseraber sirendeh ngaceku na akandeh.
7PupuKu nawar Negku, kebaladeh,
‘Sagan pana' sala' kai ngesala' nekai,
O Tuhan ngedengan nekai, maya' kudeng luk pijani'Mu.
Kai megéi' teketed rat Namu
idi megéi' nganau' sala' pa kiungMu.
8Iko sebuleng mo' luk miak inan lun Israil merapet,
Iko mo' luk ngulun nekai kareb kai inan susa'.
Ngudeh Iko mepad kudeng sakai bang bawang kai,
luk amé' rudap sealem mo'?
9Ngudeh Iko mepad kudeng lemulun luk megagap,
idi lun pebunu' luk na miak ngedengan?
O Tuhan kali' rungen Iko idi dengan kai!
Kai lun pupuMu;
aleg Iko necan nekai.’ ”
10Kebala Tuhan ratnan pupu ini, “Ideh pian buro rat Negku kudeng ini, idi ideh na miak ngimet bururdeh. Ngaceku ineh Ui na mawang niat nedeh. Ui miak ngerawé kekamendeh luk dat idi ngukum nedeh ngaceku sala'deh.”
11Kebala Tuhan negku, “Aleg mutuh Negku ngedengan pupu ini. 12Sagan pana' ideh mawa' na kuman idi na Ui sikal ninger putuhdeh. Idi sagan tu pana' ideh maré baré luk sabpen idi baré luk kenen, Ui na mawang niat nedeh. Iamo' Ui miak ngaté nedeh bang bunu', dengan lau idi ét.”
13Kebalaku, “O Tuhan Allah, Iko kali' amung nabi mada' pupu ini, kebaladeh, ‘Na luk idi bunu' idi lau bang bawang tau ngaceku Tuhan pangeh pejani' na inan susa'.’ ”
14Iamo' kebala Tuhan, “Amung nabi ineh mebalih dengan ngadanKu. Na Ui nengecuk nedeh, na Ui nepebala nedeh. Amung luk badéndeh nemuyuh ratnan luk sinierdeh baken rat Negku, idi bada'deh luk tirawédeh sebuleng na ulekneh. 15Ui ini Tuhan mada' nemuyuh ratnan luk miak ruenKu kuan nabi ineh luk na icukKu, iamo' luk mada' dengan ngadanKu, kebaladeh, ‘Bunu' idi lau na miak macing bang bawang ini:’ Ui miak ngaté nedeh bang bunu' idi dengan lau. 16Lemulun luk inandeh nepebala kudeng ini miak pitayen bang bunu' idi dengan lau. Butungdeh miak talan luun amung dalan Yerusalim, ngaceku na lun luk miak nanem nedeh. Amung ini miak mangun kuandeh, do' awandeh, idi anakdeh luk deléi idi decur teh. Ui miak maré tabpar sala'deh.”
17Kebala Tuhan, “O Yeremia, mada' pupu ini ratnan susa'mu, kebalamu,
‘Nima' abpa' matehku mebpeh tebaco kedangan,
meluun do' ui na ugka' nangi',
ngaceku pelaba bura' urat pupuku.
18Kareb ui nalan luun raked,
ui nier butung lemulun luk pinaté bang bunu';
idi kareb ui amé' bang bawang rayeh
ui nier lemulun luk maté ku lau.
Lun nabi idi imam ngakem,
iamo' na ideh kali' luk ruendeh.’ ”
Pupu Israil Sembayang Mutuh Ratnan Tuhan
19O Tuhan, matuké Iko nala' Yahuda,
idi megateh inan lun Sion?
Ngudeh Iko ngurat nekai,
pad kai na miak uen ngedo'?
Kai pian pedo', iamo' na luk do'.
Kai merapet miak uen ngedo',
iamo' luk katot macing nekai.
20O Tuhan, kai ngamo sala' kai,
idi sala' tepun kai pana',
ngaceku kai nenganau' sala' pa kiungMu.
21Ngerawé jani'Mu, idi aleg nala' nekai,
aleg ngacing igu' kuan Yerusalim
su luk inan kerusi rayehMu.
Aleg ngelaba jani' luk inau'Mu kuan kai.
22Sebuleng pana' rat arang akang pupu baken
na miak maré udan rat bang langit.
O Tuhan Allah kai, kai merapet Namu,
ngaceku Iko mo' luk miak nganau' luk kudeng ineh.
Currently Selected:
YEREMIA 14: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
