YEREMIA 15
15
Ukum Kuan Pupu Yahuda
1 #
Pur 32.11–14; Iap 14.13–19; 1 Sem 7.5–9 Kebala Tuhan negku, “O Yeremia, sagan pana' Musa idi Semuil tuped ieni, idi mutuh rat Negku, idi Ui na miak méi' kuan pupu ini. Ngecuk nedeh buro rat pa kiungKu. 2#Lin 13.10 Kareb ideh ngitun namu, kebaladeh, ‘Amé' iapehké kai?’ Do' mada' nedeh ratnan luk bilaKu.
Sebuangdeh maté ku ét —
ieh ineh kekipeddeh!
Lun baken maté bang bunu' —
ieh ineh kekipeddeh!
Sebuangdeh maté ku lau —
ieh ineh kekipeddeh!
Lun baken miak tebanen —
ieh ineh kekipeddeh!
3Ui ini Tuhan pangeh nemaré apat ukum luk dat kuandeh; ideh miak pitayen; butungdeh miak tebanen uko'; idi suit pana' miak kuman butung ineh; idi pung luk meliput miak kuman luk ketecan. 4#2 Rac 21.1–16; 2 In 33.1–9 Ui miak nganau' amung pupu bang tana' ini megagap ngerawé nedeh, ngaceku luk inau' Manasé, ngaceku anak Raca' Hesekia, déi' Yerusalim kareb ieh raca' lun Yahuda.”
5Kebala Tuhan,
“O Lun Yerusalim, idéké miak méi' nemuyuh,
Idéké luk miak temido nemuyuh?
Idéké luk miak ucu'
idi ngitun ratnan muyuh?
6Muyuh pangeh nenala' Negku,
idi pangeh neteketed rat Negku.
Ui ini Tuhan pangeh nepebala.
Ui nenatang ticu'Ku idi nengaté nemuyuh,
ngaceku Ui na tuman ku usehKu.
7Bang anid-anid bawang Yahuda
Ui nemalid nemuyuh mepad kudeng lipang padé.
Ui nengaté pupuKu,
idi teh Ui nengaté anak muyuh,
ngaceku muyuh na ugka' nganau' luk dat.
8Ui nenganau' decur muyuh mangun ku tinula'.
mepad kinula' bada déi' tangeb abpa' rayeh.
Ui nengaté anak adi' deléi muyuh kareb ideh metaga,
pad tinandeh medereh.
Idi denak-denak Ui nenecat nedeh
pad ideh medereh idi matot.
9Decur luk inan tudu' anak deléi nelepu
idi ingeb-ingeb.
Acangneh nisu' ku dacem;
ieh pangeh inigu' idi mesusa' niat.
Ui miak nima' bunu' muyuh ngaté nemuyuh luk ketecan.
Ui ini Tuhan pangeh nepebala.”
Yeremia Medureng Pa Kiung Tuhan
10Kebala Yeremia, “Ui pelaba dereh! Ngudeh tinanku nenganak negku? Na miak na ui pekedaluh idi pesaad inan lemulun bang bawang ini. Na ui ngabit idi maré usin kebiten, iamo' amung lemulun ngediman negku. 11O Tuhan, kudeng na ui demulunMu luk do', idi kudeng na ui nesembayang kuan bunu'ku kareb ideh medereh idi mesusa' niat, nima' amungdeh ngacing kedimandeh kuanku. 12Idi seburur pana' nateh luk miak mutul belawan, meluun teh belawan luk rat pa tinueh busat aco luk pinuar ku tekaling.”
13Kebala Tuhan negku, “Ui miak ngecuk tuda'-tuda' bunu' amé' naban amung binaweh pupuKu, mangun ku ukumdeh, ngaceku sala' luk kikemdeh aput bawang ineh. 14Ui nganau' nedeh mangun ku demulun bunu'deh bang bawang luk nateh nekali'deh, ngaceku usehKu mepad kudeng apui luk mulun ruked-ruked.”
15Idi kebala Yeremia, “O Tuhan, Iko luk meluun kali'. Ngerawé negku idi ngedengan negku. Do' Iko ngua' lemulun luk ngedereh negku. Aleg Iko pelaba ulai niat, pad ideh ngaté negku. Do' ngerawé ui pidereh ngaceku Iko. 16Iko nepebala negku, idi ui neninger amung balaMu. O Tuhan Allah luk Melalud, Iko luk kuan negku, idi balaMu manu' niatku ku awang. 17Na ui perurum dengan lun baken, marot, idi meriruh. Ngaceku kekamen luk biréMu negku, ui neketecan buleng-buleng idi mepanu' ku useh. 18Ngudeh ui megéi' medereh? Ngudeh uratku na mepali'? Iamo' miakké Iko ngesusa' negku mepad kudeng arur luk mekeket kareb merikan?”
19Idi kebala Tuhan ni Yeremia, “Kudeng iko lumi Negku, Ui miak ngalap namu, iko miak mangun ku demulunKu sekua' teh. Kudeng iko pebala luk petulu, idi baken luk na ulek, iko miak mangun ku nabiKu sekua' teh. Lemulun miak amé' namu, iamo' aleg iko amé' nedeh. 20Ui miak nganau' namu mangun ku alad luk ratnan tekaling pa kiung lemulun ini. Ideh sikal metueh rat namu, iamo' ideh na miak ngelaya' namu. Ui idi denganmu, idi miak matar namu. 21Ui muit namu rat bang palad lemulun luk dat, idi ngulun namu ratnan lalud lemulun luk mesangit. Ui ini Tuhan pangeh nepebala.”
Currently Selected:
YEREMIA 15: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
