YEREMIA 13
13
Pinginud Ratnan Abpar
1Idi Tuhan nengecuk negku melih abpar ratnan kibung luk do', idi ngayung ku ineh; iamo' Ieh nemebpeng na miak nganau' bang abpa'. 2Idi ui nemelih abpar ineh, maya' kudeng luk icuk Tuhan, idi ui nengayung ku ineh. 3Idi Tuhan nepebala negku teh, kebalaNeh, 4“Amé' déi' Abpa' Pirat. Nguit abpar luk pikaimu ineh, idi ngapung ineh bang aceh lubang batu.” 5Idi ui iné' ngapung ineh muneng ku Abpa' Pirat, maya' kudeng luk icuk Tuhan.
6Muci ratnan ineh, Tuhan nengecuk negku lemubed amé' Abpa' Pirat idi ngalap abpar luk inapung ineh maya' luk icuk Tuhan. 7Idi ui nelemubed iné' Abpa' Pirat. Idi ui nenakap idi ui nengalap abpar ineh rat su luk inanku nengapung neneh. Idi abpar ineh na miak uen makai ngaceku ieh merapuk.
8Idi Tuhan nepebala negku teh. KebalaNeh, 9“Kudeng ini lawéKu ngukum dita' niat Yahuda idi dita' niat Yerusalim luk pelaba rayeh ineh. 10PupuKu luk dat ini ara' maya' balaKu. Ideh dat idi metueh niat mepad kudeng luk atun. Ideh nesembayang maya' allah baken. Ngaceku ineh ideh mepad kudeng abpar ini luk na miak uen makai. 11Mepad kudeng abpar uen micet luun awa' lemulun, kudeng ineh teh Ui pian ku amung lun Israil idi lun Yahuda mepicet maya' Negku.”
Pinginud Ratnan Rubi
12Kebala Tuhan, “O Yeremia, do' mada' nelun Israil, kebalamu, ‘Ui ini Tuhan Allah muyuh pebala: “Idi anid-anid rubi miak uen manu' ku abpa' anggur.” ’ Idi Lun Israil miak pebala namu, kebaladeh, ‘Matu anid-anid rubi miak uen manu' ku abpa' anggur,’ 13Do' mada' nedeh, kebalamu, ‘Ui ini Tuhan miak manu' pupu luk bang bawang ini ku abpa' anggur pad ideh mabuk: do' amung raca' luk inul Daud, lun imam, lun nabi idi lun Yerusalim pana'. 14Idi Ui miak mila' nedeh mepad kudeng rubi luk uen ngatuk, do' anak idi lun rayeh pana'. Na Ui mawa idi méi' nedeh pad ideh pitayenKu.’ ”
Yeremia Mada' Nedeh Ratnan Medita' Niat
15O muyuh Lun Israil, Tuhan pangeh nepebala!
Do' muyuh mebeneh niat idi ninger balaNeh.
16Ngerayeh Tuhan Allah muyuh,
kareb nateh medacem,
pad muyuh na metebaceng luun pegkung kareb medacem,
kareb nateh Ieh maré acang
luk inan muyuh merapet misu' ku dacem.
17Kudeng muyuh na ninger,
ui miak nangi' dengan lulem
ngaceku dita' niat muyuh.
Ui miak nangi', pad abpa' matehku mebpeh,
ngaceku pupu Tuhan pangeh tiban.
18Kebala Tuhan ni Yeremia, “Do' ngecuk raca' idi tinanneh, temurun rat luun kerusideh, ngaceku patadeh luk pelaba do' pangeh nebpeh rat luun uluhdeh. 19Amung bawang rayeh déi' Negeb uen ngerieng. Seburur pana' nateh luk miak macing nedeh. Amung lun Yahuda pangeh tiban.”
20O lun Yerusalim, siruh! Bunu' muyuh macing rat pa tinueh busat aco! Iapehké anak itin muyuh luk mepad kudeng sengeriudan dumba luk do' taga? 21Anunké luk belén muyuh kareb pupu ineh luk mangun ku rurum muyuh uen ngedita' mangun ku lun rayeh muyuh? Muyuh miak medereh, mepad kudeng decur luk mét nenganak. 22Kudeng muyuh ngitun anun punneh ini mangun kuan muyuh — idi anun punneh ayung muyuh pangeh dirak pad muyuh inigu' — ieh ineh ngaceku sala' muyuh pelaba dat. 23Miakké lun Habsi ngisu' ayu kubilneh? Miakké kuir ngisu' baritneh? Kudeng pieh kudeng ineh muyuh luk megéi' nganau' luk dat miak sibada' nganau' luk matu. 24Tuhan miak matad nemuyuh mepad kudeng padek luk mepalid ku bui déi' su luk ali-ali. 25Kebala Tuhan, “Ini ukum luk pinututKu kuan muyuh, ngaceku muyuh mekelupan Negku idi merapet inan allah luk mebalih.” 26Tuhan sebuleng miak nala' ayung muyuh pad muyuh migu. 27Tuhan pangeh nenier nemuyuh nganau' luk inanNeh megateh. Luun pegkung idi luun raked muyuh nakap allah pupu baken mepad kudeng deléi luk melili ku decur lun baken idi kudeng kuda luk nakap tineh. O lun Yerusalim, muyuh pangeh inukum! Idanké muyuh uren idi mangun meligan?
Currently Selected:
YEREMIA 13: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
