YEREMIA 12
12
Yeremia Ngitun Inan Tuhan
1O Tuhan, kudeng ui pesaad Namu,
kali' rungen Iko luk matu.
Iamo' do' ui ngitun Namu ratnan anun-anun luk mesiri
Ngudeh lemulun luk dat na ngalap susa'?
Idi ngudeh lemulun luk naluk ngalap luk piandeh?
2Iko nibu nedeh, idi ideh petacu inan uat;
idi ideh mulun, idi petacu inan bua'.
Ideh ngubur Namu, iamo' na ideh mawa Namu.
3Iamo' Tuhan, Iko kali' negku,
Iko nier kekamenku
idi kali' ui mawa Namu.
Do' nguit lemulun luk dat ini, mepad kudeng dumba luk kereten;
matad nedeh pad macing aco luk inandeh kereten.
4Tuda' ioké tana' ini tekering,
idi uduh bang laman mekarang?
Amung pung idi suit maté
ngaceku dat lemulun luk tudo bang bawang ini,
ieh ineh lemulun luk pebala, “Tuhan na miak nier kekamen tau.”
5Kebala Tuhan,
“O Yeremia, kudeng iko na tuman peribatun dengan lemulun,
kudeng apehké iko peribatun dengan kuda?
Iko dat udeng bang bawang luk na inan susa',
iamo' kudeng apehké iko miak tuman
bang pulung tangeb Abpa' Yarden?
6Kinanakmu luk bang tetek ruma'mu sebuleng pangeh nemasui namu;
ideh pangeh perurum dengan bunu'mu.
Sagan tu pana' baladeh do', aleg iko merapet nedeh.”
Susa' Tuhan Ngaceku Sala' PupuNeh
7Kebala Tuhan,
“Ui pangeh nenecan pupuKu,
Ui pangeh nenala' pupuKu luk pinili'Ku.
Ui pangeh nemaré pupu luk inanKu mawa
bang palad bunu'deh.
8Pupu luk pinili'Ku pangeh nangun ku bunu'Ku;
mepad kudeng balang luk bang pulung,
ideh ngeku Negku
pad Ui megateh nedeh.
9Pupu luk pinili'Ku mepad kudeng kanui,
idi kanui luk baken ngekura' nedeh.
O muyuh pung luk meliput,
do' amé' ku irau ini.
10Mula' raca' rat bawang baken pangeh nengusag kabun anggurKu,
ideh nengeradu' lati'Ku,
idi nengisu' bawangKu luk do' mangun ku su luk ali-ali.
11Ideh nenganau' bawang ineh mangun ku tana' luk metugeh,
idi luk tican pa kiungKu.
Aput tana' mangun ku su luk ali-ali;
idi na lemulun ngerawé tana' ineh.
12Idi lemulun luk ngaro macing maya' pegkung luk ali-ali ineh.
Ui pangeh nemaré bunu' ngusag amung tana' ini,
pad seburur pana' nateh luk do' udeng.
13PupuKu nenibu padé, iamo' ideh ngalap tabpa' mo'.
Ideh metueh ngakem, iamo' na uli'deh.
Ngaceku usehKu
idi pun tibudeh na uli'.”
Pejani' Tuhan Kuan Pupu Luk Iring Bawang Israil
14Kebala Tuhan, “Ini balaKu kuan pupu luk dat luk iring bawang Israil, idi luk nengusag tana' luk biréKu kuan pupuKu Israil. Ui miak ngalap pupu ini rat bang bawangdeh, mepad kudeng tibu luk binubput, idi Ui miak muit nelun Yahuda rat nedeh. 15Iamo' kareb Ui ngalap nedeh idi Ui miak méi' nedeh. Ui miak nguit anid pupu lemubed amé' inan tana' idi bawangdeh sebuleng. 16Kudeng ideh mepicet maya' sembayang pupuKu, idi pebulung ratnan ngadan Tuhan luk mulun — mepad kudeng luk atun ideh nemada' pupuKu pebulung ratnan ngadan Baal — idi ideh miak mangun ku aceh babpat pupuKu idi ngalap peruan. 17Iamo' kudeng aceh pupu na maya', idi Ui miak ngalap nedeh idi ngaté nedeh. Ui ini Tuhan pangeh nepebala.”
Currently Selected:
YEREMIA 12: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
