YEHISKIEL 42
42
Dueh Pudut Muneng Ku Ruma' Allah
1Lemulun ineh nenguit negku amé'nan natad luk bal alad pad macing nan aceh pudut luk pa tinueh busat aco Ruma' Allah, idi luk na mado ratnan pudut luk pa acep aco Ruma' Allah. 2Kikadang pudut ineh lélé dueh ngepulu' tudu' depeh, idi pipangneh pulu' teluh depeh mela. 3Iring selipa ieh petutup ku natad luk iring Ruma' Allah luk limeh depeh mela kikadangneh, idi iring selipa ieh petutup ku natad batu luk bal alad. Ieh pinudut teluh sekuna', anid sekuna' iuk-iuk medita'. 4Iring pa tinueh busat aco pudut ini inan aceh dalan, pipangneh lélé teluh depeh idi kikadangneh lélé dueh ngepulu' tudu' depeh, dengan tanga'-tanga'. 5Takep luk luun sekuna' luk medita' meluun isuut ratnan luk luun sekuna' luk uned idi luk mebeneh, ngaceku ideh pa keted. 6Takep luk luun teluh sekuna' ineh pinudut luun natad dengan na diri. Na ideh mepad kudeng pudut luk baken. 7-8Amung takep luk luun sekuna' luk mebeneh, pulu' teluh depeh mela kikadangneh, idi pekatu dengan ineh inan aceh alad luk pulu' teluh depeh mela kikadangneh luk petutup ku takep-takep baken. 9-10Pa busat aco pudut ineh, rat ku alad ineh, inan tanga'-tanga' luk semuet nan natad luk bal alad.
Pa kabing busat aco Ruma' Allah inan aceh pudut luk mepad, na mado ratnan pudut luk pa acep aco Ruma' Allah. 11Pa atun takep-takep idi inan aceh dalan luk mepad kudeng dalan luk pa tinueh busat aco. Kirayehneh mepad, ayuneh mepad, idi tanga' neh pana' mepad. 12Inan tanga'-tanga' pa kabing busat aco pudut ineh, ieh ineh paped alad pa busat aco.
13Kebala lemulun ineh negku, “Dueh pudut ini meligan. Bang ineh imam-imam luk amé' pa kiung Tuhan kuman baré luk meluun ligan. Ngaceku takep ineh meligan, imam-imam ngerareng baré luk meluun ligan su ineh: ieh ineh baré padé idi baré ngaceku sala' idi babeh sala'. 14Kareb imam-imam pangeh iné' bang Ruma' Allah idi pian amé' nan natad luk bal alad ineh, ideh necan ayung luk meligan luk pikaideh kareb ngakem pa kiung Tuhan. Ideh ngayung ku ayung luk baken kareb nateh ideh amé' su luk inan lun mula' mepamung.”
Tari Ruma' Allah Perapu Natad
15Kareb lemulun ineh pangeh nenari bang Ruma' Allah ineh, ieh nenguit negku remuat maya' tanga' luk pa busat aco, idi ieh nenari bal alad Ruma' ineh. 16Ieh nengalap rukud luk ku nari ineh idi ieh nenari pa busat aco, ieh ineh 133 depeh. 17-19Idi ieh nenari pa tinueh busat aco, pa kabing busat aco, idi pa acep aco, idi ideh mepad kadang, ieh ineh 133 depeh, 20pad alad ineh ngelibut aceh Ruma' dengan natadneh luk mepad pipang, ieh ineh 133 depeh. Alad ineh ngatad luk meligan ratnan luk na meligan.
Currently Selected:
YEHISKIEL 42: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
