YEHISKIEL 41
41
1Pangeh ineh lemulun ineh nenguit negku amé' bang takep luk uned. Ieh nenari dalan, idi kikadangneh lélé dueh depeh, 2pipangneh lélé teluh depeh, idi kapal aladneh pekop mela medepeh. Ieh nenari takep ineh idi kikadangneh lélé pulu' aceh depeh, idi pipangneh mela limeh depeh.
3Idi ieh nesemuet bang takep luk kekiped. Ieh nenari dalan, idi kikadangneh setangal depeh, pipangneh lélé dueh depeh, idi kapal aladneh pekop lélé dueh depeh. 4Ieh nenari takep ineh idi pinangneh pekelibut limeh depeh mela. Idi kebalaneh negku, “Ini Su luk Meluun Ligan.”
Takep Luk Pekatu Nan Alad Ruma' Allah
5Lemulun ineh nenari kapal alad luk pekelibut Ruma' Allah, idi kapalneh lélé dueh depeh. Pekatu nan alad ineh pekelibut Ruma' Allah inan mula' takep luk isuut, pipangdeh medepeh. 6Takep ini inan teluh tutul. Inan teluh ngepulu' takep bang setutul. Alad Ruma' Allah iuk-iuk melipi maya' tutulneh, pad amung takep miak maya' tutulneh, pad amung takep miak tudo luun alad ineh dengan na uen maku'. 7Inan tuda'-tuda' ican luk rayeh pipang bal alad takep ineh pekelibut Ruma' Allah. (Ngaceku takep ini, siren rat iléi, ayu alad Ruma' Allah mepad kapal macing i dita'.) Idi lemulun miak umak rat i beneh amé' nan uned idi amé' i dita' teh. 8Ui nenier aceh natad pekelibut Ruma' Allah ineh. Natad ineh meluun dita' ratnan tana' luk pekelibut; kidita'neh lélé dueh depeh, idi mepad dita' nan tapin takep luk pekatu nan alad Ruma' Allah. 9-10Kapal alad luk pekelibut takep ini mela medepeh. (Inan aceh natad, pipangneh mela limeh depeh, pekelibut Ruma' Allah arang natad luk medita ineh dengan pudut imam-imam.) 11Inan aceh tanga' luk semuet bang amung takep luk pa tinueh busat aco, idi teh aceh tanga' luk semuet bang takep luk pa kabing busat aco. Pipang natad luk pekelibut Ruma' Allah ineh mela medepeh.
Pudut Luk Pa Acep Aco
12Pa acep aco inan aceh pudut luk petutup ku Ruma' Allah. Pipangneh lélé pulu' iwa' depeh idi kikadangneh dueh ngepulu' apat depeh. Kapal aladneh pekelibut mela medepeh.
Kirayeh Ruma' Allah
13Lemulun ineh nenari bal Ruma' Allah. Kikadangneh lélé dueh ngepulu' tudu' depeh. Rat pa keted Ruma' Allah guta natad macing nan paped pudut pa acep aco lélé dueh ngepulu' tudu' depeh kiadoneh. 14Pipang pa atun Ruma' Allah dengan natad luk pekop lélé dueh ngepulu' tudu' depeh. 15Ieh nenari pudut luk pa acep aco Ruma' Allah dengan aladneh luk pekop, luk petutup ku natad, idi kikadangneh lélé dueh ngepulu' tudu' depeh.
Ayu Ruma' Allah
Takep bang Ruma' Allah luk pa atun, takep luk rayeh, idi Su luk Meluun Ligan, 16inayung ku kayuh luk do' taga ratnan apin macing ku tabuk. Tabuk ineh miak uen mapen. 17Alad luk bang Ruma' Allah inarit pad macing pa luun tanga'. 18Arit ineh lawa piasau idi pung luk inan ilad libut-libut takep ineh. Anid pung inan dueh kiung: 19ieh ineh kiung lemulun luk nier piasau pa selipa, idi kiung balang luk nier piasau selipa. Kudeng ineh ayuneh libut-libut alad ineh, 20ratnan apin macing paluun tanga'. 21Diri tanga' ineh melebping.
Bubpun Luk Ratnan Kayuh
Pa atun munung tanga' Su luk Meluun Ligan inan luk kudeng ayu 22bubpun luk ratnan kayuh. Dita'neh lélé medepeh idi pipangneh setangal depeh. Diri lidungneh, alenneh, idi iringneh inau' ratnan kayuh. Kebala lemulun ineh negku, “Ini méja luk idi pa kiung Tuhan.”
Tanga'-Tanga'
23Inan tanga' pekop paped dalan luk semuet bang takep luk rayeh, idi teh pekop paped dalan luk semeut bang Su luk Meluun Ligan. 24Tanga' ineh inan dueh itek luk kabin nan uned. 25Inan lawa piasau idi pung luk inan ilad inarit luun tanga' luk semuet bang takep rayeh mepad kudeng luk luun alad ineh. Idi bal munung tanga' luk semuet bang takep luk pa atun inan alad luk ku itekneh. 26Pekop iring takep ineh inan tuda'-tuda' tabuk, idi luun aladneh inan arit lawa piasau.
Currently Selected:
YEHISKIEL 41: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
