YEHISKIEL 43
43
Tuhan Lemubed Amé' Ruma'Neh
1Lemulun ineh nenguit negku amé' nan tanga' luk pa busat aco, 2#Yeh 10.3–4, 18–19; 11.22–23 idi su ineh ui nenier rayeh Allah lun Israil macing rat pa busat aco. Tang Allah mepad kudeng beri abpa' rayeh, idi tana' merasat ku rayehNeh. 3Luk sinierku ineh mepad kudeng luk sinierku kareb Allah iné' ngusag Yerusalim, idi teh luk sinierku tangeb Abpa' Kibar. Idi Ui netekeradung. 4Idi rayeh Allah nelemaba maya' tanga' luk pa busat aco idi nesemuet bang Ruma'Neh.
5Roh nengiding negku idi nenguit negku amé' nan natad luk uned, idi ui nekali' Ruma' Allah nepanu' ku rayeh Tuhan. 6Lemulun ineh netuped iringku, idi ui neninger Tuhan pebala negku rat bang Ruma'Neh ineh, 7“O lemulun, ini kerusiKu, Ui miak tudo su ini arang lun pupu Israil, idi ngimet nedeh macing ruked-ruked, pad lun Isrial idi raca'deh na miak ngigu' ngadanKu luk meligan dengan sembayang inan allah baken, idi teh dengan naped ulung kuan raca'deh luk naté. 8Raca'-raca' ineh nemudut tanga'-tanga' idi diri tanga' ruma'deh muneng ku tanga' idi diri tanga' Ruma'Ku, pad alad mo' arang kai. Ideh nengigu' ngadanKu luk meligan dengan kekamendeh luk pelaba dat, pad Ui nengaté nedeh dengan usehKu. 9Do' ideh ugka' sembayang nan allah baken idi ngusag ulung raca'deh, pelé Ui mulun arangdeh macing ruked-ruked.”
10Idi teh kebala Tuhan, “O lemulun, do' mada' nelun Israil ratnan Ruma'Ku, idi nima' nedeh sibada' ratnan ayuneh, pad ideh migu' ngaceku kekamendeh luk dat. 11Kudeng ideh migu' ngerawé kekamendeh, do' ngelio ayu Ruma'Ku kuandeh, ieh ineh ayuneh, tanga'-tanga' neh luk inan semuet idi remuat, kirayehneh, aturneh, idi amung ukum idi ecukneh. Ngayud amung ineh kuandeh, pad ideh kali' aturneh, pelé ideh maya' amung ukumneh. 12Ini ukum ratnan Ruma' Allah: Amung tana' libut-libutneh ineh meluun ligan.”
Bubpun
13 #
Pur 27.1–2; 2 In 4.1 Ini kirayeh bubpun. Tari luk ku nari bubpun mepad kudeng luk ku nari Ruma' Allah. Libut-libut alen bubpun inan abang, kidalemneh lélé dueh kaki, idi pipangneh pana' mepad, idi iring abang ineh lélé sekaki dita'neh. 14Sekuna' bubpun luk pun-pun setangal depeh dita'neh. Pipang sekuna' luk kedueh lélé dueh kaki pekelibut, idi kidita'neh mela sedepeh. Idi teh pipang sekuna' iuk keteluh lélé dueh kaki pekelibut ratnan sekuna' luk kedueh. 15Sekuna' luk pa luun su luk inan amung baré sabpen medepeh mela kidita'neh. Lidungneh meluun dita' ratnan unedneh. 16Pipangneh mepad, ieh ineh teluh depeh mela. 17Pipang sekuna' luk uned pana' mepad, ieh ineh lélé apat depeh; idi ieh pinudut lélé sekaki rat ku iring sekuna' luk pun-pun. (Pipang abang ineh lélé dueh kaki.) Ican luk nan umak bubpun ineh pa busat aco.
Ratnan Ngeligan Bubpun
18Kebala Tuhan Allah negku, “O lemulun, ninger balaKu. Kareb bubpun ineh pangeh pinudut, do' iko ngeseb baré luunneh pad ieh uen ngeligan idi ngisak dara' pung luk kereten luunneh. 19Imam lun Liwi luk inul Saduk mo' miak amé' ngakem pa kiungKu. Ui ini Tuhan Allah ngecuk kudeng ini. Iko miak maré nedeh aceh sapi' deléi luk pegawa' luk baréndeh ku baré ngaceku sala'. 20Do' iko ngalap sebuang dara'neh idi nganau' ineh luun lidung sekuna' bubpun luk pa luun ineh, idi teh luun lidung sekuna' bubpun luk uned idi libut-libut iringneh. Kudeng ineh iko ngeligan bubpun ineh, idi nganau' aceh luk inan pedo'. 21Do' iko nguit sapi' luk barén ku baré ngaceku sala' idi ngeseb neneh su luk litep bal alad Ruma' Allah. 22Kenebpa do' iko ngalap aceh amék deléi luk do' idi maré neneh ku baré ngaceku sala'. Ngaligan bubpun ku dara'neh mepad kudeng luk inau'mu ku dara' sapi' ineh. 23Kareb iko pangeh nenganau' ineh, do' ngalap aceh sapi' deléi luk pegawa' idi dumba deléi luk pegawa', luk na anun-anun luk mét. 24Do' nguit ineh amé' Negku luk Tuhan. Imam-imam ngisak tucu' luun didueh ineh idi ngeseb nedidueh ku baré kuanKu. 25Bang tudu' aco do' iko maré amék, sapi', idi dumba ku baré ngaceku sala'. Amungdeh deléi luk na luk mét. 26Bang tudu' aco ineh do' imam-imam nganau' luk inan pedo' pad bubpun ineh uen ngeligan. 27#Pur 29.35–37 Abud minggu ineh, do' imam-imam ngimun maré baré luk sabpen idi baré luk sabpen idi baré luk nguit pedo' kuan lun mula' luun bupun ineh, pelé Ui mawang niat nemuyuh. Ui ini Tuhan Allah pangeh nepebala.”
Currently Selected:
YEHISKIEL 43: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
