YEHISKIEL 38
38
Gog mangun Ku Pelapet Allah
1Kebala Tuhan negku, 2#Lin 20.8 “O lemulun, do' ngadu' ni Gog rat bawang Magog. Ieh ineh raca' rayeh bang bawang Misek idi Tubal. Ngadu' neneh. 3Kudeng ini bala Tuhan Allah: Ui ni bunu'mu. 4Ui ngakem namu idi ngedier namu amé' pa keted. Ui nganau' keluit bang tangmu idi ngeruid namu dengan bawehmu semuet bang ukum, dengan baweh kuda idi lun luk maya' kuda dengan ayung bunu'deh. Baweh ineh pelaba rayeh idi anid lun pebunu' ngimet utap idi pelapet. 5Lun rat Parsi, Sudan, idi Libia idi denganmu. Amungdeh inan utap idi tupi. 6Amung lun pebunu' rat bawang Gomer idi Bait Togarma rat pa tinueh busat aco idi denganmu, kudeng ineh teh lun pebunu' rat bawang baken. 7Do' iko temina' dengan amung bawehmu luk maya' ukummu. 8Pangeh tuda'-tuda' lak Ui ngecuk namu ngerieng aceh bawang su luk inan lemulun tudo dengan na matot bunu' rat kareb ideh pimung rat bang tuda'-tuda' bawang. Iko miak ngerieng pegkung-pegkung Israil luk mio tican, iamo' nekini ideh do' udeng su ineh. 9Iko dengan bawehmu idi dengan mula' pupu baken miak ngerieng bawang Israil mepad kudeng barui, idi iko mapen tana' mepad kudeng laput.”
10Kudeng ini bala Tuhan Allah ni Gog: “Kareb ineh iko inan aceh terawé luk dat. 11Iko miak ngerawé ratnan ngerieng aceh bawang luk melaya' luk na linibung idi luk na lun pebunu', idi su luk inan lemulun do' udehg. 12Iko miak mano idi ngaro ruma' lemulun luk mudeng bang bawang luk inusag atun. Ideh pimung rat arang anid-anid pupu, idi nekini ideh inan tana' idi aya', idi ideh tudo uned tana' ini. 13Lun Siba, lun Dedan, idi lun luk pepua' rat bawang Tarsis miak ngitun namu, kebaladeh, ‘Pangehké iko nengamung bawehmu amé' pebunu' pad ngaro idi naban pirak, amas, sapi', idi binaweh, idi buro dengan pelaba ula' binaweh luk uenmu mano?’ ”
14Idi Tuhan Allah nengecuk negku pebala ni Gog, “Kudeng ini bala Tuhan Allah: Kareb pupuKu lun Israil do' udeng iko miak nalan, 15rat bawangmu luk pa tinueh busat aco. Iko nguit aceh baweh luk rayeh idi luk mesangit ratnan mula' pupu. Amungdeh maya' kuda. 16Iko miak munu' nelun Israil, mepad kudeng aceh barui luk lemaba bawang. Kareb tarekneh macing, Ui ngecuk namu ngerieng bawangKu, pad amung pupu kali' Negku, pelé Ui ngegala' liganKu bang luk ruenKu kuanmu. 17Ui nepebala ratnan iko dengan tang demulunKu nabi-nabi lun Israil luk atun, kebalaKu, Ui miak nguit seburur lemulun munu' Israil.” Tuhan Allah pangeh nepebala.
Ukum Allah Kuan Gog
18Kebala Tuhan Allah, “Kareb Gog munu' Israil, Ui megateh niat. 19Dengan usehKu Ui pejani'. Idi kareb ineh, inan aceh ruyuh tana' luk rayeh bang bawang Israil. 20Amung lawid idi suit, amung pung luk rayeh idi luk isuut, idi amung lemulun luk luun tana' ini miak megegker ku totdeh Negku. Pegkung miak meturan, pipi'-pipi' pana' meturan, idi amung libung batu miak metabpa. 21Ui miak ngatot ni Gog ku tuda'-tuda' susa'. Ui ini Tuhan pangeh nepebala. Bawehneh sebuleng pad-pad pepaté ku pelapetdeh. 22Ui ngukum neneh ku ét idi até pitayen. Ui ngutang udan idi udan batu, apui idi batu apui luunneh idi luun bawehneh, idi teh luun amung pupu baken luk ngedengan neneh. 23Dengan luk kudeng ineh, Ui ngegala' kuan amung pupu ratnan Ui ini rayeh idi meligan, pelé ideh kali' Ui ini Tuhan.”
Currently Selected:
YEHISKIEL 38: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
