YEHISKIEL 39
39
Gog Linaya'
1Kebala Tuhan Allah, “O lemulun, ngadu' ni Gog, raca' luk rayeh bang bawang Misek idi Tubal, idi mada' neneh. Kudeng ini bala Tuhan Allah: Ui ini bunu'mu. 2Ui ngedier namu amé' pa keted, idi nguit namu rat pa tinueh busat aco amé' inan pegkung-pegkung Israil. 3Ui miak mepag ticu'mu pa kabing, pad binormu mebpeh, idi ticu'mu pa tinueh pad ilebmu mebpeh. 4Gog dengan bawehneh idi dengan pupu baken luk ngedengan neneh miak meluka' idi maté luun pegkung Israil, idi Ui nima' butungdeh kenen suit idi pung luk meliput. 5Ideh miak meluka' idi maté luun natad. Ui ini Tuhan Allah pangeh nepebala. 6Ui nganau' apui bang bawang Magog idi maya' tangeb abpa' rayeh su luk inan lemulun do' udeng, pad amung-amung lemulun kali' Ui ini Tuhan. 7Idi kali' rungen pupuKu lun Israil miak kali' ngadanKu luk meligan idi Ui na nima' ngadanKu uen ngigu' teh, pelé amung pupu miak kali' Ui ini Tuhan Allah lun Israil luk Meligan.”
8Kebala Tuhan Allah, “Kali' rungen tarekneh luk bida'Ku miak macing. 9Lemulun luk tudo bang amung bawang Israil miak amé' ngalap repapeh luk tacin ku kayuh apui. Ideh nganau' apui ratnan utap, binor, ileb, paper, idi busu, tudu' lak kinioneh. 10Ideh na ngalap kayuh apui rat luun natad idi nebpeng kayuh luun pulung, ngaceku petap repapeh luk tacin luk sabpendeh. Ideh miak ngaro binaweh lemulun luk nengaro binawehdeh.” Tuhan Allah pangeh nepebala.
Gog Tinanem
11Kebala Tuhan, “Kareb amung ini mangun, Ui miak maré aceh tanem kuan Gog déi' bawang Israil, luun Raked Sakai, luk pa busat aco Abpa' luk Mepaci'. Gog id amung bawehneh tinamen su ineh, idi raked ineh tetanen, ‘Raked Baweh Gog.’ 12Lun Israil nanem butung idi ngeligan bawang tudu' bulan kinioneh. 13Amung lun bang bawang ineh peruyung nanem nedeh, idi kareb aco tuehku' ideh miak buren ku ineh. Ui ini Tuhan pangeh nepebala. 14Pangeh tudu' bulan lemulun miak pilin nalan aput-aput bawang nakap butung luk ketecan luun tana', pad ngeligan bawang. 15Kareb ideh nalan aput-aput bawang, kudeng ideh kali' aceh tulang lemulun, ideh nganau' aceh etu iringneh, idi lun luk nganau' tanem amé' nanem ineh luun Raked Baweh Gog. ( 16Muneng ku raked ineh inan aceh bawang luk ngalap ngadan baweh ineh.) Kudeng ineh bawang miak uen ngeligan teh.”
17 #
Lin 19.17–18
Kebala Tuhan Allah negku, “O lemulun, nawar amung suit idi pung rat iapeh-iapeh amé' kuman baré luk ruenKu temina' kuandeh. Ieh ineh aceh irau luk rayeh luun pegkung Israil, su luk inandeh miak kuman lemulun idi ngirup dara'. 18Ideh kuman butung lun pebunu' idi ngirup dara' raca' bang tana' ini. Amungdeh ineh pitayen mepad kudeng dumba deléi, anak dumba, amék, idi sapi' luk melamu. 19Kareb Ui ngaté lemulun ini, mepad kudeng baré luk kereten, suit idi pung miak kuman lemak macing mebor idi ngirup dara' pad ideh mabuk. 20Iring téngKu ideh miak kuman kuda, idi lun luk maya' kuda, lun luk mesangit, idi lun pebunu'. Ui ini Tuhan Allah pangeh nepebala.”
Israil Uen Nuneb
21Kebala Tuhan, “Ui miak nima' pupu baken nier rayehKu, idi Ui ngegala' laludKu, kareb Ui ngacing ukumKu luk mesiri. 22Rat pad sineh lun Israil miak kali' Ui ini Tuhan Allahdeh. 23Idi pupu baken miak kali' lun Israil tiban ngaceku sala' luk kikemdeh pa kiungKu. Ui neteketed rat nedeh, pad bunu'deh nengakem nedeh, pelé ideh pitayen. 24Ui nengukum nedeh petulu dengan lutakdeh idi datdeh, idi Ui neteketed rat nedeh.”
25Kebala Tuhan Allah, “Nekini, Ui miak mé' nan inul Yakub, lun Israil, pelé ideh uen ngeperuan. Ui matar ngadanKu luk meligan. 26Kareb ideh do' udeng bang bawangdeh sebuleng teh, dengan na luk ngedereh nedeh, ideh miak mekelupan igu'deh kareb ideh neraruh rat Negku. 27Ui miak nguit nedeh muli' rat bang amung bawang bunu'deh, pad ngegala' liganKu pa kiung mula' pupu baken. 28Kareb ineh pupuKu miak kali' Ui ini Tuhan Allahdeh, ngaceku Ui nemaré nedeh tebanen, idi nekini Ui ngamung nedeh idi nguit nedeh muli', pad seburur pana' nateh luk ketecan. 29Ui miak ngutang RohKu kuan lun Israil, idi na Ui teketed rat nedeh teh. Ui ini Tuhan Allah pangeh nepebala.”
Currently Selected:
YEHISKIEL 39: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
