YEHISKIEL 37
37
Ruan Luk Mepanu' Ku Tulang Luk Tekering
1Ui neketukan Roh Tuhan, idi Roh ineh nenguit negku idi nengerareng negku bang ruan, idi su ineh maput ku tulang. 2Ieh nenguyut negku lawé-lawé bang ruan ineh, idi Ui nenier pelaba ula' tulang, idi tulang ineh pelaba tekering. 3Kebala Tuhan negku, “O lemulun, miakké tulang ini mulun baruh?”
Idi kebalaku, “O Tuhan Allah, Iko sebuleng mo' luk kali' ineh.”
4KebalaNe, “Do' mada' bala luk barénKu kuan tulang ini. Ngecuk nedeh ninger bala Tuhan. 5Kudeng ini bala Tuhan Allah kuandeh: Ui nganau' niat bang nemuyuh, pad muyuh mulun. 6Ui maré urat kuan muyuh idi uang, idi ngebpu nemuyuh ku kubil. Ui nganau' niat bang nemuyuh, pelé muyuh mulun, pad muyuh kali' Ui ini Tuhan.”
7Idi ui nemada' luk bila Tuhan negku. Kareb ui pebala, ui neninger uni luk mekaru', ieh ineh tulang-tulang amé' petutum. 8Kareb ui nier, tulang-tulang ineh ibpu ku uang, urat, idi kubil. Iamo' na luk idi niat bang burur ineh.
9Kebala Allah negku, “O lemulun, mada' bala luk barénKu kuan bui. Kudeng ini bala Tuhan Allah: Amé' rat anid lidung tana' idi nginiat kuan butung-butung ini, pad ideh mulun.”
10 #
Lin 11.11
Idi ui nemada' luk bila Tuhan negku. Idi niat nesemuet bang butung ineh, pelé ideh mulun idi ideh netuped, pad inan pelaba ula' lemulun.
11Kebala Allah negku, “O lemulun, lun Israil mepad kudeng tulang ini. Kebaladeh, ‘Kai tekering, idi na luk inan merapet, idi na kekiped kai.’ 12Ngaceku ineh mada' nelun Israil. Kudeng ini bala Tuhan Allah: Ui ngukab tanemdeh idi nguit nedeh remuat, pad ideh muli' amé' bawang Israil. 13Kareb Ui ngukab tanem pupuKu idi nguit nedeh remuat, ideh miak kali' Ui ini Tuhan. 14Ui nganau' niatKu bang nedeh, pad ideh mulun, idi Ui nima' nedeh tudo bang bawangdeh sebuleng, pad ideh kali' Ui ini Tuhan. Ui pangeh nepejani', idi Ui miak nganau' luk bilaKu. Ui ini Tuhan pangeh nepebala.”
Yahuda Idi Israil bang Sebuleng Imet
15Kebala Tuhan negku teh, 16“O lemulun, ngalap aceh rukud idi ngayud luunneh, ‘Imet Yahuda.’ Idi ngalap aceh rukud teh idi ngayud luunneh, ‘Imet Israil.’ 17Idi ngimet dueh rukud ineh mepad kudeng sebuleng rukud. 18Pupumu miak ngecuk namu mada' ilungneh nedeh. 19Mada' nedeh, Kudeng ini bala Tuhan Allah: Ui pian ngalap rukud luk pinginud Israil idi Ui pian mamung ineh dengan rukud luk pinginud Yahuda. Idi Ui nganau' dueh rukud ineh mangun ku sebuleng bang paladKu.
20“Ngimet dueh rukud luk inayudmu ineh bang paladmu, pad lun mula' miak nier ineh. 21Mada' nedeh, Kudeng ini bala Tuhan Allah: Ui ngalap nelun Israil rat bang bawang luk ulekdeh ineh, idi ngamung nedeh, idi nguit nedeh amé' bawangdeh sebuleng. 22Ui nganau' nedeh mangun ku sebuleng pupu bang bawang luk luun pegkung Israil. Sebuleng raca' miak ngimet nedeh, pad ideh na mangun ku dueh imet. 23Ideh na ngelutak bururdeh ku akang luk dat teh, idi na meraruh ku sala' teh. Ui miak muit nedeh ratnan amung lawédeh luk mesala' idi amung raruhdeh. Ui miak ngeligan nedeh pad ideh mangun ku pupuKu idi Ui mangun ku Allahdeh. 24#Yeh 34.24 DemulunKu Daud mangun ku raca'deh idi sebuleng Lun Matar miak ngimet nedeh, idi ideh miak maya' ukumKu. 25Ideh miak tudo bang bawang luk biréKu kuan demulunKu Yakub, ieh ineh bawang tepundeh. Ideh tudo su ineh dengan anakdeh idi inuldeh ruked-ruked. DemulunKu Daud miak ngimet nedeh ruked-ruked. 26Ui nganau' aceh jani' luk ngeletep nedeh ruked-ruked. Ui nganau' nedeh amé' mula'. Idi Ui nganau' ruma'Ku arangdeh macing ruked-ruked. 27#2 Kor 6.16; Lin 21.3 Ui miak tudo arangdeh idi mangun ku Allahdeh, idi ideh mangun ku pupuKu. Kareb Ui nganau' rumaKu arangdeh macing ruked-ruked, amung pupu miak kali' Ui ini Tuhan pangeh nengalap Israil kuanKu.”
Currently Selected:
YEHISKIEL 37: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
