YEHISKIEL 36
36
Peruan Allah Kuan Israil
1Kebala Tuhan, “O lemulun, do' mada' amung pegkung Israil. 2Kudeng ini bala Tuhan Allah nemuyuh: Dengan medita' niat bunu' lun Israil nepebala, ‘Nekini pegkung ineh luk mon tau kuan!’
3“Ngaceku ineh do' mada', Kudeng ini bala Tuhan Allah: Kareb pupu baken luk pekelibut Israil nengerieng idi nengaro pegkung Israil, amung lemulun nesitunga nan Israil. 4Ngaceku ineh, O muyuh pegkung Israil, ninger luk belén Tuhan Allah kuan pegkung, surud, arur, raked, su luk inusag, idi su luk tican luk inaro idi luk inan pupu baken nesitunga.
5“Ui ini Tuhan Allah pangeh nepebala dengan gateh niatKu ratnan pupu baken luk pekelibut Israil, idi meluun teh Edom. Dengan mawang niat ideh situnga idi nengaro tana'Ku idi lamanKu. 6“Ngaceku ineh mada' bala luk barén Tuhan Allah kuan bawang Israil, idi kuan pegkung, surud, arur, idi raked: Dengan gateh niatKu Ui pebala ngaceku muyuh pidereh pupu baken.
7“Ui ini Tuhan Allah pebulung. Pupu baken luk pekelibut Israil miak uen ngigu'. 8Iamo' luun amung pegkung Israil, lawa kayuh miak nginulih idi kebua' kuan muyuh pupuKu lun Israil. Na mio teh muyuh muli'. 9Ui idi dengan muyuh, idi kali' rungen tana' muyuh uen ngeradu teh pad miak nganau' lati'. 10Ui nganau' nemuyuh amé'-amé' mula'. Amung bawang muyuh luk inusag piduten baruh, pad muyuh tudo su ineh. 11Ui nganau' lemulun id sapi' pana' amé'-amé' mula'. Muyuh meluun ula' ratnan luk atun, idi muyuh miak mula' anak teh. Ui nima' nemuyuh tudo su ineh mepad kudeng luk atun, idi muyuh ngalap peruan luk meluun rayeh, pelé muyuh kali' Ui ini Tuhan. 12Ui nguit lun pupuKu Israil muli' pad nalan luun tana' muyuh, luk mangun ku babpat muyuh sebuelng luk mebaleng pad anak muyuh petap akan.
13“Kudeng ini bala Tuhan Allah: Lemulun neten pegkung-pegkung ineh ‘Kuman Lemulun’, kebaladeh, pegkung ineh mano anak ratnan pupu ineh. 14Ui ini Tuhan pangeh nepebala. Rat pad sini ideh na kuman lemulun, idi na mano anak muyuh, 15pad pegkung ineh na ninger kuyo lun luk na manu idi bala pupu baken luk situnga. Pegkung ineh na mano anak ratnan pupu ineh. Ui ini Tuhan pangeh nepebala.”
Ulun Israil Luk Mebaruh
16Kebala Tuhan negku, 17“O lemulun, kareb lun Israil tudo bang bawangdeh atun, ideh nengelutak neneh ku lawédeh idi kekamendeh. SirenKu kekamendeh melutak mepad kudeng kibung decur luk macing bulan. 18Ui nengacing usehKu nedeh, ngaceku mula' lemulun luk pinatédeh bang bawang ineh, idi ngaceku akangdeh luk nengelutak bawangdeh. 19Ui nengukum nedeh ngaceku lawédeh idi kekamendeh, pad Ui nengatad nedeh amé' bang bawang pupu baken. 20Iamo' su paeh luk ulekdeh, ideh nengigu' ngadanKu luk meligan, ngaceku lun pebala, ‘Lemulun ini nenecan bawang luk biré Allahdeh nedeh,’ 21pad Ui mesusa' ngerawé ngadanKu luk meligan, ngaceku lun Israil nengigu' ngadanKu su apeh luk ulekdeh.
22“Ngaceku ineh do' mada' nelun Israil. Kudeng ini bala Tuhan Allah nedeh: Luk ruenKu muci, baken ngaceku muyuh lun Israil, iamo' ngaceku ngadanKu luk meligan, luk inigu' muyuh bang anid bawang. 23Kareb Ui ngegala' ligan ngadanKu luk rayeh kuan anid bawang, ieh ineh ngadan luk inigu' muyuh arang pupu baken, idi ideh miak kali' Ui ini Tuhan. Ui ini Tuhan Allah pangeh nepebala. Ui makai nemuyuh pad ngegala' kuan anid pupu, Ui ini meligan. 24Ui miak ngalap nemuyuh rat arang anid pupu idi rat bang anid bawang, idi nguit nemuyuh muli' amé' bang bawang muyuh sebuleng. 25Ui miak ngisak abpa' luk meligan luun muyuh, pad muyuh baruin ratnan akang muyuh idi ratnan anun-anun luk nengelutak nemuyuh. 26#Yeh 11.19–20 Ui maré kuan muyuh niat luk mebaruh, idi teh roh luk mebaruh ruenKu bang nemuyuh. Ui miak nala' niat muyuh luk ratnan batu, idi maré niat lemulun kuan muyuh. 27Ui nganau' RohKu sebuleng bang nemuyuh, pad nganau' nemuyuh maya' ukumKu idi ngimet bada'Ku luk biréKu nemuyuh, 28pelé muyuh tudo bang bawang luk biréKu inan tepun muyuh. Muyuh mangun ku pupuKu, idi Ui ini mangun ku Allah muyuh. 29Ui ngulun nemuyuh ratnan amung-amung luk ngelutak nemuyuh. Ui ngecuk padé maré uli' luk mula', pad muyuh na melau teh. 30Ui miak ngula' uli' bua' idi lati' muyuh, pad na luk idi iru' luk ngigu' nemuyuh arang pupu baken baruh peh. 31Muyuh miak ngerawé kekamen muyuh luk dat idi sala' luk inau' muyuh, pad muyuh megateh inan burur muyuh sebuleng ngaceku sala' idi dat muyuh. 32O Israil, kudeng ini bala Tuhan, Ui na nganau' ini ngaceku muyuh. Do' muyuh migu' ku kekamen muyuh. Ui ini Tuhan Allah pangeh nepebala.”
33Kebala Tuhan Allah, “Kareb Ui ngeligan nemuyuh ratnan amung-amung sala' muyuh, Ui miak nima' nemuyuh tudo bang bawang muyuh, pad muyuh mudut baruh luk inusag ineh. 34Lemulun luk megéi' lemaba lati' muyuh kali' lati' muyuh mapet, iamo' Ui nima' nemuyuh nganau' lati' muyuh baruh. 35Amung lemulun miak pebala ratnan tana' luk mapet ini luk mangun mepad kudeng Kabun Eden, idi ratnan bawang luk tibpa, inaro, idi inusag, luk linibung, pad lemulun miak tudo su ineh baruh. 36Idi pupu baken luk pekelibut Israil luk neketecan miak kali' Ui ini Tuhan mudut baruh bawang luk inusag idi teh nibu luun lati' luk pangeh tican. Ui ini Tuhan pangeh nepebala, idi Ui miak nganau' luk bilaKu.”
37Kebala Tuhan Allah, “Ui nganau' meluun ratnan ineh teh. Ui nima' nelun Israil mutuh pedengan rat Negku. Ui nima' nedeh amé' mula' mepad kudeng aceh riudan dumba. 38Bawang luk pangeh inusag bang kareb ini miak mepanu' ku lemulun mepad kudeng Yerusalim atun mepanu' ku dumba luk barén kareb aco rayeh, pelé ideh kali' Ui ini Tuhan.”
Currently Selected:
YEHISKIEL 36: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
