YEHISKIEL 35
35
Ukum Allah Kuan Edom
1 #
Yes 34.5–17; 63.1–6; Yer 49.7–22; Yeh 25.12–14; Am 1.11–12; Ob 1–14; Mal 1.2–5 Kebala Tuhan negku, 2“O lemulun, ngadu' bawang Edom. 3Mada' pupu ineh. Kudeng ini bala Tuhan Allah:
Ui ini bunu'mu, O pegkung Edom!
Ui nganau' namu mangun ku su luk ali-ali.
4Ui ngusag amung bawangmu,
pad tana'mu dat ali,
pelé iko kali' Ui ini Tuhan.
5“Iko bunu' Israil luk meruked idi nemaré pupuneh pitayen kareb susa'neh kareb ukumneh luk kekiped. 6Ngaceku ineh — idi Ui ini Tuhan Allah luk mulun — kali' rungen iko na miak mepuit ratnan ukum maté. Iko mesala' ngaceku ngaté lemulun, idi até miak ngerada' namu. 7Ui miak nganau' punang arur déi' Edom mangun ku su luk ali-ali, idi ngaté amung lemulun luk lemaba su ineh. 8Ui miak mapen pegkung ku butung, idi butung lemulun luk pinaté bang bunu' maput luun pegkung idi luun raked. 9Ui nganau' namu mangun ku su luk ali-ali ruked-ruked, pad seburur pana' nateh luk mulun bang bawang-bawangmu teh, pelé iko kali' Ui ini Tuhan.
10“O Edom, kebalamu, ‘Dueh pupu, ieh ineh Yahuda idi Israil, idi bawang didueh ui kuan, idi tau miak ngalap bawang-bawang ineh,’ sagan pana' Tuhan idi arangdeh. 11Ngaceku ineh, kali' rungen Ui ini Tuhan Allah luk ulun miak ngua' namu ngaceku useh, gateh, idi temaruhmu inan pupuKu. Ideh pana' miak kali' Ui ngukum namu ngaceku luk inau'mu nedeh. 12Idi iko kali' Ui ini Tuhan neninger namu pebala dengan situnga ratnan pegkung-pegkung Israil luk dat ali luk pian lapenmu. 13Ui neninger balamu luk medita' niat luk ngedat Negku.”
14Kebala Tuhan Allah, “Ui nganau' namu dat ali, pad aput tana' mawang niat ku tabpamu, mepad kudeng iko mawang niat ku susa' Israil luk pupuKu. Pegkung Sir idi tana' Edom mangun dat ali, pad amung lemulun kali' Ui ini Tuhan.”
Currently Selected:
YEHISKIEL 35: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
