YEHISKIEL 30
30
Tuhan Miak Ngukum Masir
1Kebala Tuhan teh, 2“O lemulun, mada' bala luk barénKu idi pebala, Kudeng ini bala Tuhan Allah:
‘Temido, ngaceku mesusa' aco ineh!’
3Aco ineh muneng, aco luk inan Tuhan ngacing ukum,
aco luk ngacing laput idi susa' kuan amung pupu.’
4Inan bunu' déi' bawang Masir,
idi susa' luk rayeh déi' Sudan.
Mula' lemulun miak pitayen déi' Masir.
Bawang ineh miak uen ngaro,
pad ieh mangun ku usag.
5“Lun tebarin luk pebunu' rat Sudan, Lidia, Libia, Arabia, idi Kub, idi rat arang pupuKu sebuleng pana' miak pitayen bang bunu' ineh.”
6Kebala Tuhan, “Rat Migdol luk pa tinueh busat aco macing Asuan luk pa kabing busat aco, amung lemulun luk ngedengan Masir pitayen. Baweh Masir luk medita' niat miak uen ngusag. Ui ini Tuhan Allah pangeh nepebala. 7Tana' ineh mangun ku bawang luk meluun dat ali bang tana' ini, bawang-bawangneh mangun ku usag mo'. 8Kareb Ui ngeseb bawang Masir idi ngaté amung lemulun luk ngedengan neneh, ideh miak kali' Ui ini Tuhan.
9“Kareb aco ineh macing, idi Masir pangeh inusag, Ui miak ngecuk nelun duken amé' ngegio nelun Sudan, pad ideh matot. Aco ineh malé macing!”
10Kebala Tuhan Allah, “Ui ngecuk ni Nebukadnesar raca Babil ngabud binaweh Masir. 11Ieh miak macing dengan bawehneh luk na méi', idi ngusag bawangdeh. Ideh munu' Masir ku pelapet, pad bawang ineh mepanu' ku butung. 12Ui ngekeket Abpa' Nil idi maré Masir bang imet lemulun luk dat. Pupu baken miak ngusag amung bawang. Ui ini Tuhan pangeh nepebala.”
13Kebala Tuhan Allah, “Ui miak ngusag akang idi allah luk mebalih déi' Mempis. Kareb ineh na lun luk ngimet Masir, idi Ui miak ngatot nelun Masir. 14Ui nganau' babpat Masir luk pa kabing busat aco dat ali, idi Ui ngeseb bawang Soan luk pa tinueh busat aco. Ui miak ngukum bawang Tibis. 15Ui miak ngacing usehKu kuan Pelusium, bawang luk meraben déi' Masir. Ui miak ngaro binaweh Tibis. 16Ui miak ngeseb bawang Masir, pad Pelusium pana' medereh. Libung Tibis miak uen ngusag, idi bawang rayeh mereb ku abpa'. 17Anak adi' deléi rat On idi rat Bubastis pitayen bang bunu', idi lun baken pana' tebanen. 18Tapanes mangun medacem kareb Ui ngagka' lalud Masir, idi ngabud tuehdeh luk inandeh medita' niat. Aceh laput miak mapen Masir, idi amung lemulun luk bang bawang-bawangneh miak tebanen. 19Kareb Ui ngukum Masir kudeng ineh, ideh miak kali' Ui ini Tuhan.”
Langen Raca' Masir Pinutul
20Tudu' aco, bulan aceh, bang lak luk kepulu' aceh, kebala Tuhan negku, 21“O lemulun, Ui pangeh nemutul langen Raca' Masir. Na ieh inabet ku kén pad ieh do', pelé ieh metueh ngimet pelapet teh. 22Idi kudeng ini bala Tuhan Allah, ‘Ui ini bunu' raca' Masir. Ui miak mutul dueh langenneh — ieh ineh luk do' idi luk pangeh pinutul pana', pad pelapet mebpeh rat bang paladneh. 23Ui miak ngatad nelun Masir aput-aput tana'. Idi Ui miak nganau' langen raca' Babil metueh, idi Ui nganau' pelapetKu bang paladneh. 24Iamo' Ui mutul langen raca' Masir, pad ieh ngarod idi maté pa kiung bunu'neh. 25Ui ngelaya' neneh, idi Ui ngetueh raca' Babil. Kareb Ui maré pelapetKu neneh pad ieh munu' nelun Masir, amung lemulun miak kali' Ui ini Tuhan. 26Ui ngatad nelun Masir aput-aput tana', pad ideh kali' Ui ini Tuhan.’ ”
Currently Selected:
YEHISKIEL 30: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
