YEHISKIEL 31
31
Masir Pinginud Kayuh Tumuh
1Aceh aco bulan teluh bang lak luk kepulu' aceh, kebala Tuhan negku, 2“O lemulun, do' mada' Raca' Masir idi amung anak itinneh, kebalamu,
‘Iko pelaba rayeh!
Iko pinginud anunké?
3Iko mepad kudeng kayuh tumuh déi' Lebanon,
idi angatmu do' taga idi ngelungung,
idi batangmu macing nan laput.
4Iko mulun ngaceku abpa'
luk manud bang tana'.
Ideh mubpur su luk inanmu mulun
idi ngacing arur kuan amung kayuh bang pulung.
5Ngaceku iko mula' abpa',
iko meluun dita' ratnan kayuh baken,
idi angatmu rayeh idi mekadang.
6Amung-amung suit nengarar udungmu.
Idi pung luk mesangit nenganak liang lungungmu.
Idi amung pupu bang tana' ini nengato erurdeh su ineh.
7Lawamu ineh pelaba do' taga;
batangmu medita' idi angatmu mekadang;
uatmu macing nan abpa' luk bang tana'.
8 #
Pud 2.9
Iko meluun do' ratnan amung tumuh
luk bang kabun Allah.
Angat tongor idi gita' pana' na mepad kudeng angatmu.
Idi na kayuh bang kabun Allah luk metaga kudeng iko.’
9Ui nenganau' namu metaga', idi angatmu rubpé,
pad kayuh baken bang kabun Allah déi' Eden melili ku tagamu.’
10“Ngaceku ineh, kudeng ini bala Tuhan Allah: Iko ineh iuk-iuk medita' pad macing nan laput, idi kareb iko temubu', iko mangun medita' niat. 11Ngaceku ineh, Ui pangeh nenala' namu, idi Ui miak maré namu kuan raca' pupu baken. Ieh miak ngedereh namu ku ngua' datmu. 12Lun pupu baken luk na méi' miak nebpeng namu idi necan namu. Angatmu miak mebpeh luun anid pegkung idi raked bang bawang ineh. Amung pupu luk tudo iang lungungmu miak buro. 13Suit-suit miak ucep luun batangmu luk tibpeng ineh, idi pung luk mesangit miak nalan luun angatmu. 14Idi rat pad sini sebuleng kayuh pana' na miak amé' medita' pad macing nan laput, sagan tu pana' uen mubpur. Amung-amungdeh pana' miak maté mepad kudeng lemulun, idi amé' perurum nedeh bang su luk inan até.”
15Kudeng ini bala Tuhan Allah, “Aco iko amve' su luk inan até, Ui miak ngecuk abpa' luk bang tana' mapen namu, idi temido. Ui miak ngelubed abpa' pad mula' abpa' arur na manud. Ngaceku iko, Ui ngacing dacem luun Pegkung Lebanon, idi amung kayuh luk bang pulung miak tekering. 16Kareb Ui ngecuk namu amé' su luk inan até, uni ebpehmu miak ngeruyuh amung bawang. Amung kayuh Eden, ieh ineh amung kayuh luk meluun do' rat Lebanon miak buken bang su luk inan até. 17Ideh nemaya' namu amé' su luk inan até pad perurum nedeh luk pangeh tibpeng atun. Idi amung-amung luk tudo liang lungungmu pangeh pitad amé' arang pupu baken.
18“Kayuh ineh raca' Masir idi amung anak itinneh. Kayuh Eden pana' na mepad dita' idi do'. Iamo' nekini, mepad kudeng kayuh Eden, iko miak amé' su luk inan até, pad perurum nan lemulun luk na manu nan Allah, idi teh lemulun luk pitayen bang bunu'.” Kebala Tuhan Allah, “Ui pangeh nepebala.”
Currently Selected:
YEHISKIEL 31: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
