YEHISKIEL 29
29
Bada' Luk Biré Tuhan Ratnan Masir
1 #
Yes 19.1–25; Yer 46.2–26 Pulu' dueh aco bulan pulu' bang lak luk kepulu', kebala Tuhan negku, 2“O lemulun, do' ngadu' Raca' Masir idi mada' neneh ratnan ukum luk macing neneh, idi teh ukum bawang Masir: 3Kudeng ini bala Tuhan Allah kuan Raca' Masir, ‘Ui ini bunu'mu, O buayeh luk rayeh luk tudo bang abpa'. Iko pebala, Abpa' Nil iko kuan, idi teh iko pebala, iko nemudut bururmu sebuleng. 4Ui nganau' aceh keluit bang tangmu, idi nganau' lawid luk bang abpa' mu pedekat luun raramu. Idi Ui nginat namu rat bang Abpa' Nil, dengan lawid luk luun bururmu ineh. 5Ui miak nala' namu dengan amung lawid ineh déi' su luk ali-ali. Butungmu miak mebpeh luun tana' dengan na tinamen. Ui maré neneh kuan suit idi pung ku akandeh, 6#Yes 36.6 pad amung lun Masir kali' Ui ini Tuhan.’ ”
Kebala Tuhan, “Lun Israil pangeh merapet nemuyuh lun Masir ngedengan nedeh, iamo' muyuh mepad kudeng aceh rukud luk melaya'. 7Kareb ideh pucang namu, iko neputul idi nepesut tudungdeh pad awa'deh mét. 8Ngaceku ineh, kudeng ini bala Tuhan Allah: Ui ngecuk lemulun ngerieng namu ku pelapet, pad ideh ngaté pupumu idi aya'mu. 9Masir miak mangun ku su luk ali-ali, pad iko kali' Ui ini Tuhan.
“Ngaceku iko pebala Abpa' Nil iko kuan, idi iko nemudut neneh, 10Ui mangun ku bunu'mu, idi bunu' Abpa' Nilmu pana'. Ui nganau' aput bawang Masir mangun ku su luk ali-ali, rat bawang Migdol luk pa tinueh busat aco macing bawang Asuan luk pa kabing busat aco, pad macing lakan tana' bawang Sudan. 11Lemulun idi pung pana' na lemaba su ineh. Apat ngepulu' lak kinioneh na luk mulun su ineh. 12Masir miak mangun ku bawang luk meluun dat ali bang tana' ini. Usag bawang-bawang Masir meluun dat ratnan usag bawang baken, idi na piduten baruh apat ngepulu' lak kinioneh. Ui miak ngatad nelun Masir amé' arang pupu baken bang anid-anid bawang.”
13Kebala Tuhan Allah, “Pangeh apat ngepulu' lak Ui miak nguit nelun Masir lemubed ratnan bawang pupu baken, su luk inanKu nengatad nedeh, 14idi Ui maré nedeh tudo bang babpat Masir luk pa kabing busat aco, ieh ineh bawangdeh luk pun-pun. 15Su ineh ideh mangun ku aceh imet luk meluun laya', pad ideh na miak ngimet pupu baken teh, ngaceku ideh masi'. 16Israil na merapet mutuh pedengan nedeh baruh. Kareb Israil nier ukum Masir, ieh miak kali' mesala' merapet nedeh. Idi Israil miak kali' Ui ini Tuhan Allah.”
Raca' Nebukadnesar Miak Ngelaya' Masir
17Aceh aco bulan aceh bang lak luk kedueh ngepulu' tudu', kebala Tuhan negku, 18“O lemulun, Nebukadnesar, raca' Babil, nengerieng bawang Sur. Ieh nengecuk bawehneh metueh ngakem, pad abpukdeh nebubput idi tudungdeh nurat, iamo' na samalneh kuan raca' idi bawehneh ineh. 19Ngaceku ineh, kudeng ini bala Tuhan Allah: Ui maré tana' Masir kuan Raca' Nebukadnesar. Ieh miak ngaro idi naban amung binaweh Masir ku tabpar bawehneh. 20Ui maré Masir neneh ku ua' kekamenneh, ngaceku bawehneh nengakem kuanKu. Ui ini Tuhan pangeh nepebala.
21“Kareb amung ineh mangun Ui miak ngetueh nelun Israil idi nima' namu, Yehiskiel, pebala su luk inan lemulun miak ninger namu, pelé ideh kali' Ui ini Tuhan.”
Currently Selected:
YEHISKIEL 29: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
