YEHISKIEL 24
24
Lacang Luk Metugor
1Pulu' aco, bulan pulu' bang lak luk keiwa' Tuhan nepebala negku. 2#2 Rac 25.1; Yer 52.4 KebalaNeh, “O lemulun, do' ngayud aco bulan aco sini, ngaceku aco sini raca' Babil ngimun ngerieng Yerusalim. 3Mada' luk pinginud ini kuan pupuKu luk sikal metueh. Kudeng ini bala Tuhan:
‘Nganau' lacang luun apui,
idi manu' neneh ku abpa'.
4Nganau' uang pung luk meluun do' —
lipneh, kukudneh,
idi uang luk muneng ku tulangneh.
5Ngalap uang ratnan dumba luk meluun do',
idi nganau' mula' kayuh iang lacang ineh.
Nima' abpa' ineh menok,
idi nanek tulang denga uang ineh.’ ”
6Kudeng ini bala Tuhan Allah, “Bawang lun luk ngaté pangeh inukum! Ieh mepad kudeng lacang luk metugor luk na tu isa. Uang pung ineh ilap tesebuleng-tesebuleng pad na luk ketecan. 7Ngaceku ina até bang bawang rayeh. Iamo' dara' na inutang luun tana' su luk inan abuh miak ngapung neneh. Iamo' ieh inutang luun batu. 8Ui nenecan dara' ineh su ineh, su luk inanneh na miak pungen, idi su luk inanneh miak mutuh ua'.”
9Kudeng ini bala Tuhan, “Bawang lun luk ngaté pangeh inukum! Ui sebuleng miak ngamung kayuh apui. 10Do' nguit kayuh apui teh! Ngiup apui! Nanek uang pung. Nanek pad abpa'neh mekeket. Do' ngeseb tulangneh! 11Do' nganau' lacang tekaling ineh luk na uang luun bareh apui pad ieh mesia'. Idi tugorneh miak buro pad lacang ineh meligan baruh. ( 12Iamo' baken amung tugorneh buro ku apui.) 13O Yerusalim, kekamenmu luk dat pangeh nengelutak namu. Sagan tu pana' Ui nenutun ngeligan namu, iko melutak teh. Iko na mangun meligan teh kareb nateh iko kali' usehKu luk mebura'. 14Ui ini Tuhan pangeh nepebala. Tarekmu pangeh nacing, pad Ui na miak méi' namu idi mekelupan datmu. Iko miak kumin ngaceku amung kekamenmu.” Tuhan Allah pangeh nepebala.
Até Awan Nabi
15Kebala Tuhan negku, 16“O lemulun, denak-denak Ui sikal ngalap lemulun luk inanmu meluun awa. Aleg iko medureng, temindo, idi nangi'. 17Aleg tangi'mu pedingeren lun baken. Aleg iko nacung, iamo' ngayung ku sigar idi kasutmu. Aleg ngebpu kiungmu, idi aleg kuman akan lun luk nacung.”
18Bang pekak ineh ui nepegayam nelun mula'. Idi malem ineh awanku naté. Kenebpa ui nenganau' luk pangeh bila Tuhan negku. 19Kebala lun mula', “Ngudehké iko nganau' luk kudeng ineh?”
20Kebalaku nedeh, “Tuhan nengecuk negku 21ngacing balaNeh ini nemuyuh lun Israil. Muyuh medita' niat ratnan raben Ruma' Allah ineh. Muyuh pian ngikak idi nier neneh. Iamo' Tuhan miak ngusag neneh idi anak muyuh luk isuut luk ketecan déi' Yerusalim miak pitayen bang bunu'. 22Kareb ineh muyuh miak nganau' luk inau'ku ini. Muyuh na ngebpu kiung muyuh, idi na muyuh kuman akan lun luk nacung. 23Muyuh miak ngayung ku sigar idi kasut muyuh. Idi na muyuh temido idi nangi'. Muyuh miak melaya' ngaceku sala' muyuh, pad muyuh ngarod seburur nan seburur. 24Idi ui mangun ku tanu' kuan muyuh. Muyuh miak nganau' amung-amung luk inau'ku. Kebala Tuhan, “Kareb ini mangun idi muyuh miak kali' Ui ini Tuhan.’ ”
25Kebala Tuhan, “O lemulun, nekini Ui miak ngusag Ruma' Allah luk meraben luk inandeh medita' niat idi mawang niat, ngaceku ideh pian ngikak idi nier neneh. Idi Ui miak ngaté anakdeh luk deléi idi decur pana'. 26Bang aco sineh, kareb Ui nganau' ineh, lemulun luk mepuit ratnan usag ineh miak amé' mada' namu. 27Kareb aco sineh teh iko miak pebala teh idi pegayam neneh. Kudeng ineh teh iko mangun ku tanu' kuan lun mula', pad ideh kali' Ui ini Tuhan.”
Currently Selected:
YEHISKIEL 24: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
