YEHISKIEL 23
23
Dueh Denganak Decur Luk Mesala'
1Tuhan nepebala negku, 2“O lemulun, inan dueh denganak decur. 3Kareb didueh anak adi' déi' bawang Masir, didueh pasét idi mangun ku decur luk mesawa'. 4Ngadan kinanakneh aceh luk rayeh, ieh ineh Oholah (luk pinginud Samaria), idi ngadan kinanakneh aceh luk isuut, ieh ineh Oholibah (luk pinginud Yerusalim). Ui nengaweh nedidueh idi didueh inan anak. 5Sagan tu pana' ieh awanKu, Oholah megéi' pasét idi melili ku deléi luk inanneh mawa rat bawang Asur, ieh ineh lun pebunu' 6luk ngayung ku ayung luk mesia' merirem, lun do' idi lun rayeh pebunu' pana', amungdeh anak adi' luk do' taga idi lun rayeh lun luk maya' kuda. 7Ieh mangun ku decur luk mesawa' kuan amung lun rayeh baweh Asur, idi lilineh ineh nenguit neneh ngelutak bururneh ngaceku sembayang inan akang lun Asur. 8Ieh nengimun pasét déi' bawang Masir idi na ugka' teh. Rat kareb ieh anak adi', deléi pamung rudap neneh mepad kudeng dengan decur luk mesawa', 9pad Ui nemaré neneh kuan lun Asur luk inanneh mawa idi luk pianneh. 10Ideh nengelebpa neneh, idi nenaban anakneh luk deléi idi decur teh, idi ideh nengaté neneh, pad decur iapeh-iapeh pana' ngatum bala ratnan kekipedneh.
11“Sagan tu pana' Oholibah nekali' amung ineh, ieh meluun dat idi ucet pasét meluun ratnan kinanakneh Oholah. 12Ieh panu' ku lili inan lun rayeh lun Asur idi lun rayeh pebunu', ieh ineh lun pebunu' luk ngayung ku ayung luk do' taga — idi nan lun rayeh baweh luk maya' kuda, amungdeh anak adi' luk do' taga. 13Ui nekali' neneh decur luk mesawa', idi didueh mepad dat.
14-15“Idi ieh iuk-iuk ucet pasét. Idi teh ieh melili ku ayu lun rayeh-rayeh Babil luk inarit luun alad luk sinat ku sat mesia', dengan abet awa'deh idi sigardeh pana'. 16Kareb ieh nenier nedeh, idi ieh mepanu' ku lili, pad ieh nengecuk nelun dukenneh amé' nedeh déi' Babil. 17Idi lun Babil ineh iné' pasét neneh. Ideh nengelutak neneh, pad ieh museh nedeh. 18Ieh pasét dengan megala', pad amung lemulun kali' neneh decur luk mesawa'. Ui megileg ku kekamenneh mepad kudeng Ui megileg ku kekamen kinanakneh. 19Ieh meluun ucet pasét, mepad kudeng luk inau'neh kareb ieh anak adi' decur luk mesawa' déi' Masir. 20Ieh pelaba pian ku deléi luk ucet ku decur mepad kudeng keladai idi kuda ucet ku tineh.” ( 21O Oholibah, iko pian nginud kekamenmu luk dat kareb iko anak adi' déi' Masir, kareb deléi marot ku iti'mu pad iko pasét.)
Allah Ngukum Dueh Denganak Decur Ineh
22“O Oholibah, kudeng ini bala Tuhan Allah: Iko musam ku deléi ineh luk mawa namu, iamo' Ui nganau' nedeh megateh namu pad ideh ngelibut namu. 23Ui nguit amung lun Babil idi lun Kasdim, lun rat Pekod, Sua, Kua, idi amung lun Asur. Ideh ineh lun do' idi lun rayeh rat arang anak adi' luk do' taga. Amungdeh lun rayeh luk ngimet idi lun rayeh baweh luk maya' kuda. 24Ideh miak ngerieng namu rat pa tinueh busat aco, dengan aceh baweh rayeh luk nguit keréta bunu' idi keréta luk nguit repapeh pana'. Ideh miak ngelibut namu dengan ayung utap idi tupi lun pebunu'. Ui maré namu bang paladdeh, pad ideh ngukum namu maya' ukumdeh. 25Ngaceku Ui megateh namu, Ui miak nima' nedeh mulu' icungmu idi lalidmu idi ngaté anakmu pana'. Ideh ngalap anakmu luk deléi idi decur idi ngeseb nedeh mulun. 26Ideh narak ayungmu idi ngaro banému rat luun bururmu. 27Ui ngagka' lilimu idi kekamenmu luk melutak luk inau'mu rat kareb iko déi' Masir, pad iko na nier akang idi ngerawé Masir.
28Kudeng ini bala Tuhan Allah, “Ui maré namu bang palad lemulun luk inanmu museh idi megileg. 29Idi ngaceku ideh megateh namu ideh miak ngalap amung-amung luk ilapmu, pad iko lubpa. Iko miak uen ngegala' dengan ayu decur luk mesawa'. Ini miak mangun ngaceku lilimu idi sétmu. 30Iko pangeh mangun ku decur luk mesawa' kuan amung-amung pupu, idi nengelutak bururmu ku akangdeh. 31Iko nemaya' lawé kinanakmu, ngaceku ineh Ui ngukum namu mepad kudeng Ui nengukum kinanakmu ineh.”
32Kebala Tuhan Allah,
“Iko miak ngirup ratnan sangkir kinanakmu;
ieh rayeh idi medalem.
Amung lemulun miak situnga namu;
sangkir ineh mepanu'.
33Iko miak mesusa' niat idi mabuk,
ku sangkir tot idi usag,
ieh ineh sangkir kinanakmu Samaria.
34Iko miak ngirup amung luk bang sangkir ineh,
idi ngurat ruukmu ku bila'neh.
Ui ini Tuhan pangeh nepebala.”
35Kudeng ini bala Tuhan Allah, “Ngaceku iko nekelupan Negku idi neteketed rat Negku, iko miak medereh ngaceku lili idi sétmu.”
Ukum Allah Kuan Dueh Denganak Decur
36Kebala Tuhan negku, “O lemulun, temina'ké iko ngukum ni Oholah idi Oholibah? Do' ngadu' nedidueh ngaceku kekamen didueh luk dat. 37Didueh sala' pasét idi ngaté lemulun — didueh nepasét nan akang idi nengaté anak-anak luk tinganak didueh kuanKu. Didueh nemaré anak didueh ku baré kuan akang ineh. 38Meluun teh, didueh nengelutak Ruma'Ku idi na nemaya' ukum ratnan Aco luk inan Mudeng, luk pangeh litepKu. 39Pangeh didueh nengaté anak-anakKu mangun ku baré kuan akang ineh, bang aco sineh didueh iné' Ruma'Ku idi nengelutak neneh. Ineh luk inau' didueh bang Ruma'Ku!
40“Didueh nengecuk nelun duken amé' nawar deléi rat bawang luk mado, idi deléi ineh nacing. Didueh decur ineh nediu' idi nenat mateh idi nenganau' bané. 41Didueh netudo luun pagau luk do' dengan aceh méja pa kiung didueh. Idi didueh nengerareng luun méja ineh umau luk do' buen idi umau saitun luk biréKu nedidueh. 42Arod lemulun luk marot pedingeren, ieh ineh deléi luk inuit rat déi' su luk ali-ali. Ideh nenganau' leku' luun langen dueh decur ineh idi pata luun uluh didueh. 43Idi keterawéKu, ideh pasét nan decur luk mengered bang sét. 44Ideh pesua' amé' nedidueh mepad kudeng deléi amé' nan decur luk mesawa'. Kudeng ineh teh lawédeh ni Oholah idi Oholibah, decur luk pasét ineh. 45Lemulun luk matu miak ngukum nedidueh ngaceku pasét idi ngaté lemulun, ngaceku didueh megéi' pasét idi teh inan dara' luun ticu' didueh.”
46Kudeng ini bala Tuhan Allah, “Nguit aceh baweh idi ngatot nedidueh idi ngaro binaweh didueh. 47Nima' baweh ineh mitung nedidueh ku batu idi ngeret nedidueh ku pelapet, idi ngaté anak didueh idi ngeseb ruma' didueh. 48Ui miak ngagka' sét aput bawang ineh, pad mebpeng decur na pasét mepad kudeng didueh. 49Idi menganak miak kuminKu ngaceku sala' pasét idi sembayang nan akang. Idi medueh kali' Ui ini Tuhan Allah.”
Currently Selected:
YEHISKIEL 23: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
