YEHISKIEL 25
25
Bada' Luk Biré Tuhan Ratnan Amon
1 #
Yer 49.1–6; Yeh 21.28–32; Am 1.13–15; Sep 2.8–11 Kebala Tuhan negku, 2“O lemulun, do' mada' sala' bawang Amon. 3Ngecuk nedeh ninger bala Tuhan Allah, ieh ineh, ‘Muyuh mawang niat kareb muyuh nenier Ruma'Ku linutak, idi bawang Israil inusag idi pupu Yahuda tiban. 4Ngaceku muyuh mawang niat ku ineh, Ui miak nima' pupu-pupu rat su luk ali-ali luk pa busat aco ngelaya' nemuyuh. Ideh miak lupo bang bawang muyuh idi tebawang su ineh. Ideh miak kuman bua' idi ngirup rata sapi' muyuh. 5Ui miak ngisu' bawang Raba mangun ku libung unta, idi Amon mangun ku libung dumba, pad muyuh kali' Ui ini Tuhan.’
6“Kudeng ini bala Tuhan Allah, ‘Muyuh nemepag palad idi nuput ku awang niat muyuh. Muyuh nesitunga nan bawang Israil. 7Ngaceku ineh, Ui miak maré nemuyuh bang palad lun pupu baken, pad ideh ngaro binaweh muyuh. Ui miak ngusag nemuyuh pad muyuh na mangun ku aceh pupu teh, idi na luk idi bawang muyuh sebuleng teh. Kareb ineh muyuh miak kali' Ui ini Tuhan.’ ”
Bada' Luk Biré Tuhan Ratnan Moab
8 #
Yes 15.1—16.14; 25.10–12; Yer 48.1–47; Am 2.1–3; Sep 2.8–11 Kebala Tuhan Allah, “Ngaceku kebala Moab, ‘Yahuda ineh mepad kudeng amung pupu baken,’ 9Ui miak nima' bawang luk matar lakan bawang Moab uen ngerieng, meluun teh bawang luk meluun do', ieh ineh Bait Yerimot, Baal Mion, idi Keriataim. 10Ui miak nima' pupu-pupu rat su luk ali-ali luk pa busat aco ngelaya' bawang Moab dengan bawang Amon, pad Moab pana' na mangun ku aceh pupu teh. 11Ui miak ngukum Moab, pad ideh kali' Ui ini Tuhan.”
Bada' Luk Biré Tuhan Ratnan Edom
12 #
Yes 34.5–17; 63.1–6; Yer 49.7–22; Yeh 35.1–14; Am 1.11–12; Ob 1–14; Mal 1.2–5 Kebala Tuhan Allah, “Dengan megateh niat lun Edom nengua' dat Yahuda, idi ngaceku ineh Edom mesala'. 13Kudeng ini bala Tuhan Allah: Ui miak ngukum Edom idi ngaté amung lemulun idi pung pana' bang bawang ineh. Ui nganau' bawang Edom mangun ku su luk ali-ali rat bawang Teman macing bawang Dedan. Amung pupu ineh pitayen bang bunu'. 14PupuKu lun Israil miak ngacing ua'Ku kuan Edom, pad Edom kali' usehKu luk rayeh. Edom miak kali' dereh ua'Ku neneh.” Tuhan Allah pangeh nepebala.
Bada' Luk Biré Tuhan Ratnan Lun Pilistin
15 #
Yes 14.29–31; Yer 47.1–7; Yo 3.4–8; Am 1.6–8; Sep 2.4–7; Sek 9.5–7 Kebala Tuhan Allah, “Dengan megateh niat lun Pilistin pangeh nengua' dat bunu'deh luk mon pad ideh pitayendeh. 16Kudeng ini bala Tuhan: Ui miak ngerieng nelun Pilistin pad ideh mabud. Ui miak ngaté amung lemulun luk neketecan luun Raked Pilistin. 17Ui ngukum idi ngua' nedeh dengan metueh, pad ideh kali' usehKu, idi teh ideh kali' Ui ini Tuhan.”
Currently Selected:
YEHISKIEL 25: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
