YEHISKIEL 22
22
Sala' Yerusalim
1Kebala Tuhan negku, 2“O lemulun, inanké iko temina' ngukum bawang luk mepanu' ku lun luk ngaté? Mada' neneh ratnan amung-amung kekamenneh luk dat.
3Kudeng ini bala Tuhan Allah: Ngaceku iko pangeh nengaté mula' pupumu sebuleng, idi ngaceku iko pangeh nengelutak bururmu sebuleng, ngaceku sembayang inan akang, kali' rungen tarekmu macing. 4Iko mesala' ngaceku amung até ineh, idi iko melutak ku akang luk inau'mu ineh idi nekini tarekmu macing. Ini punneh Ui nenima' amung pupu situnga namu, idi amung bawang meriruh nier namu. 5Bawang luk muneng idi bawang luk mado pana' meriruh ngaceku iko mebala ku ria' luk na pinutut. 6Amung lun rayeh Israil merapet ku tuehdeh sebuleng idi megéi' ngaté lemulun. 7#Pur 20.12; Bad 5.16; Pur 22.21–22; Bad 24.17 Seburur pana' rat arang muyuh nateh luk ngedita' tamantinanneh. Muyuh naluk nelun pupu baken idi muyuh muyok decur tinula' idi anak maté pana'. 8#Uk 19.30; 26.2 Muyuh na ngerawé su luk meligan, idi teh muyuh na maya' ukum ratnan Aco luk inan Mudeng. 9Sebuang lemulun ngadu' nelun baken pad ideh pitayen. Sebuangdeh kuman luk barén kuan akang. Idi sebuangdeh megéi' maya' pinian bururdeh. 10#Uk 18.7–20 Sebuangdeh pasét nan awan tamandeh. Sebuangdeh pamung dengan decur kareb macing bulan. 11Ideh megéi' pasét idi ngubuk ibandeh luk decur idi kinanakdeh luk pamung taman pana'. 12#Pur 23.8; Bad 16.19; Pur 22.25; Uk 25.36–37; Bad 23.19 Sebuang pupumu ngaté lemulun pad ngalap usin. Sebuangdeh maré usin kebiten lun Israil pad ideh ngalap utung luk rayeh. Ideh nekelupan Negku.” Tuhan Allah pangeh nepebala.
13“Ui miak ngukum namu ngaceku iko mano idi ngaté lemulun. 14Inanké kuu'mu, idi inanké tueh ticu'mu teh, kareb Ui pangeh nengukum namu? Ui ini Tuhan pangeh nepebala, idi Ui nganau' luk bilaKu. 15Ui miak ngatad pupumu amé' bang anid bawang idi arang anid pupu pad ngagka' kekamenmu luk dat. 16Idi pupu baken miak situnga namu, O Yerusalim, pad iko kali' Ui ini Tuhan.”
Tetel Allah Luk Ngeligan
17Kebala Tuhan negku, 18“O lemulun, lun Israil na ulek kuanKu. Ideh mepad kudeng teceh tekaling, semara' luk mebuda', belawan, idi semara' luk mitem kareb pirak pangeh linigan bang tetel. 19Ngaceku ineh, kudeng ini bala Tuhan Allah: Ideh na ulek. Ui miak ngamung nedeh bang bawang Yerusalim 20mepad kudeng lemulun nganau' pirak, tekaling, belawan, semara' luk mitem, idi semara' luk mebuda' bang tetel luk ngeligan. 21Matu, Ui miak ngamung nedeh bang Yerusalim, idi nganau' apui pa liangdeh, pad ideh remuno ku usehKu. 22Ideh remuno déi' Yerusalim mepad kudeng pirak remuno bang tetel, pelé ideh kali' ideh nekaneh useh Tuhan.”
Sala' Lun Rayeh Israil
23Kebala Tuhan negku teh, 24“O lemulun, mada' nelun Israil, kudeng ini bala Tuhan: Muyuh mepad kudeng aceh bawang luk na inan udan idi luk na linigan, luk miak kumin ku usehKu. 25Lun rayehdeh mepad kudeng balang luk ngeku ku pung luk pinatédeh. Ideh ngaté lemulun idi ngaro amung usin idi binaweh luk miak lapendeh, pad ideh inan mula' decur tinula'. 26#Uk 10.10 Imam-imam ngelaba ukumKu, idi na ngerawé luk meligan. Ideh na ngiti arang luk meligan idi luk na meligan, idi ideh na maya' ukum ratnan Aco luk inan Mudeng. Ngaceku ineh lun Israil na ngerayeh Negku. 27Lun luk ngimet mepad kudeng bungalé luk ngeramit pung luk pinatédeh. Ideh ngaté lemulun pad mangun ku lun do'. 28Nabi-nabi pangeh nengalum sala'deh mepad kudeng lemulun nat alad ku sat luk mebuda'. Luk sirendeh na matu idi luk beléndeh pana' mebalih. Kebaladeh, ideh mada' bala Tuhan Allah, iamo' Ui ini Tuhan na nepebala nedeh. 29Lun do' naluk idi mano. Ideh ngedereh nelun masi' idi muyok nelun pupu baken. 30Ui nenakap lemulun luk miak mudut aceh libung, idi luk miak tuped su luk inusag, pad matar bawang kareb ieh uen ngusag ku usehKu, iamo' nateh luk nekali'Ku. 31Ngaceku ineh Ui ngukum nedeh ku usehKu, idi ngeseb nedeh mepad kudeng apui ngaceku amung kekamendeh.” Tuhan Allah pangeh nepebala.
Currently Selected:
YEHISKIEL 22: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
