2 KORINTUS 10

Paulus Ngegala' Ratnan Kekamenneh Matu

1Ui ini, Paulus sebuleng, ngubuk nemuyuh dengan mebeneh niat idi éi' Keristus. Ui mebeneh niat pa kiung muyuh, iamo' kareb ui mado rat nemuyuh ui mekuu'. 2Ui mutuh ini, pad kareb ui macing na ui uen ngesaad ngegala' kuu'ku, ngaceku ui kali' ui miak ngegala' kuu'ku kuan tuda'-tuda' lemulun luk ngerawé nekai ngakem maya' pinian tana' ini. 3Ngaceku sagan pana' kai mulun maya' ayu tana', idi na kai pebunu' maya ayu tana'. 4Ngaceku ayung pebunu' kai ini baken maya' ayu tana', iamo' maya' lalud Allah pad ngusag libung-libung luk meraben. 5Kai ngelaya' amung-amung saad lemulun, idi amung-amung luk sikal metueh ratnan ileh Allah, idi kai naban anid-anid terawé maya' Keristus. 6Kareb muyuh pangeh nengegala' do' idi baya' muyuh, idi kai temina' ngukum amung kekamen luk ngelaba ukum.

7Muyuh nier luk pa kiung muyuh mo'. Kudeng idé lemulun ngerawé neneh pupu Keristus, nima' neneh ngerawé ratnan bururneh sebuleng, ngaceku kai ini pana' pupu Keristus, mepad kudeng ieh. 8Ngaceku na ui migu', sagan pana' ui pelaba ucet ngedita' bururku ngaceku lalud kai luk biré Tuhan pad ngepicet nemuyuh idi baken ngusag nemuyuh. 9Na ui pian siren kudeng lemulun luk sikal ngatot nemuyuh dengan surat-surat luk biréku ineh. 10Inan luk sikal pebala teh, “Suratneh ineh meberat idi metueh, iamo' ayu bururneh melaya', idi balaneh na ulekneh!” 11Nima' lemulun ineh ngerawé, idi mepad kudeng bala kai bang surat-surat luk biré kareb mado, kudeng ineh teh kekamen kai kareb kai muneng.

12Ngaceku na kai mekuu' semuet bang iap lemulun luk ngubur bururdeh sebuleng, idi maad burur kai dengandeh. Iamo' ideh luk nari bururdeh sebuleng maya' tarideh sebuleng, idi maad bururdeh arangdeh sebuleng mebacé. 13Iamo' kai na sikal ngedita' burur kai dengan na lakan, iamo' maya' lakan luk linakan Allah kuan kai. Idi lakan ineh macing nemuyuh teh. 14Ngaceku na kai nengelaba lakan ineh kareb kai nacing nemuyuh dengan mada' Bala luk Do' ratnan Keristus, ngaceku muyuh bang babpat luk biré Allah kuan kai. 15Idi na kai ngedita' burur kai ratnan kekamen lun baken luk bal lakan luk litep Allah kuan kai. Iamo' kai merapet anu muyuh amé' mula', pad kai miak nganau' kekamen luk meluun rayeh arang muyuh maya' lakan luk litep Allah. 16Idi kai miak mada' Bala luk Do' bang bawang luk mado rat nemuyuh, pad kai na ngedita' burur kai ratnan kekamen luk inau' bang babpat lun baken.

17 # Yer 9.24 Pangeh inayud, “Idé luk ngedita' bururneh, nima' neneh ngedita bururneh ratnan kekamen Tuhan.” 18Ngaceku baken lemulun luk ngubur bururneh sebuleng ineh luk buren Allah, iamo' lemulun luk inubur Tuhan.

Currently Selected:

2 KORINTUS 10: BLD

Highlight

Copy

Compare