2 KORINTUS 9

Bada' Ratnan Nganau' Temina' Luk Barén

1Idi ratnan ngasa' nelun manu déi' Yudia ineh na susa' ui ngayud kuan muyuh. 2Ui kali' muyuh pian ngedengan, idi ui pangeh nengubur nemuyuh pa kiung lun Makedonia, keburi'ku, “Akaya pangeh netemina' maré lak luk nepelaba.” Idi kél muyuh ineh pangeh nengegio niat lun mula' ineh. 3Idi ui ngecuk kinanak-kinanak ineh, pad ideh kali' kai na ngubur nemuyuh mo'-mo'. Iamo' maya' kudeng luk bilaku, muyuh miak temina' ngedengan. 4Kudeng lun Makedonia macing denganku idi kali' nemuyuh nateh temina', kali' rungen kai pelaba igu' (idi muyuh pana' migu') ngaceku kai pangeh merapet nemuyuh. 5Ngaceku ineh ui ngerawé na miak na mutuh kinanak-kinanak ineh amé' nemuyuh atun, idi nganau' temina' atun baré luk muyuh pangeh pejani' ineh, pad megala' ieh baré luk mekatu, baken baré luk sinaad.

6Ngerawé do'-do'! Lemulun luk nibu sesuut, ieh miak ngeranih sesuut teh, idi lemulun luk nibu dengan mela, ieh miak ngeranih dengan mela teh. 7Nima' anid-anid burur maré maya' katu niatneh, aleg dengan dat niat idi mesaad. Ngaceku Allah mawa inan lemulun luk maré dengan mawang niat. 8Idi Allah melalud maré meluun ratnan luk pian muyuh, pad muyuh megéi' inan petap kuan burur muyuh sebuleng, idi mela pana' kuan amung luk petulu denganin. 9#Nani 112.9 Maya' kudeng luk inayud,

“Ieh mekatu maré kuan lun masi';

idi éi'Neh meruked.”

10 # Yes 55.10 Idi Allah luk maré ilung kuan lun luk nibu, idi ruti kuan luk kenen, Ieh ineh teh miak maré idi ngula' tibu muyuh idi ngula' bua'-bua' ratnan katu muyuh. 11Ieh megéi' maré petap kuan muyuh pad muyuh megéi' mekatu, pelé mula' lemulun miak ngubur Allah ngaceku baré luk ilapdeh rat nekai. 12Ngaceku kekamen muyuh ini na maré petap kuan lun manu luk masi' mo', iamo' ieh ngacing mula' ubur kuan Allah. 13Idi ngaceku dalan tanu' katu muyuh ineh, mula' lemulun miak ngerayeh Allah ngaceku muyuh lutep maya' Bala luk Do' ratnan Keristus luk imo muyuh, idi ngaceku muyuh mekatu maré babpat kuandeh idi kuan lun baken pana'. 14Idi ideh miak sembayang kuan muyuh dengan awa ngaceku katu luk rayeh luk ginala' Allah kuan muyuh. 15Ngubur Allah ngaceku katuNeh luk pelaba do'.

Currently Selected:

2 KORINTUS 9: BLD

Highlight

Copy

Compare