2 KORINTUS 11

Paulus Idi Rasul-Rasul Luk Mebalih

1Do' muyuh mulai niat negku sagan pana' ui sesuut bacé. 2Ui merapang ngaceku muyuh, dengan rapang luk ratnan Allah, ngaceku ui pangeh nenuduk nemuyuh dengan seburur deléi, ieh ineh Keristus mepad kudeng seburur anak luk pun mebaruh luk meligan. 3#Pud 3.1–5, 13 Iamo' ui matot idi mepad kudeng menipeh nenaluk Hawa dengan ilehneh, kudeng ineh teh terawé muyuh miak ruen ngeraruh ratnan siri niat idi ligan luk nguyut amé' inan Keristus. 4Ngaceku muyuh ngalap idé-idé luk macing mada' Yésus luk baken, idi luk na bida' kai, idi teh muyuh ngalap roh luk baken ratnan Roh luk pangeh ilap muyuh atun, idi bada' luk baken ratnan Bala luk Do' luk ilap muyuh.

5Ui na ngerawé bururku ini sesuut pana' mebeneh ratnan rasul-rasul luk rayeh ineh. 6Kian ui dat ileh peburi' lek, iamo' ui petap ileh. Kai pangeh nengegala' ini kuan muyuh bang anid-anid kareb idi bang amung-amung luk pangeh mangun pana'.

7Inanké ui mesala' kudeng ui ngebeneh bururku sebuleng, pad muyuh ini miak uen ngedita' ngaceku ui nemada' Bala luk Do' ratnan Allah dengan na tabpar? 8Ui pangeh nengasi' sidang-sidang luk baken, idi nengalap tabpar rat nedeh, pad ui miak ngasa' nemuyuh. 9#Pil 4.15–18 Idi kareb ui netudo dengan muyuh bang asi', na ui mangun ku babeh kuan seburur pana', ngaceku kinanak-kinanak luk macing rat Makedonia nemaré petap kuanku. Kareb idi ui na sikal mangun ku babeh kuan muyuh, idi kudeng ineh teh muci. 10Dengan luk matu ratnan Keristus luk tudo bang bururku, dita'ku ini na miak bebangin bang amung-amung babpat Akaya. 11Ngudeh ui pebala kudeng ini? Kian, ngaceku ui na mawa nemuyuh lek? Allah kali' negku mawa nemuyuh.

12Ui pian nutum luk ruenku nekini, pad ui miak mebpeng nelun rasul-rasul luk baken ineh na ngedita' bururdeh idi pebala kekamendeh ineh mepad kudeng kekamen kai. 13Lemulun ineh baken rasul luk matu. Ideh ineh rasul-rasul luk mebalih. Ideh mebalih ratnan kekamendeh, idi siayu pad ideh siren lun mepad kudeng rasul-rasul Keristus luk matu. 14Iamo' na ui mawa ratnan ineh, ngaceku Sétan sebuleng pana' miak ngisu' ayuneh, pad ieh siren mepad kudeng melaikat acang. 15Idi ineh baken kekamen luk inan mawa kudeng amung demulun Sétan ngisu' ayudeh pad ideh siren mepad kudeng demulun luk matu; idi kekipedneh ideh uen ngua' maya' kekamendeh sebuleng.

Dereh Rasul Paulus Bang Kekamenneh

16Ui pebala sekua' teh, aleg seburur pana' ngerawé negku ini mebacé. Iamo' kudeng muyuh ngerawé kudeng ineh, do' muyuh ngalap negku mepad kudeng selemulun luk mebacé, pad ui pana' miak medita' niat sesuut. 17Luk belénku nekini na ui mala maya' ecuk Tuhan, iamo' kudeng ayu lemulun luk mebacé luk mekuu' ngedita' bururneh; 18ngaceku mula' lemulun ngedita' bururdeh maya' terawé lemulun, idi ui pana' sikal ngedita' bururku. 19Muyuh mulai niat pa kiung lemulun luk mebacé. Bang terawé muyuh, muyuh ineh mileh. 20Muyuh mulai niat nelun luk nganau' nemuyuh mangun ku demulun, kian luk muyok nemuyuh, luk naluk nemuyuh, luk ngebeneh nemuyuh, idi luk mepag nemuyuh. 21Idi ui pelaba igu' mala ini, iamo' kai pelaba laya', pad na miak nganau' kudeng ineh.

Iamo' kudeng lemulun mekuu' ngedita' bururneh ratnan anun-anun, ui pebala mepad kudeng lun luk mebacé—ui pana' mekuu' teh. 22Ideh lun Iberaniké? Ui pana' kudeng ineh teh. Ideh lun Israilké? Ui pana' kudeng ineh teh. Ideh inul Ibrahimké? Ui pana' kudeng ineh teh. 23#Kek 16.23 Ideh demulun Keristuské? Ui pebala kudeng lemulun luk meruden—ui teh demulun luk meluun do! Ui luk meluun géi' ngakem. Ui luk megéi' tinutup. Ui luk megéi' bibpet. Megéi' ui lélé maté. 24#Bad 25.3 Ui pangeh bibpet lun Yahudi limeh kua', anid-aniddeh mabpet negku teluh ngepulu' iwa' bang sekua'. 25#Kek 16.22; Kek 14.19 Ui bibal lun Rum teluh kua', sekua' ui binitung ku batu, teluh kua' ui mekarem, tebaco kedangan ui nanud bang abpa' rayeh. 26#Kek 9.23; Kek 14.5 Megéi' kua' ui nenalan bang tuda'-tuda' dereh ratnan ereb, bang tuda'-tuda' dereh ratnan lun mano, bang tuda'-tuda' dereh ratnan pupuku lun Yahudi, bang tuda'-tuda' dereh ratnan pupu baken, bang tuda'-tuda' dereh bang bawang, bang tuda'-tuda' dereh déi' su luk ali-ali, bang tuda'-tuda' dereh bang abpa' rayeh, bang tuda'-tuda' dereh arang kinanak-kinanak luk naluk. 27Ui merur bang kekamen luk meberat. Megéi' ui na rudap. Megéi' ui melau idi meparing. Megéi' ui na petap akan idi ayung, idi na luk inan rudap. 28Idi teh, baken ratnan amung-amung dereh ineh anid-anid aco, ui merapang ratnan ulun amung-amung sidang. 29Kudeng selemulun melaya', ui teh melaya'. Kudeng selemulun mebpeh bang sala', ui pelaba susa' niat.

30Kudeng ui sikal ngedita' bururku, meluun do' ui ngedita' bururku ratnan laya'ku. 31Idi Allah, ieh ineh Taman Tuhan Yésus luk buren ruked-ruked, kali' negku na mebalih. 32Kareb ui déi' Damsik lun luk ngimet luk pa beneh Aritas ineh nengecuk lun matar bawang ngakem negku. 33Iamo' ui inurur déi' liang bang aceh buan maya' tabuk alad bawang. Kudeng ineh ui nepuit rat bang paladneh.

Currently Selected:

2 KORINTUS 11: BLD

Highlight

Copy

Compare