1 KORINTUS 15
15
Tui Keristus
1Idi nekini, O kinanak-kinanakku, ui pian ngelio kuan muyuh ratnan Bala luk Do' luk bida'ku atun. Muyuh pangeh nengalap ineh. Idi nekini anu muyuh mepicet ngaceku Bala luk Do' ineh. 2Idi ratnan Bala luk Do' ineh teh muyuh ngalap ulun luk meruked, kudeng muyuh ngimet bala luk bida'ku ineh meraben. Iamo' kudeng anu muyuh ineh mo'-mo' na miak.
3 #
Yes 53.5–12
Ui nengacing kuan muyuh luk pangeh ilapku, ieh ineh luk meluun do': ratnan Keristus ineh naté ngaceku sala' tau petulu dengan bala Surat Allah, 4#Nani 16.8–10; Mat 12.40; Kek 2.24–32 idi Ieh pangeh tinanem, idi kareb aco luk keteluh Ieh pangeh tinui petulu dengan bala Surat Allah, 5#Luk 24.34; Mat 28.16–17; Mrk 16.14; Luk 24.36; Yah 20.19 idi Ieh pangeh nesilagan kuan Pétrus, idi muci kuan pulu' dueh burur rasul ineh. 6Muci ratnan ineh, Ieh nesilagan teh kuan mela limeh ngeratu kinanak-kinanak bang sekua', idi lélé amung-amungdeh ineh mulun macing nekini, iamo' sebuangdeh pangeh naté. 7Idi Ieh nesilagan kuan Yakub, idi muci teh kuan amung-amung rasul.
8 #
Kek 9.3–6
Idi kekipedneh Ieh nesilagan kuanku teh, mepad kudeng anak luk muci tinganak. 9#Kek 8.3 Ui ini luk meluun dat rat arang amung-amung lun rasul ineh, pad ui na mayu tetanen ku rasul, ngaceku ui pangeh nengedereh sidang Allah. 10Iamo' ngaceku ratnan katu Allah ui pangeh misu', pad ulunku mepad kudeng luk bang kareb ini, idi katu luk biréNeh negku na mo'-mo'. Iamo' ui luk meluun géi' ratnan amung-amungdeh, iamo' baken ui, iamo' katu Allah luk ngedengan negku. 11Ngaceku ineh, do' ui idi ideh pana' mada' Bala luk Do' ineh, luk inan muyuh pangeh manu.
Tui Tau
12Kudeng kai mada' ratnan Keristus pangeh tinui rat arang lun naté, kudeng apehké sebuang muyuh pebala na luk idi tui ratnan até? 13Kudeng ini matu, ilungneh Keristus nateh tinui. 14Idi kudeng Keristus nateh tinui, bada' kai ini mo'-mo', idi anu muyuh pana' mo'-mo' teh. 15Meluun teh megala' kai mebalih pa kiung Allah, ngaceku kai nemada' ratnan Allah nenui Keristus ratnan até. Iamo' setuneh nateh Ieh tinuiNeh, kudeng matu lun naté na miak tuyen. 16Ngaceku kudeng lun naté na miak tuyen, Keristus pana' nateh tinui teh. 17Idi kudeng Keristus na tinui, anu muyuh mo'-mo' peh, idi teh muyuh lakat meraruh bang sala' muyuh. 18Idi teh ilungneh, lun manu luk pangeh naté bang Keristus ineh pana' na ngalap ulun. 19Kudeng bang ulun ini mo' tau merapet inan Keristus, tau meluun susa' ratnan amung lemulun bang tana' ini.
20Iamo' matu Keristus pangeh tinui rat arang lun naté, mangun ku bua' luk atun rat arang amung-amung lemulun luk pangeh naté. 21Ngaceku mepad kudeng até ineh pangeh icing ratnan seburur lemulun, kudeng ineh teh tui ratnan até icing ratnan seburur lemulun. 22Ngaceku mepad kudeng bang Adam amung-amung lemulun maté, kudeng ineh teh bang Keristus amung-amungdeh miak mulun. 23Iamo' anid-anid maya' karebneh sebuleng; idi bua' luk atun, Ieh ineh Keristus, idi muci amung-amung pupu Keristus kareb acingNeh luk kedueh kua'. 24Idi muci teh macing kekipedneh, ieh ineh kareb Keristus maré Imet ineh kuan Allah Taman, kareb Ieh pangeh nengusag luk ngimet, idi luk inan lalud, idi tueh luk ratnan roh luk baken. 25#Nani 110.1 Ngaceku na miak na Keristus mangun ku raca', pad Allah ngebeneh amung-amung bunu'Neh pa liang kukudNeh. 26Idi bunu' luk kekiped tu-tu luk uenNeh ngusag, ieh ineh até. 27#Nani 8.6 Ngaceku pangeh inayud bang Surat Allah, “Luk amung-amung pangeh rireng pa liang kukud Keristus.” Iamo' megala' idi baken Allah sinuet dengan “luk amung-amung” ineh, ngaceku Allah luk ngebeneh luk amung-amung ineh pa liang Keristus. 28Kareb luk amung-amung pangeh inau' pa liang imet Keristus ineh, idi Anak ineh pana' sikal ngebeneh bururNeh kuan Allah luk ngebeneh luk amung-amung kuanNeh, pad Allah miak mangun ku amung-amung bang luk amung-amung.
29Kudeng na pieh kudeng ineh, anunké punneh sebuang lemulun sikal rerebpen ngaceku lun naté? Kudeng lun naté na tupu tinui, anunké punneh sebuang lemulun pangeh rireb ngaceku lun naté ineh? 30Ngudehké tau ini pana' mekaneh dereh anid-anid kareb? 31O kinanak-kinanakku, anid-anid aco ui matun até, idi ui ngamo kudeng ini, ngaceku awang niatku nemuyuh bang ulun tau bang Keristus Yésus Tuhan tau. 32#Yes 22.13 Anunké ulekneh kuanku kudeng ui dengan terawé lemulun mo' pangeh pekakem dengan pung luk meliput déi' Epesus? Kudeng lun naté na tuyen, “Do' tau kuman idi ngirup, ngaceku nebpa tau maté.”
33Aleg muyuh uen naluk, ngaceku “Rurum luk dat ngusag kekamen luk do'.” 34Do' muyuh kulat dengan matu idi aleg nganau' sala'; ngaceku inan tuda'-tuda' lemulun luk na ngiti Allah. Ui mala ini, pad muyuh kali' migu'.
Ratnan Tui Lun Naté
35Inan luk pebala, “Kudeng apehké lun naté miak tuyen? Idi kudeng apehké ayu burur lemulun luk tuyen ineh?” 36O lun mebacé! Kareb muyuh nibu ilung bang tana', na ieh miak mulun kudeng ieh na maté. 37Idi luk tinibu bang tana' ineh, ieh ineh ilung luk inukak, kian dalé idi luk baken-baken lek, iamo' baken amung lawa luk miak mulun muci. 38Iamo' Allah maré kuanneh aceh burur maya' pianNeh, idi kuan raput-raput ilung bururneh sebuleng.
39Idi baken amung-amung luk mulun ineh mepad ayu, iamo' lemulun baken, idi pung-pung baken, suit-suit baken, idi lawid pana' baken teh.
40Inan teh tuda'-tuda' luk pinudut bang langit, idi tuda'-tuda' luk pinudut bang tana'; iamo' acang luk pinudut bang langit ineh baken, idi acang luk pinudut bang tana' ineh baken teh. 41Acang aco baken, acang bulan baken, idi acang gituen baken; ngaceku ratnan acangneh, sebuleng gituen baken ratnan gituen baken.
42Kudeng ineh teh tui lun naté, ieh ineh tinamen idi melu, idi tuyen pad na miak melu; 43tinamen dengan dat, tuyen dengan do'; tinamen dengan laya', tuyen dengan tueh; 44tinamen burur tana' ini, tuyen burur ratnan Roh. Kudeng inan burur tana' ini, inan teh burur ratnan Roh. 45#Pud 2.7 Ngaceku pangeh inayud, “Idi lemulun luk pun-pun, ieh ineh Adam, mangun ku seburur luk mulun.” Idi Adam luk kekiped ineh mangun ku Roh luk ngulun. 46Iamo' baken luk ratnan Roh mangun pun-pun, iamo' luk ratnan tana', idi luk ratnan Roh ineh muci. 47Adam luk atun ineh inau' ratnan tana', idi ieh nacing ratnan tana'; Adam luk kedueh ineh nacing rat surga. 48Lemulun luk ratnan tana' ini mepad kudeng lemulun luk inau' ratnan tana'. Idi lemulun luk rat surga ineh, mepad kudeng Ieh luk macing rat surga. 49Idi mepad kudeng tau ngayung ku ayuneh luk ratnan tana' ini, kudeng ineh teh tau miak ngayung ku ayuNeh luk rat surga ineh.
50Ini ilung balaku, O kinanak-kinanakku: uang idi dara' na miak ngalap babpat bang Imet Allah. Idi luk pinudut luk miak merapuk na miak ngalap babpat bang luk pinudut luk na miak merapuk.
51 #
1 Tes 4.15–17
Ngerawé do'-do' ratnan luk inalum ini: baken amung-amung tau ini miak maté, amung-amung tau miak uen ngisu', 52bang selinggageh, bang sekacep mateh kareb muni serupit luk kekiped. Ngaceku serupit miak muni, idi amung-amung lun naté miak tuyen, dengan luk pinudut luk na miak melu, idi tau ini miak uen ngisu'. 53Ngaceku na miak na luk pinudut luk miak melu ini ngayung ku luk pinudut luk na miak melu, idi luk miak maté ini na miak na ngayung ku luk na miak maté. 54#Yes 25.8 Iamo' kareb luk pinudut luk miak melu ini pangeh nengayung ku luk pinudut luk na miak melu, idi luk miak maté ini pangeh nengayung ku luk na miak maté, pangeh ineh miak macing bala luk pangeh inayud ini: “Idi até pangeh tilen ratnan tueh.”
55 #
Hos 13.14
“O até, iapehké tuehmu?
O até, iapehké galihmu?”
56Galih até, ieh ineh sala', idi lalud sala', ieh ineh Ukum. 57Iamo' ngubur Allah, luk maré netau metueh ngaceku ratnan Tuhan tau Yésus Keristus.
58Ngaceku ineh, O kinanak-kinanakku luk inanku mawa, do' muyuh lutep dengan na sigio, idi megéi' bang kekamen Tuhan, ngaceku muyuh kali' idi kél muyuh na mo'-mo' bang Tuhan.
Currently Selected:
1 KORINTUS 15: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
