1 KORINTUS 14

Bada' Ratnan Makai Baré Roh

1Nakap muyuh awa ineh; idi geregan ku baré luk ratnan Roh, iamo' meluun teh pad muyuh miak mada' luk biré Allah. 2Ngaceku lemulun luk pebala dengan buri' luk ratnan Roh, baken pebala kuan lemulun, iamo' kuan Allah, ngaceku seburur pana nateh luk kali' ilungneh, iamo' dengan lalud Roh ieh mala luk inalum. 3Iamo' lemulun luk mada' luk biré Allah ineh, ngacing kuan lemulun bala luk ngubuk, ngeletep, idi ngepicet anu. 4Lemulun luk pebala dengan buri' luk ratnan Roh ineh ngepicet anuneh sebuleng, iamo' lemulun luk mada' luk biré Allah ineh ngepicet anu sidang.

5Ui pian kudeng amung muyuh pebala dengan buri' luk ratnan Roh, iamo' meluun teh kudeng muyuh mada' luk biré Allah. Ngaceku lemulun luk mada' luk biré Allah ineh meluun rayeh ratnan lemulun luk pebala dengan buri' luk ratnan Roh, kudeng na lemulun bang sidang ineh luk miak ngelio ilung buri' ineh, pad sidang ineh uen ngepicet. 6O kinanak-kinanakku, kudeng ui macing nemuyuh idi pebala dengan buri' luk ratnan Roh, anunké ulekneh? Na luk idi anun-anun, kudeng ui na ngacing kuan muyuh bala luk linio, kian ileh lek, kian bada' luk biré Allah lek, kian bada' lek.

7Sagan pana' anun-anun luk na niat, iamo' luk muni, do' suling kian giula' Iek, kudeng unineh mepad, kudeng apehké miak kali' sapeh uni suling, idi sapeh uni giula' ineh? 8Idi kudeng uni tawak na megala', idéké miak temina' amé' pebunu'? 9Kudeng ineh teh, idéké kali' ilung buri' muyuh ineh, kudeng bala muyuh na megala', ngaceku muyuh pebala dengan buri' luk ratnan Roh? Bala muyuh ineh metutu' arang gawa'. 10Bang tana' ini inan raput-raput buri', idi sebuleng pana' nateh luk na ilung. 11Kudeng ui na kali' ilung buri' ineh, idi ui mangun ku lun pupu baken kuan lemulun luk makai ineh, idi lemulun luk makai ineh mangun ku lun pupu baken kuanku. 12Ngaceku muyuh metueh nakap baré luk ratnan Roh, do' muyuh nutun nakap baré luk ngepicet anu sidang.

13Ngaceku ineh, do' lemulun luk pebala dengan buri' luk ratnan Roh ineh sembayang pad ieh miak ngegala' ilung buri' ineh. 14Ngaceku kudeng ui sembayang dengan buri' luk ratnan Roh, idi rohku sembayang iamo' terawéku na maya' sembayang ineh. 15Anunké luk ruenku? Ui miak sembayang dengan rohku, idi teh ui miak sembayang dengan terawéku. Ui miak menani dengan rohku, idi teh ui miak menani dengan terawéku. 16Kareb iko maré ubur dengan roh, kudeng apehké lemulun luk na baré ineh miak pebala “Amin” ratnan bala uburmu, ngaceku ieh na kali' ilung anun luk bilamu. 17Sagan pana' iko ini maré ubur dengan matu, iamo' anu lun baken na pinicetmu.

18Ui ngubur Allah, ngaceku ui sebuleng pebala dengan buri' luk ratnan Roh meluun ratnan amung-amung muyuh. 19Iamo' bang tebubpun ui meluun pian mala limeh bila' bala dengan terawéku, pad ui mada' nelun baken, ratnan pulu' ngeribu bila' bala dengan buri' luk ratnan Roh ineh.

20O kinanak-kinanakku, aleg muyuh mepad kudeng anak-anak bang terawé muyuh, iamo' bang luk dat miak muyuh mangun ku anak-anak; iamo' bang terawé muyuh ineh do' muyuh mangun ku lun merar. 21#Yes 28.11–12 Idi bang Surat Allah pangeh inayud,

“Kebala Tuhan, Ui sikal pebala kuan pupu ini

dengan tang lemulun luk baken buri',

idi bibir lun pupu baken.

Sagan pana' kudeng ineh, idi nateh ideh sikal ninger balaKu.”

22Ngaceku ineh baré buri' luk ratnan Roh ineh mangun ku aceh tanu', baken kuan lun manu, iamo' kuan lun luk na manu, iamo' baré mada' luk biré Allah ineh mangun ku tanu' kuan lun manu, baken kuan lun luk na manu.

23Ngaceku ineh, kudeng amung sidang ineh tebubpun, idi amung-amung lun sidang pebala dengan buri' luk ratnan Roh, idi lun baken idi lun luk na manu semuet, naké ideh ngerawé nemuyuh meruden? 24Iamo' kudeng amung muyuh uned mada' luk biré Allah, idi lun luk na manu idi lun baken semuet, idi lemulun ineh miak ninger bada'deh, idi ngerawe sala'neh. Idi ieh miak kumin maya' luk pindengerneh ineh. 25Terawéneh luk inalum bang niatneh miak uen ngegala', pad ieh sikal tekeradung sembayang inan Allah dengan ngamo, “Matu-matu Allah idi arang muyuh!”

Adat Bang Ruma' Sembayang

26Ngaceku ineh, O kinanak-kinanakku, kareb muyuh tebubpun, do' muyuh temina' menani, mada', maré aceh bala luk linio, idi do' temina' makai buri' luk ratnan Roh, idi temina' ngelio ilungneh. Iamo' petulu amung baré ineh ngepicet anu lun sidang. 27Kudeng selemulun pebala dengan buri' luk ratnan Roh, nima' dueh burur, na miak mela ratnan teluh burur, iamo' seburur pesua seburur; idi nima' selemulun mada' ilung bala ineh. 28Iamo' kudeng na lemulun luk miak ngelio ineh, nima' neneh ungeng bang tebubpun, idi pebala bang niatneh sebuleng idi inan Allah. 29Nima' dueh teluh burur lemulun luk mada' lu biré Allah ineh pebala, idi lun baken ineh ngiti baladeh. 30Iamo' kudeng inan luk linio Allah kuan seburur luk bang tebubpun ineh, do' lemulun luk uned pebala ineh pirud. 31Amung-amung muyuh miak pesua mada' luk biré Allah, pad amung lun sidang sibada' idi buken. 32Petulu baré mada' luk biré Allah bang imet lun luk mada' ineh, 33ngaceku baken pian Allah tau ngegau tebubpun, iamo' pad tau lutep.

Mepad kudeng bang amung-amung sidang pupu Allah, 34do' decur-decur pirud bang tebubpun. Na ideh uen nima' pebala, iamo' do' ideh mebeneh, maya' kudeng bala Ukum Yahudi teh. 35Kudeng ideh sikal sibada' anun-anun, nima' nedeh ngitun ratnan awandeh sebuleng déi' ruma', ngaceku na petulu decur-decur pebala bang sidang ineh.

36Inanké muyuh ngerawé muyuh lawa bala Allah? Idi kuan muyuh sebulengké bala ini pangeh icing? 37Kudeng idé-idé ngerawé bururneh nabi idi lemulun luk inan Roh, do' ieh kali' inayudku kuan muyuh ineh ukum Tuhan. 38Iamo' kudeng ieh na sikal maya' ineh, aleg muyuh ninger balaneh.

39Ngaceku ineh, O kinanak-kinanakku, do' mekél nakap baré mada' luk biré Allah ineh, idi aleg mebpeng lemulun na pebala dengan buri' luk ratnan Roh. 40Iamo' amung-amung ini na miak na ruen dengan matu maya' aturneh.

Currently Selected:

1 KORINTUS 14: BLD

Highlight

Copy

Compare