1 KORINTUS 16
16
Ratnan Ngamung Usin Kuan Lun Manu Luk Déi' Yerusalim
1 #
Rum 15.25–26
Ratnan ngamung usin kuan lun manu déi' Yudia, do' muyuh maya' kudeng luk pangeh icukku kuan amung-amung sidang déi' Galatia. 2Anid-anid Aco luk inan Mudeng, do' amung-amung muyuh nganug usin bang ruma'neh sebuleng maya' kinula'neh, pad kareb ui macing na muyuh ngamung usin. 3Kareb ui macing, idi ui miak ngecuk idé-idé luk uen muyuh ngamo dengan surat pad ideh nguit luk biré muyuh ineh amé' Yerusalim. 4Idi kudeng petulu ui amé' teh, miak ideh maya' negku.
Ratnan Lawé Paulus
5 #
Kek 19.21
Ui sikal macing nemuyuh, kareb ui pangeh nengikak bawang Makedonia, ngaceku ui sikal amé' déi' Makedonia atun. 6Ui miak tudo mio sesuut dengan muyuh, kian, tudo kareb meteneb lek, pad muyuh miak nated negku iapeh-iapeh luk ui sikal amé'. 7Iamo sekua' ini na ui papu' nemuyuh, iamo' ui merapet miak tudo mio sesuut dengan muyuh kudeng Tuhan nima'.
8 #
Uk 23.15–21; Bad 16.9–11 #Kek 19.8–10 Iamo' ui sikal tudo déi' Epesus pad macing Aco Pentakosta, 9ngaceku pangeh inukab kuanku tanga' luk rayeh kuan kekamen luk do' ulek, idi inan mula' luk sikal metueh déi'.
10 #
1 Kor 4.17
Kudeng Timotius macing, nganak neneh, ngaceku ieh nganau' kekamen Tuhan mepad kudeng ui ini teh. 11Ngaceku ineh aleg nima' selemulun ngebeneh neneh. Iamo' do' muyuh nated neneh nalan dengan mawang niat, pad ieh miak lemubed amé' negku, ngaceku ui nganét neneh dengan kinanak-kinanak luk baken ineh.
12Ratnan kinanak tau Apolos, tuda'-tuda' kua' ui nengubuk neneh, pad ieh amé' ngikak nemuyuh dengan kinanak-kinanak ineh. Idi na ieh ngamo amé' nekini, iamo' ieh sikal macing kudeng tanga' kabin kuanneh.
Kekiped Bala Paulus
13Kekipedneh, matar do'-do', idi tuped meraben bang anu muyuh. Do' muyuh mekuu' idi metueh. 14Nima' amung-amung kekamen muyuh ruen dengan awa.
15 #
1 Kor 1.16
Muyuh kali' ratnan Stepanus idi tetek ruma'neh. Ideh luk pun-pun manu inan Yésus déi' Akaya, idi ideh pangeh nemaré bururdeh pad ngasa' nelun manu. O kinanak-kinanakku, ui mutuh nemuyuh, 16maya' kuyut lemulun luk kudeng ineh idi anid-anid lemulun luk pad-pad ngakem dengandeh.
17Ui mawang niat ratnan acing Stepanus, Portunatus, idi Akaikus, ngaceku ideh pangeh nengelibal nemuyuh. 18Ideh pangeh nengawang niatku idi niat muyuh pana'. Lemulun luk kudeng ineh petulu uen muyuh ngerayeh.
19 #
Kek 18.2
Amung-amung sidang déi' Asia maré tabi' kuan muyu. Akila idi Priskila dengan sidang luk tebubpun bang ruma' didueh maré tabi' nemuyuh bang Tuhan. 20Amung-amung kinanak luk tungé' maré tabi' kuan muyuh.
Do' muyuh petabi' seburur dengan seburur dengan pebuen luk meligan.
21Ui ngayud ini dengan ticu'ku sebuleng: Tabi' rat negku, Paulus.
22Kudeng idé lemulun luk na mawa inan Tuhan ineh, nima' neneh uen ngediman.
Maranata! (ilungneh, O Tuhan, amé' dengan mesaget!)
23Idi katu Tuhan tau Yésus Keristus ineh ngedengan nemuyuh.
24Idi awaku ngedengan nemuyuh anid-anid burur bang Keristus Yésus. Amin!
Currently Selected:
1 KORINTUS 16: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
