1 KORINTUS 13

Awa: Baré Luk Meluun Rayeh

1Kudeng ui pebala dengan tuda'-tuda' buri' lemulun idi melaikat pana', iamo' ui na mawa, kali' rungen ui pangeh mangun kudeng aceh tawak luk muni, idi karing luk ngekéng. 2#Mat 17.20; 21.21; Mrk 11.23 Kudeng ui inan baré mada' luk biré Allah, idi ui inan ileh idi kali' amung-amung luk inalum, idi kudeng ui inan anu luk meriput, pad ui miak mubuh pegkung pana', iamo' kudeng ui na mawa, kali' rungen ui pana' na ulek. 3Kudeng ui maré binawehku nelun masi', idi maré bururku sabpen pana', iamo' kudeng ui na mawa, nateh ulekneh kuanku.

4Awa ineh mulai niat idi méi'; awa ineh na temaruh; na ngedita' bururneh sebuleng, na mesido' niat. 5Awa ineh na nganau' luk na petulu; na nakap luk kuan bururneh sebuleng; na megateh niat; na ngerawé sala' dulun. 6Awa ineh na mawang niat ngaceku ratnan luk dat, iamo' mawang niat ngaceku ratnan luk matu. 7Awa ineh tuman ratnan luk amung-amung, anuneh, rapetneh, idi ulai niatneh tuman macing ruked-ruked.

8Awa ineh meruked peh; baré mada' luk biré Allah segageh mo', baré buri' luk ratnan Roh miak milep, idi ileh pana' miak ugka'. 9Ngaceku ileh idi bada' luk biré Allah kuan tau na meriput. 10Iamo' kareb luk meriput ineh macing, idi luk na meriput ineh miak metutu'.

11Kareb ui anak isuut, ui pebala, idi kali', idi ngerawé mepad kudeng anak isuut. Nekini ui pangeh rayeh, idi ui necan amung-amung kekamen anak isuut. 12Ngaceku nekini tau nier bang sayun dengan meseraber, iamo' kareb ineh kiung mepapu' dengan kiung. Idi nekini ilehku nateh meriput, iamo' kareb ineh ilehku mangun meriput mepad kudeng ileh Allah ratnan bururku pangeh meriput.

13Idi inan anu, rapet, idi awa, luk teluh ini; iamo' ratnan luk teluh ini luk meluun rayeh, ieh ineh awa.

Currently Selected:

1 KORINTUS 13: BLD

Highlight

Copy

Compare