प्रकाश 9

1तबदोस्र पाँचवाँ स्‍वर्गदूत आपन तुरही फुक्ल त मै आकाशमसे एकठो तोरैँया पृथ्वीम खसल देख्‍नु। उ तोरैँयह अतल कुण्‍डक साँचा देगैल्। 2उ तोरैँया अतल कुण्‍ड ख्‍वालल् ओ बराभारी भट्‌टीमसे धूवाँ निक्रल अस उहिँमसे धूवाँ निक्रल ओ उ धुवँक कारण दिनक ज्‍योति ओ आकाश फे कर्‍या हुइल्।#उत १९:२८ 3उ धुवँमसे धेर सलह पृथ्वीम अइल ओ हुँकन बिच्छीकअस डस्‍ना शक्ति देगैल् रह।#प्रस १०:१२-१५ 4घाँसपात अथवा रूखविरुवह कुछु फे हानि नैकर्ना तर लिल्‍हारिम परमेश्‍वरक मोहर नैलागल मनैन केल सँतैना हुँकन कैगैल् रह।#इज ९:४ 5उ मनैन मुवाडर्ना नाहीँ तर पाँच मैन्‍हासम सताइक लाग सलह अधिकार पैल। ओसिक सताइबेर ऊ मनैन बिच्‍छी डसल अस बठाए। 6उ पाँच मैन्‍हम मनै मुव त खोजहीँ तर मुव नैपैहीँ। हुँक्र मुव चाहलसे फे मृत्‍यु हुँकन्‍हकठेसे भग्‍नेबा।#अयू ३:२१; यर ८:३

7उ सलह लडाइँम जाइक लाग तयार हुइल् घ्‍वारअस देखपरँट्‍। हुँकन्‍हक कपारिम स्‍वानक मुकुटअस कुछ चिज रलहन ओ हुँकन्‍हक अनुहार मनैन्‍हकअस रलहन।#योए २:४ 8हुँकन्‍हक भुत्‍लाजुन जन्‍नीमनैयक भुत्‍लाअस ओ हुँकन्‍हक दाँतजुन सिंहक दाँतअस रलहन।#योए १:६ 9हुँकन्‍हक छातीपाताजुन फलामकअस रलहन ओ हुँकन्‍हक डैनाले निक्राइल आवाजजुन युद्धस्‍थानम धेर घ्‍वार तानल रथक आवाजअस सुनमिल।#योए २:५ 10हुँकन्‍हक पुच्‍छी ओ खिल बिच्छीकअस रलहन, ओ पाँच मैन्‍हासम मनैन पिरोल्‍ना शक्ति हुँकन्‍हक पुछीम रलहन। 11अतल कुण्‍डक दूतजुन हुँकन्‍हक राजा रलहन। हिब्रू भाषम वाकर नाउँ एबाड्डोन ओ ग्रीक भाषम वाकर नाउँ अपोल्‍लियोन हो। याकर अर्थ हो, नाश कर्ना।

12पैल्‍ह विपत्ति बितगैल्। आम्‍ही दुइठो विपत्ति अइना बाँकी बा।

13तबदोस्र छैठवाँ स्‍वर्गदूत आपन तुरही फुक्ल त परमेश्‍वरक आघ रहल स्‍वानक वेदीक चर्‍यौ कोनोमसे आवाज आइल मै सुन्‍नु।#प्रस ३०:१-३ 14उ आवाज छैठवाँ स्‍वर्गदूतह असिक कहल, “यूफ्रेटिस नाउँ रहल बराभारी लद्‍यम बान्‍धल चारठो स्‍वर्गदूतन छोरदेओ।” 15उ चारठो स्‍वर्गदूत छोरगैल, सारा संसारक एक तिहाइ मनैन उह वर्षक उह दिन उहब्‍याला मुवाइक लाग हुँक्र तयार पारगैल् रलह। 16उहाँ बीस करोड घोडचढी फौज बाट कैक मै सुन्‍नु। 17तब म्‍वार यी दर्शनम मै उ घ्‍वार ओ घोडचढीन देख्‍नु। हुँकन्‍हक छातीम लगाइल छातीपाता आगीअस लाल, नीलमणीअस नीलो, गन्‍धकअस हड्‍यार देख्‍नु। घोरोन्‍हक कपार सिंहक कपारअस रलहन ओ हुँकन्‍हक मुहमसे आगी, धूवाँ, ओ गन्‍धक निक्र। 18हुँकन्‍हक मुहमसे आगी, धूवाँ ओ गन्‍धकक् तीन विपत्ति निक्रल रह, उह विपत्ति एक तिहाइ मनैन मुवाइल। 19काकरकि उ घोर्‍वन्‍हक मुह् ओ पुछीम मुवैना शक्ति रलहन। हुँकन्‍हक पुच्‍छी विषालु साँपक कपारअस रलहन ओ मनैन पिर्‍वालक लाग उ पुच्‍छी चलाइँट्।

20यी विपत्तिमसे बाँचल मनै आपन-आपन पापी मन परिवर्तन कैक परमेश्‍वरकठे नैघुम्‍ल। हुँक्र भूतन ओ नैदेख्‍ना, नैसुन्‍ना, हलचल कर नैसेक्‍ना स्‍वान, चाँदी, काँसा, पत्‍थ्रा ओ कट्‍ठोक आपन बनाइल मूर्तिह पूजा कर नैछोर्ल।#भज ११५:४-७; १३५:१५-१७; दान ५:२३ 21हुँक्र हत्‍या कर्ना, टुनामुना कर्ना, व्‍यभिचार कर्ना, चोरी कर्ना काममसे आपन मन परिवर्तन नैकर्ल।

Currently Selected:

प्रकाश 9: thl

Highlight

Copy

Compare