प्रकाश 8
8
सातवाँ मोहर
1पठ्रू सातवाँ मोहर खोल्ल त स्वर्गम आधा घण्टासम सुनसान हुइल्। 2तबदोस्र मै परमेश्वरक आघ ठह्र्याइल रना सातठो स्वर्गदूतन देख्नु। हुँकन सातठो तुरही देगैल् रह। 3धूप बर्ना स्वानक भाँरा ब्वाकल और एकठो स्वर्गदूत आक वेदीठे ठह्रेइल। सिंहासनक आघ रहल स्वानक वेदीम, परमेश्वरक भक्त मनैन्हक प्रार्थनम मिलाक चह्राइक लाग हुँकहीन धेर सुगन्धित धूप देगैल् रह।#आमो ९:१; प्रस ३०:१,३ 4परमेश्वरक आघ ठह्र्याइल स्वर्गदूतक हाँठमसे जर्टिरहल धूपक धूवाँ परमेश्वरक भक्त मनैन्हक प्रार्थनक सँगसँग उप्पर जाइटह। 5तबदोस्र उ स्वर्गदूत धूपौरो लेक उहिँम वेदीक आगी भर्ल ओ पृथ्वीम फाँकदेल त गड्याङ्-गुडुङ आवाज आइल्, बिज्ली चम्कल ओ भुइँचाल गैल्।#लेवी १६:१२; इज १०:२; प्रस १९:१६; प्रका ११:९; १६:१८
सातठो तुरही
6तबदोस्र उ सातठो तुरही रहल सात जन स्वर्गदूत तुरही फुकक् लाग तयार हुइल।
7पैल्ह स्वर्गदूत तुरही फुक्ल त रगत मिलल् पत्थ्रा ओ आगी पृथ्वीम बर्सल। याकर कारण पृथ्वीक एक तिहाइ भाग, जंगलक एक तिहाइ भाग ओ सब काइल घाँस जरगैल्।#प्रस ९:२३-२५; इज ३८:२२
8तबदोस्र द्वासर स्वर्गदूत आपन तुरही फुक्ल त आगी लागल पर्वत्वाअस देखपर्ना चिज समुद्रम फाँक्गैल् ओ समुद्रक एक तिहाइ भाग पूरा रगत होगैल्। 9समुद्रक एक तिहाइ भागक सब जीवित प्राणी मुगैल ओ एक तिहाइ जहाज फे नष्ट होगैल्।
10तबदोस्र तीसर स्वर्गदूत आपन तुरही फुक्ल त आकाशमसे ज्वाँजाअस बर्टिरहल एकठो बराभारी तोरैँया खसल। उ त एक तिहाइ लद्यम ओ पानीक मुहानम खसल।#यशै १४:१२ 11उ तोरैँयक नाउँ “तीत” कैगैल् ओ पानीक एक तिहाइ भागह सब तीत बनादेहल, ओ उ तीत पानी पिलक कारण धेर मनै मुल।#यर ९:५
12तबदोस्र चौथा स्वर्गदूत आपन तुरही फुक्ल त दिन, जोन्ह्या ओ सारा तोरैँयक एक तिहाइ भागम प्रहार हुइल् ओ हुँकन्हक एक तिहाइ ज्योति हेरागैल्। असिक दिन ओ रातक एक तिहाइ भाग अन्धार होगैल्।#यशै १३:१०; इज ३२:७; योए २:१०,३१; ३:१५
13तबदोस्र मै हेर्नु ओ आकाशम उर्टिरहल एकठो बराभारी गरुड असिक कहल मै सुन्नु, “पृथ्वीम बास करुइयन धिक्कार! धिक्कार! धिक्कार! काकरकि बाँकी रहल तीनठो स्वर्गदूत आपन-आपन तुरही फुकहीँ त पृथ्वीम परिअइना विपत् झन् कसिन रही?”
Currently Selected:
प्रकाश 8: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
