प्रकाश 21

लौव आकाश ओ लौव पृथ्‍वी

1तबदोस्र मै लौव आकाश ओ लौव पृथ्‍वी देख्‍नु, काकरकि पैल्‍हक आकाश ओ पैल्‍हक पृथ्‍वी बितरलहा ओ समुद्र बिलारलहा।#यशै ६५:१७; ६६:२२; २ पत्र ३:१३ 2तबदोस्र मै पवित्र सहर, लौव यरूशलेम, स्‍वर्गसे या परमेश्‍वरक लग्‍घसे टर ओल्‍हाइट देख्‍नु। ऊ आपन दुल्‍हक लाग सिङ्‌गारल दुल्‍हीअस रलही।#यशै ५२:१; ६१:१०; प्रका ३:१२ 3सिंहासनमसे एकठो बरा सोर मै असिक कहट्‍ सुन्‍नु, “हेर, परमेश्‍वरक बास मनैनसे होरहल। उहाँ हुँकनसे बास कर्नेबाट, ओ हुँक्र उहाँक प्रजा हुइनेबाट। परमेश्‍वर अपन्‍हे हुँकन्‍हक परमेश्‍वर होक हुँकन्‍हकसँग रनेबाट।#इज ३७:२७; लेवी २६:११-१२ 4हुँकन्‍हक आँखिक सब आँस उहाँ पोँछदेहुइयाबाट। आबठेसे कौनोजहन मुव नैपरहीन। कौनोजहन शोक ओ दुःख मान नैपरहीन। काकरकि पैल्‍हक सब बात बितगैल्।”#यशै २५:८; ३५:१०; ६५:१९

5तब सिंहासनम विराजमान रहुइया परमेश्‍वर महीह असिक कल, “हेरो! आब मै सब बात लौव बनुइयाबाटुँ।” उहाँ असिक फे कल, “यी लिखो, यी बात विश्‍वासयोग्य ओ सत्‍य बा।” 6उहाँ महीह फेदोस्र कल, “आब सब काम पूरा होस्‍याकल। अल्‍फा ओ ओमेगा, शुरू ओ अन्‍तिम मैहे हुइटुँ।#२१:६ “अल्‍फा” कलक ग्रीक भाषक बाह्रखरीक सुरुक अक्षर हो ओ “ओमेगा” जुन अन्‍तिम अक्षर हो। जे पियासल रही ओहीह मै जीवनक मुलमसे बिना म्‍वालक पिय देहुइयाबाटुँ।#यशै ५५:१ 7जे जिती ऊ यी सब अधिकार पउइया बा, मै वाकर परमेश्‍वर हुइबुँ ओ ऊ म्‍वार छावा हुइनेबा।#२ शमू ७:१४; भज ८९:२६-२७ 8तर डरप्‍वाँकहुँक्र, धोखेवाजहुँक्र, घिनलग्‍टिक काम करुइयन, ज्‍यानमाराहुँक्र, व्‍यभिचारीहुँक्र, मन्‍त्रतन्‍त्र करुइयन, मूर्तिपूजा करुइयन ओ झूट बोलुइयन यी सबजन आगी ओ गन्‍धक दन्‍कना कुण्‍डम फँक्‍वापैहीँ। यी द्वासर मृत्‍यु हो।”

लौव यरूशलेम

9तब उ सात अन्‍तिम विपत्तिले भरल सातठो खोर्‍या रहल सात स्‍वर्गदूतहुँक्रमध्‍ये एक जन आक महीह असिक कल, “आओ, मै टुँहीन पठ्‌रूक गोसिन्या, उहाँक दुल्‍ही देखाइटुँ।” 10तबदोस्र मै पवित्र आत्‍मले भरिपूर्ण हुइनु ओ स्‍वर्गदूत महीह ढ्‍याङ पर्वत्‍वम लैगैल। स्‍वर्गदूत महीह परमेश्‍वरकठेसे टर ओल्‍हैटीरहल पवित्र सहर यरूशलेम देखैल।#इज ४०:२ 11उ सहर परमेश्‍वरक महिमले चम्‍कटह। वाकर चमक एकठो बहुमूल्‍य मोतीकअस रह। यी निखार हिरामोती अस रह। 12वाकर चारिओर भारीनक ओ ढ्‍याङ पर्खालले घ्‍यारल रह। पर्खालक बाह्रठो गेट रह ओ हरेक गेटम एक-एकठो स्‍वर्गदूत लागलरह। उ गेटम इस्राएलक बाह्र कुलक नाउँ लिख्‍गैल् रलहन।#इज ४८:३०-३५ 13पूरुबओर तीनठो, उत्तरओर तीनठो, दखिनओर तीनठो ओ पश्‍छिउँओर तीनठो गेट रह। 14सहरक पर्खालक बाह्रठो जग रह ओ उहिँम पठ्‌रूक बाह्र जन प्रेरितन्‍हक नाउँ लिख्‍गैल् रह।

15महीसे बोल्‍ना स्‍वर्गदूतक हाँठम उ सहर, वाकर गेट, ओ पर्खाल नापक लाग एकठो स्‍वानक नप्‍ना लट्‍ठी रलहन।#इज ४०:३ 16उ सहर चार ओरसे लम्‍बाइ ओ चौडाइ बराबर रह। स्‍वर्गदूत डण्‍डीले नापबेर उ सहर दुइ हजार दुइ सय किलोमिटर रह। वाकर लम्‍बाइ, चौडाइ ओ उचाइ बराबर रह। 17स्‍वर्गदूत उ सहरक पर्खालक मोटाइ फे नप्‍ल ओ मनैन्‍हक चलाइल नापअनुसार साठी मिटर हुइल्। 18उ पर्खाल चमकदार पत्‍थ्रले बनल रह ओ सहर निखार स्‍वानले बनल रह ओ सफा सिसाअस चम्‍कना रह।#यशै ५४:११-१२ 19पर्खालक जग अनेक किसिमक बहुमूल्‍य पत्‍थ्रले सिङ्‌गारल रह। पहिल जग चमकदार पत्‍थ्रक, द्वासर नीरक, तीसर हरितमणिक, चौथा पन्‍नक, 20पाँचवाँ आनिक्‍सक, छैठवाँ लालमणिक, सातवाँ पितमणिक, आठवाँ बेरूजक, नववाँ पुष्‍पराजक, दशवाँ लसुनेक, ग्यारवाँ निलमणिक ओ बाह्रवाँ कटेलक रह। 21उ बाह्रठो गेट बाह्रठो मोतीले बनल रह। हरेक गेट एक-एकठो मोतीले बनल रह। वाकर सडक चह्‍कार सिसाअस निखुर स्‍वानक रह।

22मै उ सहरम कौनो मन्‍दिर नैदेख्‍नु, काकरकि सर्वशक्तिमान परमेश्‍वर ओ पठ्‌रू जो मन्‍दिर हुइट।

23उ सहर अजरार बनैना सूर्य ओ जोन्‍ह्‍यक आवश्‍यक नैहो, काकरकि परमेश्‍वरक महिमा उहाँ चम्‍कठा ओ पठ्‌रू जो वाकर दिया हुइट।#यशै ६०:१९-२० 24संसारक सब मनै उहाँक अजरारम नेङ्‌गुइयाबाट ओ सबओरिक राजाहुँक्र आपन धन, मानसम्‍मान उहँ अनुइयाबाट।#यशै ६०:३ 25उ सहरक गेट कबु बन्‍द नैहुई, काकरकि उहाँ कबु फे रात नैहुइनेहो।#यशै ६०:११ 26सब जातिक मनै उहाँ आपन मानसम्‍मान ओ धनदौलत अन्‍नेबाट। 27तर कौनो अशुद्ध चिज, घिनलग्‍टिक बात ओ झूट बोलुइयन कौनो हालतम फे वाकर भित्तर पैँठ पउइया नैहुइट। पठ्‌रूक जीवनक किताबम नाउँ लिखल केल भित्तर पैँठ पउइयाबाट।#यशै ५२:१; इज ४४:९

Currently Selected:

प्रकाश 21: thl

Highlight

Copy

Compare