प्रकाश 20

एक हजार वर्ष

1तबदोस्र मै एकठो स्‍वर्गदूतह स्‍वर्गसे टर आइट देख्‍नु। हुँकहार हाँठम अतल कुण्‍डक साँचा ओ भारी सिक्री रलहन। 2ओ उ अजगर पकर्क एक हजार वर्षसमक लाग बाहान्‍देल। उ अजगर त सुरुक सँप्‍वा या भूतन्‍हक रज्‍वा शैतान हो।#उत ३:१ 3उ जाति-जातिक मनैन छल कर नैपाई कना हिसाबले स्‍वर्गदूत ओहीह अतल कुण्‍डम डारदेल ओ ताल्‍चा मार्क मोहर लगादेल। एक हजार वर्ष बिति कलसे कुछ समयक लाग खुल्‍ला छोरजैने बा।

4तबदोस्र मै सिंहासन ओ उहिँम बैठुइयन देख्‍नु, हुँकन न्याय कर्ना अधिकार देगैल् रलहन। येशूक देखाइल सत्‍य बात ओ परमेश्‍वरक सन्‍देश सुनाइल कारणले मुवापाइल मनैन्‍हक आत्‍मा फे मै देख्‍नु। हुँक्र जनावर या उ मूर्तिह नैपूज्‍ल रलह, ना त आपन लिल्‍हारिम या हाँठम वाकर चिन्‍ह लगैलरलह। हुँक्र फेदोस्र जिक उठ्‌ल ओ एक हजार वर्षसम ख्रीष्‍टसे राज्‍य कर्ल।#दान ७:९,२२ 5तर बाँकी मुर्दा एक हजार वर्ष बितल त जीवित हुइल। यी पहिल पुनरुत्‍थान हो। 6पहिल पुनरुत्‍थानम सहभागी हुउइयन धन्य ओ पवित्र हुइट। हिँकन द्वासर मृत्‍युक शक्तिले कुछु कर नैस्‍याकी, तर हुँक्र परमेश्‍वर ओ ख्रीष्‍टक पूजारी होक उहाँकसँग एक हजार वर्षसम राज्‍य कर्नेबाट।

शैतानक अन्‍तिम विनाश

7एक हजार वर्ष बिति कलसे शैतान वाकर कैदमसे मुक्त कैजउइया बा, 8ओ पृथ्‍वीक चर्‍योओर रहल देश-देशक मनैन छल या गोग ओ मागोगह लडाइँक लाग जम्‍मा कर निकर्क अउइया बा। हुँकन्‍हक संख्‍या समुद्रक बालुरअस धेर हुइनेबाट।#इज ७:२; ३८:२,९,१५ 9हुँक्र सारा पृथ्‍वीभर फैलगैल ओ परमेश्‍वरक भक्तहुँकन्‍हक बैठना ठाउँ ओ उहाँक प्रेम करल सहरह घेरा डर्ल, तर स्‍वर्गसे आगी वर्षल ओ हुँकन भसम पारदेहल। 10जाति-जातिक मनैन छल्‍ना दुष्‍ट शैतान आगी ओ गन्‍धकक् कुण्‍डम फाँक्‍गैल्, जहाँ उ जनावर ओ झूटा अगमवक्ता फाँक्‍गैल् रलह। हुँक्र उहाँ रातदिन सड्‌डभर यातना भोग्‍टीरनेबाट।

अन्‍तिम न्याय

11तब एकठो भारी उज्‍जर सिंहासन ओ उहिँम विराजमान रहुइयह मै देख्‍नु। उहाँक सामनेसे पृथ्‍वी ओ आकाश भागल ओ फेदोस्र नैदेखपरल।#दान ७:९-१० 12मै छुटी ओ बरा सब मुवलहुँकन सिंहासनक सामनेम ठह्र्‍याइल देख्‍नु। ओ धेर किताब बिठ्‍नाइल रह, और एकठो किताब फे बिठ्‍नाइल मै देख्‍नु, जौन जीवनक किताब हो। उ किताबम लिखल अनुसार, हुँकन्‍हक काम अनुसार मुवलहुँकन्‍हक न्याय कैजाइटह। 13समुद्र उहिँम रहल मुवलहुँकन देडारल, ओ मृत्‍यु ओ पाताल फे हुँकन्‍हम रहल मुवलहुँकन देडर्ल। हुँकन्‍हक सबजन्‍हक आपन-आपन काम अनुसार न्याय हुइलन।

14मृत्‍यु ओ पाताल अग्‍नि-कुण्‍डम फाँक्‍गैल। यी अग्‍नि-कुण्‍ड द्वासर मृत्‍यु हो। 15ज्‍याकर-ज्‍याकर नाउँ जीवनक किताबम लिख्‍गैल् नैभेटागैल् हुँक्र अग्‍नि-कुण्‍डम फाँक्‍गैल।

Currently Selected:

प्रकाश 20: thl

Highlight

Copy

Compare