प्रकाश 22

जीवनक लद्‍या

1तबदोस्र स्‍वर्गदूत महीह स्‍फटिकअस चह्‍कार जीवनक पानीक लद्‍या देखैल। उ लद्‍या परमेश्‍वर ओ पठ्‌रूक सिंहासनसे निकर्क#इज ४७:१; जक १४:८ 2उ सहरक सरकक् बीचमसे बहटह। उ लद्‍यक डिउँम जीवनक रूख्‍वा रह, जौन रूख्‍वा हरेक मैन्‍हम बाह्र किसिमक फारा फराए। वाकर पत्‍याजुन जात-जातिक मनैन चोखाइक लाग बिर्‍वा रह।#उत २:९; इज ४७:१२ 3आबठेसे उ सहरम कबु फे सराप नैपर्नेहो। परमेश्‍वरक ओ पठ्‌रूक सिंहासन उहाँ रनेबा ओ उहाँक सेवकहुँक्र उहाँक आराधना करहीँ।#जक १४:११ 4हुँक्र परमेश्‍वरक अनुहार देखहीँ ओ उहाँक नाउँ हुँकन्‍हक लिल्‍हारिम रहिन। 5उहाँ कबु फे रात नैहुइनेहो, उहाँ दिया या घामक अजरार चहने नैहो, काकरकि परमप्रभु परमेश्‍वर जो हुँकन्‍हक अजरार हुउइया बाट। हुँक्र सड्‌डभर राज्‍य करुइयाबाट।#यशै ६०:१९; दान ७:१८

येशू हाली अइटीबाट

6तबदोस्र स्‍वर्गदूत महीह कल, “यी वचन विश्‍वासयोग्य ओ सत्‍य बा। अगमवक्ताहुँकन पवित्र आत्‍मा देहुइया परमप्रभु परमेश्‍वर आपन सेवकहुँकन आब झट्‌टहेँ ह्‍वाए अइना घटना देखाइक लाग स्‍वर्गदूतह पठारख्‍ल।”

7“हेरो, मै हाली अइटिबाटुँ।

यी किताबम लिख्‍गैल्

अगमवाणीक वचन मनुइया धन्य हो।”

8यी बात सुन्‍ना ओ देख्‍ना मै यूहन्‍ना हुइटुँ। जब मै यी बात सुन्‍नु ओ देख्‍नु, तब महीह यी बात देखैना स्‍वर्गदूतक पाउ पर्क दण्‍डवत् करक लाग रनहुँ। 9तर ऊ महीह कल, “असिक जिन करो। मै त टुँहार अगमवक्ता दादुभैया ओ यी किताबक वचन पालन करुइयाअस परमेश्‍वरक सेवक केल हुइटुँ। परमेश्‍वरह केल दण्‍डवत् कैक उहाँह आदर करो।” 10ऊ महीह आम्‍ही कल, “यी किताबक अगमवाणीक वचन गुप्‍तम जिन ढरो, काकरकि सब बात हुइना समय लग्‍घ आरहल। 11दुष्‍ट काम करुइया दुष्‍ट काम कर्टिजाई, फूहर काम करुइया फूहर काम कर्टिजाई, धर्मी मनैया धर्मी काम कर्टिजाई ओ पवित्र मनैया पवित्र हुइटिजाई।”#दान १२:१०

12“हेरो, मै झट्‌टहेँ अइटिबाटुँ।

हरेक मनैयह वाकर काम अनुसार

देना इनाम म्‍वारठे बा।#यशै ४०:१०; ६२:११; भज २८:४; यर १७:१०

13मै अल्‍फा ओ ओमेगा,

पैल्‍हा ओ अन्‍तिम,

सुरु ओ अन्‍त्‍य हुइटुँ।”#प्रका १:८,१७; २:८; यशै ४०:६; ४८:१२

14आपन लुगा धोक सफा ढरुइयन धन्य हुइट। हुँक्र जीवनक रूख्‍वक फारा खाइ ओ उ सहरम पैठ पैना अधिकार पैनेबाट।#उत २:९; ३:२२ 15तर कुक्‍कुर, मन्‍त्रतन्‍त्र करुइयन, व्‍यभिचार करुइयन, हत्‍या करुइयन, मूर्तिपूजा करुइयन, असत्‍य मन परुइयन ओ असत्‍य हिसाबले चलुइयन सहरक बाहर रठ।

16“मै येशू आपन स्‍वर्गदूतह टुँहारठे मण्‍डलीक लाग यी बात थाहाँ देह पठारख्‍नु। मै दाऊद राजक कुलक सन्‍तान हुइटुँ ओ बिहान हुइना ब्‍यालक चम्‍कना तोरैँया हुइटुँ।”#यशै ११:१,१०

17पवित्र आत्‍मा ओ दुल्‍ही कठ, “आई।” जे सुनी ऊ कही, “आई।” जेहीह पियास लागी ऊ आए, जे इच्‍छा करी ऊ जीवनक पानी निःशुल्‍क पिय।#यशै ५५:१ 18यी किताबक अगमवाणीक वचन सुनुइया हरेक मनैयह मै यूहन्‍ना यी चेताउनी देहटुँ, जे यिहिँम कुछु थपी कलसे ओहीह परमेश्‍वर यी किताबम लिखल विपत्ति थपदेनेबाट।#व्‍य ४:२; १२:३२ 19ओ कुई यी अगमवाणीक किताबक वचनमसे कुछु बात हटाइ कलसे, परमेश्‍वर फे जीवनक रूक्‍खोक फारा खैना ओ पवित्र सहरम जैना वाकर हक हटादेहुइयाबाट। 20यी बातक गवाही देहुइया कठ, “जाट्‌टीसे, मै झट्‌टहेँ अइटिबाटुँ।” आमेन। आई, हे प्रभु येशू! 21प्रभु येशूक अनुग्रह सबजहनसे पलरह। आमेन।

Currently Selected:

प्रकाश 22: thl

Highlight

Copy

Compare