प्रकाश 13

समुद्रमसे निक्रलक जनावर

1तबदोस्र समुद्रमसे निकर्क अइलक एकठो जनावर मै देख्‍नु। वाकर दशठो सिङ ओ सातठो कपार रलहस ओ हरेक सिङम एक-एकठो मुकुट रलहस, ओ वाकर हरेक कपारिम परमेश्‍वरह अपमान कर्ना नाउँ रलहस।#दान ७:३; प्रका १७:३,७-१२ 2उ जनावर चितुवाअस रह। वाकर ग्‍वारा भालुक ग्‍वाराअस रलहस ओ मुह्‍जुन सिंहक मुह्‍अस रलहस। उ अजगर आपन शक्ति, सिंहासन ओ महान अधिकार उ जनावरह देलस।#दान ७:४-६ 3वाकर एकठो कपारिम मुनागरी गहिँरसे च्‍वाट लागलअस देखपरस, तर उ च्‍वाट चोखारलहस। सारा संसार छक्‍क पर्क उ जनावरक पाछ लागल। 4उ अजगर आपन अधिकार जनावरह देलकओर्से सबजन अजगरक पूजा करँट्‍ ओ उ जनावरक फे असिक जयजयकार करँट्‍, “उ जनावरअस और के बा जे? ओहीसे लडाइँ कर सेकुइया के बा?”

5उ जनावरह घमण्‍डी हिसाबले परमेश्‍वरक अपमान करक लाग बयालीस मैन्‍हासम समय देगैल् रह।#दान ७:८,२५; ११:३६ 6ऊ परमेश्‍वरह, उहाँक नाउँह, उहाँक वासस्थानह ओ स्‍वर्गम रना सबजहन सराप लागल। 7ओहीह परमेश्‍वरक भक्त मनैन्‍हक विरोधम लडाइँ कैक हुँकन जित्‍ना हक देगैल् रह। सब कुल, सब देश, सब भाषा ओ सब जातिन्‍हकम शासन करक लाग ओहीह हक देगैल् रह।#दान ७:२१ 8मुवागैल् पठ्‍रूक जीवनक किताबम संसारक उत्‍पत्तिसे पैल्‍हहेँ नाउँ लिख्‍गैल् मनै बाहेक पृथ्वीम रहुइयन सबजन उ जनावरक पूजा कर्नेबाट।#भज ६९:२८

9टुँहार कान बा कलसे, यी बात सुनो!

10कैदम जाइपर्ना मनैया

कैदम लैजाजैने बा,

तरवालले मुवापैना मनैया

तरवालले जो मुवापैने बा।

याकर मतलब परमेश्‍वरक भक्तजनहुँक्र सहनशील ओ विश्‍वासयोग्य हुइपर्ठा।#यर १५:२; ४३:११

11तबदोस्र मै पृथ्वीमसे निकर्क अइलक और एकठो जनावर देख्‍नु। पठ्‌रूकअस वाकर दुइठो सिङ रलहस ओ वाकर बोली अजगरकअस रलहस। 12ऊ पैल्‍ह जनावरक महान अधिकार चलाइल ओ उ गहिँर घाउ चोखाइल पैल्‍ह जनावरक पूजा करक लाग संसारक सब मनैन कर लगाइल। 13यी द्वासर जनावर अचम्‍म-अचम्‍मक चिन्‍ह देखाइल। यिहाँसम कि मनै हेर्टीहेर्टी ऊ आकाशमसे पृथ्वीम आगी समेत वर्षाइल। 14पैल्‍ह जनावरक सामुन्‍नेम असिन अचम्‍म-अचम्‍मक चिन्‍ह देखैना शक्ति ओहीह देगैल् रलहस। उहओर्से पृथ्‍वीक मनैन ऊ भर्माइल। तरवालले गम्‍भीर च्‍वाट पाक फे बाँचल जनावरक सम्‍मानम मनै वाकर मूर्ति बनैहो कैक उ द्वासर जनावर हुकुम करल। 15पैल्‍ह जनावरक मूर्तिम साँस फुकदेना अधिकार द्वासर जनावरह देगैल् रह, ताकि उ मूर्ति ब्‍वाल सेकी ओ उ मूर्तिक पूजा नैकरुइयन मुवापैहीँ। 16तब ऊ छुटी ओ बरा, धनी ओ गरीब, कमारा ओ मुक्त सबजहन आपन-आपन दाहिन हाँठम वा लिल्‍हारिम छाप लगाइक लाग कर लगाइल। 17उ छाप नैलगुइया कुई फे किनबेच कर नैपैना हुइल। उ छापजुन उ जनावरक नाउँ वा वाकर संख्‍या रह।

18यी ब्‍याला बुद्धि चहठा। समझदार मनैया उ जनावरक संख्‍या बुझ्‍क अर्थ लगाइपर्ठा, काकरकि उ संख्‍या त एकठो मनैयक संख्‍या हो, ओ उ सङ्‍ख्‍याजुन छ सय छयसट्‌ठी हो।

Currently Selected:

प्रकाश 13: thl

Highlight

Copy

Compare