प्रकाश 12
12
जन्नीमनैया ओ अजगर
1तबदोस्र आकाशम एकठो अचम्मक बराभारी चिन्ह देखपरल। एकठो जन्नीमनैया घामक लुगा लगैलरह, वाकर ग्वारक टर जोन्ह्या रलहिस ओ कपारिम जुन बाह्रठो तोरैँयक मुकुट रलहस। 2ऊ गर्भवती रह ओ ब्याथा लग्लकओर्से छट्पटैटी चिच्याइटह।
3तबदोस्र आकाशम और एकठो अचम्मक चिन्ह देखपरल, सातठो कपार ओ दशठो सिङ रहल एकठो बराभारी लाल अजगर रह। वाकर सातठो कपारिम सातठो मुकुट रलहस।#दान ७:७ 4वाकर पुछीले आकाशक एक तिहाइ तोरैँयह सओँर्टी पृथ्वीम फाँकदेहल ओ लर्का जन्मटीकि ओहीह खादेहम कैक उ अजगर ब्याथा लागल जन्नीमनैयक आघ ठह्र्याइल।#दान ८:१० 5उ जन्नीमनैया लुहाकिक् डण्डले सारा जातिन्हकम शासन कर्ना एकठो छावा जन्माइल। जन्मैटिकी वाकर छावा उठागैल् ओ परमेश्वरकठे लैजागैल्, ओ उहाँक सिंहासनम बैठागैल्।#यशै ६६:७; भज २:९ 6उ जन्नीमनैयाजुन उजार ठाउँओर भागल, जहाँ एक हजार दुइ सय साठी दिनसम वाकर पालनपोषण करक लाग परमेश्वर ठाउँ तयार पाररख्लह।
7तबदोस्र स्वर्गम लडाइँ सुरु हुइल्। मिखाएल ओ हुँकहार और स्वर्गदूतहुँक्र उ अजगरक विरोधम लडाइँ कर्ल, ओ उ अजगर ओ वाकर दूतहुँक्र फे हुँकन्हक विरोधम लडाइँ कर्ल।#दान १०:१३,२१; १२:१; यहू ९ 8तर अजगर ओ वाकर दूतहुँक्र हर्ल, तब हुँक्र स्वर्गम बैठ नैपैल। 9असिक उ बराभारी अजगर पृथ्वीम फाँक्गैल्, ओ वाकर दूत फे वाकर सँगसँग पृथ्वीम फाँक्गैल्। उ अजगर त सुरुक सँप्वा हो, ज्याकर नाउँ दुष्टात्मा वा शैतान हो, जे सारा संसारह भर्मैलरह।#उत ३:१; लूक १०:१८
10तब मै स्वर्गम असिक कहल एकठो बराभारी आवाज सुन्नु,
“आब हमार परमेश्वर आपन मनैन मुक्ति देहुइयाबाट,
उहाँ आपन राज्यकीय शक्ति देखुइयाबाट,
उहाँ राजा होक शासन करुइयाबाट,
ओ उहाँ आपन ख्रीष्टह अधिकार देरख्ल।
हमार दादुभाइहुँकन रातदिन
परमेश्वरक आघ दोष लगुइया शैतान
स्वर्गसे फँक्वापाराखल।#अयू १:९-११; जक ३:१
11हमार दादुभाइहुँक्र पठ्रूक रगतले,
ओ घोषणा करल सत्य वचनले ओहीह जितरख्ल।
हुँक्र आपन जीउज्यान देह समेत तयार हुइल।
12उहओर्से टुह्र स्वर्गम रहुइयन सबजन रमाओ!
तर पृथ्वी ओ समुद्रह धिक्कार बा!
काकरकि हुँकन्हक बीचम शैतान झोँक्याक आरहल
ओ वाकर समय धेर नैहो कना ओहीह थाहाँ बाटस।”
13तब पृथ्वीम फाँकगैनु कना थाहाँ पाइल त अजगर उ छावा पाइल जन्नीमनैयह ख्याद लागल। 14अजगरसे बाँच्क उजार ठाउँम रहल आपन शरणस्थानम पुगक लाग उ जन्नीमनैयह गरुडक दुइठो डैना देगैल् रह। उहाँ साह्रे तीन वर्षसम वाकर पालनपोषण करक लाग ठाउँ तयार पारगैल् रह।#दान ७:५; १२:७ 15उ जन्नीमनैयह बाहारले पुहादेहीँस कैक उ अजगर आपन मुहमसे एकठो लद्याअस पानी अनाइल 16तर पृथ्वी उ जन्नीमनैयह बचाइक लाग आपन मुह् उघार्क उ अजगरक अनाइल पानीह लिलदेहल। 17अजगर जन्नीमनैयसे झन् रिसाइल ओ उ वाकर सन्तान, परमेश्वरक आज्ञा मनुइयन ओ येशूक वचनम विश्वास करुइयनसे लडाइँ करक लाग गैल्। 18तब उ अजगर समुद्रक किनारम ठह्र्याइल।
Currently Selected:
प्रकाश 12: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
