प्रकाश 14
14
पठ्रू ओ एक लाख चवालीस हजार
1तब मै हेर्नु त सियोन पर्वत्वम पठ्रू ठह्र्याइल देख्नु। उहाँकसँग एक लाख चवालीस हजार मनै रलह, हुँकन्हक लिल्हारिम उहाँक नाउँ ओ उहाँक बाबक नाउँ लिखल रलहन।#इज ९:४; प्रका ७:३ 2छाँगक गर्जन ओ बद्रीक गड्याङ-गुडुङ आवाजअस स्वर्गसे एकठो बराभारी आवाज आइल मै सुन्नु। उ आवाज त वीणा बजुइयन धेर वीणा बजाइल अस फे सुन्गैल्। 3उ एक लाख चवालीस हजार मनैजुन मुख्य सिंहासनक आघ ओ उ चार जीवित प्राणी ओ धर्मगुरुन्हक आघ ठह्र्याक एकठो लौव गीत गाइटलह। यी गीतजुन हुँक्र केल सिख पारख्लह, काकरकि पृथ्वीमसे म्वाल तिर्क हुँकन्हक केल उद्धार होरलहन। 4हुँक्र कन्या केटीअस च्वाखा बाट, व्यभिचारी काम नैकर्लहुइट, ओ पठ्रूक पाछ केल लागल बाट। हुँक्र त परमेश्वर ओ पठ्रूक आघ सबसे विशेष रूपम चह्राइक लाग म्वाल तिर्क छुट्कारा देगैल् भेटी हुइट। 5हुँकन्हक मुहम कुछु छल नैहुइटन। हुँक्र निर्दोष बाट।#सप ३:१३
तीन स्वर्गदूत
6तबदोस्र मै आकाशम उर्टिरहल और एकठो स्वर्गदूत देख्नु। ऊ सब जाति, सब कुल, सब भाषा ओ सब देशक मनैन सुनाइक लाग खुशीक खबर लेक आइटलह। 7ऊ बराभारी आवाजम कल, “परमेश्वरक डर डराओ, ओ उहाँक महिमा करो। काकरकि उहाँ मनैन्हक न्याय कर्ना ब्याला आरहल। स्वर्ग, पृथ्वी, समुद्र ओ सारा पानीक मूल बनुइया परमेश्वरह दण्डवत करो।”
8तब पैल्ह स्वर्गदूतक पाछ द्वासर स्वर्गदूत असिक कटी अइल, “ध्वस्त हुइल्! महान् सहर बेबिलोन ध्वस्त हुइल्। उ सहर आपन व्यभिचारक कारण संसारक सब जातिन परमेश्वरक क्रोधक खोर्यमसे पिय लगाराखल।”#यशै २१:९; यर ५१:८; प्रका १८:२
9उ दुइठो स्वर्गदूतन्हक पाछ तीसर स्वर्गदूत बराभारी आवाजम असिक कल, “यदि कौनो मनैया उ जनावरह ओ वाकर मूर्तिह पूजा करी ओ वाकर छाप आपन लिल्हारिम वा आपन हाँठम लगाइ कलसे, 10ऊ फे परमेश्वरक क्रोधक खोर्यम कुछु नैमिलाक तयार पारगैल उहाँक क्रोधक कर्रा मद पिने बा, ओ सारा पवित्र स्वर्गदूत ओ पठ्रूक सामुन्नेम आगी ओ गन्धकम यातना पैनेबा।#यशै ५१:१७; उत १९:२४; इज ३८:२२ 11ओ हुँकन यातना देगैल् आगीक धूवाँ सड्डभर उप्पर जैटिरनेबा। उ जनावर ओ वाकर मूर्तिह पूजा करल मनै ओ वाकर नाउँक छाप लगाइल मनै आपन सजायमसे रातदिन कबु फे आराम नैपैनेहुइट।”#यशै ३४:१०
12याकर मतलब परमेश्वरक आज्ञापालन कर्ना ओ येशूम विश्वास कर्ना उहाँक भक्तजनहुँक्र पूरा सहनशील रहपर्ठा।
13तबदोस्र स्वर्गसे मै एकठो असिन आवाज सुन्नु, “यी बात लिखो: आबठेसे प्रभुक सेवा कर्टीकर्टी मुवल मनै धन्यक हुइट।” पवित्र आत्मा असिक जवाफ देल, “जाट्टीसे हो! काकरकि आबठेसे हुँक्र आपन दुःख ओ परिश्रममसे आराम पैहीँ ओ हुँकन्हक करल काम अनुसार हुँक्र इनाम पैहीँ।”
पृथ्वीक बाली कट्ना समय
14तबदोस्र मै हेर्नु, उहाँ उज्जर एकठो बद्री देख्नु ओ उहिँम मनैयक छावाअसक एक जन बैठलरलह। उहाँक कपारिम स्वानक मुकुट रलहन ओ हाँठमजुन एकठो धर्यार हँस्या रलहन।#दान ७:१३ 15और एकठो स्वर्गदूत परमेश्वरक मन्दिरमसे निकर्क अइल ओ बद्रीम जे बैठलरलह हुँकहीन बराभारी आवाजम कल, “हँस्यले बाली काटी, काकरकि ब्याला होस्याकल। पृथ्वीक बाली पाकरहल।”#योए ३:१३ 16तब बद्रीम बैठल रहुइया आपन हँस्या पृथ्वीम चलैल ओ पृथ्वीक बाली काट्गैल्।
17तबदोस्र मै स्वर्गम परमेश्वरक मन्दिरमसे आइल और एकठो स्वर्गदूत देख्नु। हुँकहार हाँठम फे धर्यार हँस्या रलहन। 18तब आगीले नाश पारदेना अधिकार रहल और एकठो स्वर्गदूत वेदीमसे अइल। ऊ हँस्या लेहल स्वर्गदूतह बराभारी आवाजम असिक कल, “हँस्यले पृथ्वीम रहल अङ्गूरिक झुप्पा काटो, काकरकि पृथ्वीक सारा अङ्गूर पाकरहल।” 19उ स्वर्गदूत आपन हँस्या पृथ्वीम चलैल, ओ सारा अङ्गूरिक झुप्पा जम्मा कर्ल, ओ ओहीह परमेश्वरक क्रोधक अङ्गूर पेर्ना बराभारी कोलम फाँकदेल। 20सहरसे बाहर रहल कोलम उ अङ्गूर पेरगैल् ओ उहाँसे तीन सय किलोमिटर नम्मा ओ साढे एक मिटर गहिँर रगतक खोल्ह्वा बहल।#यशै ६३:३; विला १:१५; प्रका १९:१५
Currently Selected:
प्रकाश 14: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
