१ तिमोथी 5
5
विश्वासीप्रति जिम्मेवारी
1उमेर ढल्कल मनैन जिन हप्काओ, तर आपन बाबह करअस आदर कैक सम्झाओ। ओ आपनसे कम उमेरक मनैनसेजुन आपन भैया मान्क व्यवहार करो। 2ओसहेँक उमेर ढल्कल महिलन आपन डाई मान्क ओ आपनसे कम उमेरक महिलनसे जुन आपन बहिन्या मान्क पवित्र मनले व्यवहार करो।
3आपन कुई फे नैरहल विधवन्हक रेखदेख करो। 4तर यदि कौनो विधवक लर्कापर्का या नाट्नट्कुर बाटिन कलसे, हुँक्रहे हुँकहार रेखदेख करपर्ठा। हुँक्र सबसे पैल्ह आपन घरपरिवारम कर्तव्य पूरा कर सिखपर्ठा। असिक हुँक्र आपन डाई-बाबक करल उपकारक ऋण चुक्ता करसेक्ठ। ओसिक कर्लसे परमेश्वर फे खुशी हुइठ। 5आपन कना कुई फे नैरहल जात्तिक विधवा त आपन भरोसा परमेश्वरम ढर्लरठी। ऊ रातदिन परमेश्वरम बिन्तीभाउ कर्टिरठी। 6तर सुख-विलासम मस्त रना विधवा जिटीह मुवल बराबर हो। 7कुई फे दोष लगाइ नैसेकी कैक विश्वासीहुँकन यिह बातक निर्देशन देओ। 8तर आपन नातपातन्हक, खासकैक आपनऽ घरपरिवारक लालनपालन नैकरुइयन विश्वासमसे पाछ हटल मनै हुइट। हुँक्र अविश्वासीहुँकनसे फे खराब रठ।
9मण्डलीमसे सहायता पैना विधवा-सूचीम ज्याकरत्याकर नाउँ जिन लिखो। उ सूचीम नाउँ लिखाइक लाग विधवा साठी वर्ष नाङ्घल, ओ आपन गोस्याप्रति विश्वासयोग्य रहल हुइपर्ठा। 10अत्र केल नैहोक ऊ असल काम कर्लक कारण सबजहनसे आदर पाइल हुइपर्ठा, जस्तह आपन छाई-छावन हुर्काइल, अरदेशीपरदेशीन्हक सेवासत्कार करल, परमेश्वरक मनैन्हक ग्वारा धोक सेवा करल, दुःखम परल मनैन्हक उपकार करल, ओ अस्तह-अस्तह और असल कामम लग्लरहल हुइपर्ठा।
11तर कम उमेरक विधवन्हक नाउँ उ सूचीम जिन लिखो, काकरकि पाछ हुँकन्हक भ्वाज कर्ना चाहना बलगर हुइसेक्ठन, ओ हुँक्र ख्रीष्टसे दूर हुइसेक्ठ। 12तब हुँक्र पैल्ह करल बाचा भङ्ग कर्लकओर्से हुँक्र दोषी ठह्राजैठ। 13उ बाहेक हुँक्र घरघर नेङ्ग्ना बानी पर्क अल्छी ओ चुक्ली लगैना होजैठ। हुँक्र बटोइही नैपर्ना बात बटोइठ ओ आनक-आनक कामम हाँठ डर्ठ। 14उहओर्से कम उमेरक विधवहुँक्र फेदोस्र भ्वाज कैक छाई-छावा पैहीँ, ओ घरगृष्टि चलैहीँ कैक मै सल्लाह देह चाहटुँ। ओसिक कर्लसे हमार विरोधीहुँक्र हमार बदनाम कर्ना मौकऽ नैपैनेहुइट। 15काकरकि कम उमेरक कुई-कुई विधवन पैल्हहेँ बहकलबाट ओ शैतानक पाछ लागरल।
16यदि कौनो विश्वासी बाबुक घरपरिवारम विधवन बाट कलसे, ऊ हुँकन्हक रेखदेख करपर्ठा। ओसिक कर्लसे मण्डलीह हुँकन्हक बोझ ब्वाक नैपरी ओ मण्डली आपन कना कुई फे नैरहल विधवन्हक रेखदेख करी।
17असल तरिकाले काम कर्ना एल्डरहुँकन दोबर आदर करपर्ठा। खासकैक वचन प्रचार कर्ना ओ सिखैना कामम मेहनत करुइयन यी आदर पाइपर्ठा। 18काकरकि धर्मशास्त्रम असिक लिखल बा, “घाना डाईंबेर गोरुन्हकम मोह्कर्या जिन लगैहो” ओ “काम करुइयन ज्याला पाइपर्ठा।”#व्य २५:४; मत्ती १०:१०; लूक १०:७
19कम्तिम फे दुइ-तीन जन साक्षी नैहुइट्सम एल्डरह दोष लगाइल बात सुन्बोसुन्बो जिन करो।#व्य १७:६; १९:१५ 20घरीघरी पाप काम कर्टीरहुइयन सारा मण्डलीक आघ हप्काओ। ओसिक कर्बो त और जन फे डरैहीँ।
21परमेश्वर, ख्रीष्ट येशू ओ रोजगैल् पवित्र स्वर्गदूतन्हक सामुन्नेम मै टुँहीन यी निर्देशन बिना भेदभाव पालन करक लाग आज्ञा देहटुँ। पक्षपात कैक कौनो फे काम जिन करो। 22किहुह मण्डलीम काम लगाइक लाग हतार-हतारम वाकरम हाँठ ढैडर्ना काम जिन करो। आनक पापम सहभागी जिन होओ। अपन्हेह पवित्र ढर्लरहो।
23पानी केल जिन पिओ। तर टुँहार प्याटिक समस्या रलकओर्से ओ टुँ घरीघरी बेराम पर्ना हुइलकओर्से डानडान अङ्गूरिक मद फे पिओ।
24कत्रा मनैन्हक पाप छर्लङ्ग देखपरजैठन ओ हुँक्र न्याय हुइनासे आघहेँ दोषी ठह्राजैठ। तर कत्रा मनैन्हक पाप पाछ केल देखपर्ठन। 25ओसहेँक कत्रा मनैन्हक करल असल काम छर्लङ्ग देखपरजैठन। ओ गुपचुपम कैगिल् असल काम फे एक ना एक दिन त अवस्य देखपर्ठा।
Currently Selected:
१ तिमोथी 5: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
