१ तिमोथी 4

तिमोथीह निर्देशन

1पवित्र आत्‍मा स्‍पष्‍ट रूपले कैरख्‍ल, कि अइना दिनम कत्रा मनै विश्‍वासमसे पाछ हट्‍जउइयाबाट। हुँक्र छली आत्‍मक पाछ लगुइयाबाट ओ भूतन्‍हक सिखाइल बात मनुइयाबाट। 2ओसिन शिक्षा सिखैना मनै कपटीहुँक्र ओ झूट बोलुइयन हुइट। हुँकन्‍हक विवेक सेन्‍द्रार लुहाकिले डागलअस मुवल रठन। 3हुँक्र भ्‍वाज कर्ना ओ कत्रा चिज खैना गल्‍ती हो कैक कठ। तर खैना चिज त परमेश्‍वर सृष्‍टि कर्लह। सत्‍य बात जन्‍ना विश्‍वासी मनै धन्यवाद देक उ खाना खाइसेक्‍ठ। 4परमेश्‍वरक सृष्‍टि करल हरेक चिज असल बा। हम्र परमेश्‍वरह धन्यवाद देक सब चिज खाइसेक्‍ठी। 5काकरकि परमेश्‍वरक वचन ओ प्रार्थना उ भोजनह ग्रहणयोग्य बनैठा।

6यदि टुँ यी बात विश्‍वासी भैयन् सिखैबो कलसे, टुँ ख्रीष्‍ट येशूक लाग एक असल सेवक हुउइया बाटो। असिक टुँ अप्‍न विश्‍वासम हुर्कलक ओ सत्‍य शिक्षा पालन कर्लक बात देखुइयाबाटो। 7टुँ ठरनाठेगानक, अर्थनाबर्थक, परमेश्‍वरक बदनाम कर्ना बट्‌कोहीसे दूर रहपर्ठा। परमेश्‍वरक चाहना अनुसार व्‍यवहार करपर्ना बात सिख्‍टीरहो। 8शारीरिक कसरत असल हो, तर आत्‍मिक कसरत झन् असल हो, काकरकि यी आबक ओ पाछक जीवनम फाइदा पुगैठा। 9यी सत्‍य वचन हो, ओ सबजन यहीह स्‍वीकार करपर्ठा। 10यिहकारण हम्र कडा परिश्रम ओ सङ्‌घर्ष कर्टिरठी। काकरकि हमार आशा जीवित परमेश्‍वरम बा। उहाँ सारा मनैन, खासकैक विश्‍वास करुइयन, मुक्ति देहुइया हुइट।

11यिह निर्देशन विश्‍वासीहुँकन सिखाओ ओ पालन कर कहो। 12कम उमेरक बाटो कटिम टुँहीन तुच्‍छ सम्‍झना मौका किहुह फे जिन देओ। तर विश्‍वासीन्‍हक आघ बोलीवचनम, चालचलनम, प्रेमम, विश्‍वासम ओ पवित्र जीवनम एक उदाहरण होओ। 13मै नैआइट्‍सम धर्मशास्‍त्र पहर्क सुनैना, उत्‍साह देना, ओ सिखैना कामम लग्‍लरहो। 14एल्‍डरहुँक्र टुँहारम हाँठ ढर्ल त अगमवाणीद्वारा टुँहार पाइल आत्‍मिक वरदानक पूरा सदुपयोग करो।

15मै टुँहन कहल यिह कर्तव्‍य मजासे पालन करो ओ पूरा मन लगाक उहिँम लग्‍लरहो, ताकि टुँहार करल प्रगति सबजन देखहीँ। 16आपन जीवनह ओ आपन शिक्षह ध्‍यान देक हेर्टीरहो। यदि टुँ यी बातम लग्‍लरबो कलसे, टुँ मुक्ति पैबो, ओ टुँहार बात सुनुइयन फे मुक्ति पैहीँ।

Currently Selected:

१ तिमोथी 4: thl

Highlight

Copy

Compare