१ तिमोथी 6

1सब कमाराहुँक्र आपन-आपन मालिकन पूरा आदर करपर्ठा। ओसिक कर्लसे परमेश्‍वरक नाउँ ओ हमार सिखाइल बातक बदनाम कुई फे कर नैपाई। 2विश्‍वासी दादुभैयन त हुइट कैक कमाराहुँक्र आपन विश्‍वासी मालिकक् कम आदर नैकरपरट्‍। बेनसे हुँक्र झन् धेर सेवा करपर्ठा, काकरकि मालिकहुँकन फाइदा हुइना आपनऽ प्रिय विश्‍वासी दादुभैयन जो फाइदा हुइना हो। टुँ मण्‍डलीम यिह बात सिखाइपर्ठा, ओ पालन करक लाग उत्‍साह देहपर्ठा।

धनसम्‍पत्तिक मोह

3कुई-कुई गलत शिक्षा सिखाइसेक्‍ठ, तर हमार प्रभु येशू ख्रीष्‍टक सिखाइल सत्‍य शिक्षा त यिह हो, ओ यी शिक्षाले परमेश्‍वरक आदर करक लाग सहायता कर्ठा। 4गलत शिक्षा सिखैना मनै वास्‍तवम कुछु फे नैजन्‍लरट। हुँक्र घमण्‍डी हुइट ओ कामनाकाजक वादविवाद कर्ठ, ओ एक-एक निहुँ लेक झग्रा कर खोज्‍ठ। ओसिन बातले डाहा, बेमेल, बदनाम, ओ खराब शङ्‍का केल उत्‍पन्‍न करैठा। 5हुँक्र एकदमसे कचकच-कचकच कर्टिरठ। हुँकन्‍हक बुद्धि जो बिग्रल बाटन। हुँक्र सत्‍य बातसे दूर होरल ओ परमेश्‍वरक भक्ति कर्ना काम धनी हुइना उपाय हो कैक विचार कर्ठ।

6वास्‍तवम सन्‍तोष होक परमेश्‍वरक भक्ति कर्ना बरा धन हो। 7काकरकि जन्‍मबेर हम्र का लेक अइली? ओ मुवबेर का लेक जैबी? 8उहओर्से यदि हमन खैना लगैना पुगल त होगैल् नि। 9तर धनी हुइ खोजुइयन परीक्षम पर्ठ, ओ खराब ओ हानिकारक चाहना हुँकन फँसाडर्ठन। उह चाहना हुँकन घँस्‍यैटी सर्वनाशम लैजैठन। 10काकरकि धनसम्‍पत्तिक मोह नै सब किसिमक खराबीक जर हो। कत्रा जन त धनक ल्‍वाभले विश्‍वासमसे पाछ फे हटरल, ओ आपनम अपन्‍हे दुःख खन्ह्‍यारख्‍ल।

तिमोथीह आदेश

11तर टुँ त परमेश्‍वरक जन हुइलकओर्से ओसिन बातसे दूर रहपर्ठा। टुँ परमेश्‍वरह खुशी लग्‍ना असल जीवन जिएपर्ठा, ओ विश्‍वासयोग्य, प्रेमिलो, सहनशील ओ नम्र हुइपर्ठा। 12सेना लडाइँ करअस अनन्‍त जीवनक इनाम पाइक लाग विश्‍वासक लडाइँ मजासे लडो, काकरकि यिह जीवनक लाग परमेश्‍वर टुँहीन बलैलह। ओ यिह जीवनक सम्‍बन्‍धम टुँ धेर जन्‍हक सामुन्‍नेम आपन विश्‍वासक बारेम स्‍पष्‍ट रूपले बट्‌वइलक फे हुइटो। 13सब चिजह जीवन देहुइया परमेश्‍वर ओ पन्‍तियस पिलातसक सामुन्‍नेम सत्‍य साक्षी देना ख्रीष्‍ट येशूक आघ#यूह १८:३७ 14मै टुँहीन यी आज्ञह हमार प्रभु येशू ख्रीष्‍ट फेदोस्र नैआइट्‍सम पूर्ण रूपले पालन करक लाग कहटुँ। ओसिक कर्बो त कुई फे टुँहीन दोष लगाइ नैसेक्‍नेहो। 15प्रभु येशू ख्रीष्‍टह ठीक समयम परमेश्‍वर जो फेदोस्र पठुइयाबाट। परमधन्‍य परमेश्‍वर जो सारा शक्तिक मालिक, राजाहुँकन्‍हक राजा ओ प्रभुहुँकन्‍हक प्रभु हुइट। 16उहाँ केल नैमुट, ओ उहाँ कुई फे पुग नैसेक्‍ना भारी चम्‍कना ज्‍योतिम रठ। उहाँह ना त कुई देख्‍लहो, ना त कुई द्‍याखसेक्‍ठा। सारा शक्ति ओ आदर सड्‌डभर उहाँकऽ हो। आमेन।

17यी संसारम धनी रहल मनैन घमण्‍डी जिन होओ कैक कहो। अनिश्‍चित धनसम्‍पत्तिम नाहीँ तर सब थोक प्रशस्‍त हिसाबले हमन उपभोग कर देना परमेश्‍वरम भरोसा करो कैक हुँकन सिखाओ। 18आनक भलाइ करपर्ठा, असल कामम धनी हुइपर्ठा, खाँचोम परल मनैन सहायता देहपर्ठा ओ आपनठे रहल चिज औरजहनसे बाँडचुँड करपर्ठा कैक हुँकन निर्देशन देओ। 19असिक हुँक्र आपनऽ लाग सत्‍य धन जम्‍मा करहीँ, जौन धन अइना जीवनक लाग एक पक्‍का जग बनी, ओ हुँक्र सत्‍य जीवनक अनुभव करहीँ।

20हेरो तिमोथी, टुँहार जिम्‍मम परमेश्‍वरक देहल चिजिक मजासे सुरक्षा करो। परमेश्‍वरक अपमान हुइना मूर्ख बातसे ओ कत्रा मनै “ज्ञान” कैक मानल झूट बातसे अलग रहो। 21काकरकि असिन बातक पाछ लाग्‍क कत्रा जन विश्‍वासमसे पाछ हट्‍रल।

टुह्र सबजन्‍हकम प्रभुक अनुग्रह पलरह।

Currently Selected:

१ तिमोथी 6: thl

Highlight

Copy

Compare