Mark 9
9
1Jesus uqaqhimmaaqtuq, “Ilumuuqtunga, ilangit nangiqtut hamaniittut tuqujunaittut takutinnatik Godim Atan'nguvianik tikittumik hakugiktumik!”
Jesus Aallanngurnia
2Siksit uplut anigurmata, Jesusim maliqujait Peter, James Johnlu kinngingniup qaanganut. Qungiaqtillugit, Jesusim itquhia aallannguqtuq, 3aannuraangit qakuqhiqpiaqhutik, qakutqijauliqhutik qakuqhitilirutinit 4Haqqittuk Elijah Moseslu uqaliqhutik Jesusmun.
5Peter uqallaqtuq, “Ilihaijii, nakuuqpiaqtuq hamaniinnapta! Uqqurmiuvikhaliuqta pingahunik—atauhiq ilingnut, atauhiq Mosesmut atauhirlu Elijahmut.” 6Imaa uqaqtuq naluqhalirami qanuq uqallagiami, iqhiurliqpiaramik.
7Talvangaanit nuvuja taaqhitijuq, nipilu nipliqhuni nuvujamit, “Una piqpagiara Irnira. Naalaglugu.” 8Tatjainnaq, avatiktik qiniramikku, Moses Elijahlu maqaikhutik. Jesustuaq avaliiqatigiplugu.
9Atqauliramik kinngingnirmit, uqautigiqunngitaat inungnut takujamingnik makitqaaqtinnagu Inuum Irnia tuqunganirminit. 10Uqauhirinngittaat, inmingnut kihimi apiqqutigiqattaqtaat qanuq tukiqarmangat “makinniq tuqunganirmit.”
11Apiringmijaat, “Huuq ilihaijit maliganik uqaqhimmaaqqat Elijah utiriaqaqtuq Christ qaitinnagu?”
12Jesusim kiujait, “Elijah qailraarniaqtuq ilaa upalungaijariaqturluni. Huli Titiraqhimajut uqaqhimajut Inuum Irnia naglikhaqtukhaujuq pittiaqtaunngillunilu? 13Uqautivaffi, Elijah qaijariiqtuq, pittianngittaat, nalauttaaqhimajutut Titiraqhimajuni.”
Jesus Nakuuhipkaijuq Agiuqtumik
14Utiramik malirutinut, takujut inugiaktunik, ilangit ilihaijiujut maliganik qanngutiqaqtuq. 15Inuit takugamitku Jesus arliruttaktut aqpaaliqhugu.
16“Humik qanngutiliqturaaluit?” Jesusim apirijait.
17Angun inungnit uqaallaktuq, “Ilihaiji, qaritijara irnira nakuuhipkaquplugu ilingnit. Agiuktuq uqalimaiqhuni. 18Tigujaugangami agiunmit, ulrutitauvaktuq nunamut. Qanirmigut qapualaqipluni qaivraalihuni timaalu qirattaqhunilu. Apirijaraluatka malirutitit kihimi nakuuhipkailimaittut.”
19Jesusim kiujait, “Ukpiruhunngittut uplumimiut inuit! Qanuraaluk najuriaqaqpihi? Qanuraaluk qinugihunngittukhauvik iliffingnik? Qarritihiuk inuuhuktuq.”
20Qarittijaat inuuhuktuq. Agiutim takugamiuk Jesus, igittaa nutaraq ulrutittaa qiqitittugu nunainnami in'ngutaaliqpiaqhuni qapualiqhuni qanirmini.
21Jesusim apaapa apirijaa, “Una qanuq akuniutigijumik imaitpaliqqa?”
Kiujuq, “Mikkaunirminit. 22Agiutim ikualarnirmut imarmulluuniit igitpagagaa, tuqunnahuaqhugu. Nagligitigut ikajuqtigut, pittaruvit.”
23“Qanuq uqaliqqit, ‘Pittarumaa’?” Jesusim apirijaa. “Hunaliqaak ajurnaittuq inuk ukpiruhukkumi.”
24Qiahijuq angut, “Ukpiruhuktunga, ikajunga ilaani naluqhaliqpakkama!”
25Jesus takugamigit inuit amigaiqpalliajut, uqautijaa agiun. “Ilvit tuhaahuiqtitat uqaruiqtitat una, uvanga nutararmit anigguit utirvigingillugu!”
26Agiut irialajuq igittugu inuuhuktuq qiiqitittugu qimaktaa. Tuqujutut ilipluni. Inuit uqamalaqiut, “Huiqtuq.” 27Jesusim kihimi algaagut tiguplugu makititaa. 28Kinguagut, avaliinngaqatigiliramigit igluqpangmi malirutini, apirijaat, “Huuq anipkalimaitpitigu agiun?”
29Jesus kiujuq, “Taimaatun agiuktun qingautikkuinnaq anipkaktauvaktut.”
Jesusim Nalauttaqtaa Tuquvikhani
30Talvanga aullaramik, Galileekuuqtut, Jesus ilitturijaujumanngittuq talvaniinnirminik, 31avaliingaqatigiumagamigit malirutini ilihautilugit. Uqautijait, “Inuum Irnia iqqutauluni tunijaunialiqtuq akiraminut. Tuqutauniaqtuq kihimi pingahuni upluni makinniaqtuq tuqunganirmit.” 32Kangiqhianngittugaluit kihimi kamaguhukkamik apirinngittaat.
Malirutit Aanngiqatigiiktut
33Tikinamik Capernaummut igluqpangmungaramik apirijait malirutini, “Humik uqauhiqaqqihi pihuktilluta?” 34Kiunngittut qangutivakkamik kina angitqijaujakhaa. 35Ingittuq qaitkuplugit 12lut malirutini, uqallaktuq, “Kinaliqaak hivulliujumajuq kingulliujukhaugaluaq kivgaqtuiluni tamainnik.”
36Nutaraq akunimingnut ilijaa. Tigumialiqhugu uqautijait, 37“Kinaliqaak tunngahuktittiuq nutarannuami pitjutiplunga tunngahuktittiuq uvamnik, kialiqaak tunngahuktitkuminga tunngahuktitijuglu Angutimnik tujuqtimnik.”
Jesus Atianik Atuqtuq
38John uqallaktuq Jesusmun, “Ilihaijii, takujugut inungmik atuqtumik atirnik agiutinik piijaipluni, nutqaqtitaqqut ilaunnginmat uvaptingnut.”
39“Nutqaqtittailugu!” Jesusim uqautijait. “Kinaliqaak arlirnaqtunik pijuq atira atuqhugu uvamnik piunngittunik uqauhiqarunaittuq. 40Akigaqtuinngittuq uvaptingnik, uvaptingnuuqtuq. 41Tunijauguvit qallunmik imarmik ilaugavit Christmun, ilumuqtumik uqautigiffi, tamna inuk aittuqtauniaqtuq.
42“Nutararmik ukpiruhuktumik uvamnik huinniqipkaiguvit, nakuutqijauniaqtuq igittauguvit tarijurmut ipiqtaulutit qunguhikkut uqumaittumut. 43Algakpit huinniqipkakkatit kipilugu. Nakuutqiaq qilangmut itiriami iglupiaqturlutit qamilaittumut ikualaaqtumunngittuq malrungnik algaqarlutit!#9:43 Ingilraarnittat ilangit titiraqhimajut imaatut 44 ‘qupilruit tuqujuittumi ikualaaqturlu qamijuittumi.’ 45Itigakpit huinniqipkakqatit, kipilugu. Nakuutqiaq qilangmut itiriami iglupiaqturlutit qamilaittumut ikualaaqtumunngittuq malrungnik itigalingmik.#9:45 Ingilraarnittat ilangit titiraqhimajut imaatut 46 ‘qupilruit tuqujuittumi ikualaaqturlu qamijuittumi.’ 47Ijiikpit huinniqipkakqatit, ijingiglutit. Nakuutqiaq itiriami Godim Atan'nguvianut atauhiinnarmik ijiqarluni igitaunirmit qamilaittumut iqualaaqtumut malrungnik iijiqaqhuni, 48‘qupilruit tuqujuittumi ikualaaqturlu qamijuittumi.’
49“Tamaita uktuqtauniarmata ikualaaqtukkut. 50Tarjuq nakuujuq. Kihimi tipairumi, qanuq tarjuqhungnilaqiffaarniaqqa? Tarjuqtut ittuqaqtukhaujuq akunniffingni haimanaqtumik inuuqatigiigluhi.”
Currently Selected:
Mark 9: AQ
Highlight
Copy
Compare
Share
Want to have your highlights saved across all your devices? Sign up or sign in
Canadian Bible Society
Learn More About Atuutit Qin'ngautillu
