Mark 10
10
Katuhiqhirniq Avinnirlu
1Jesus aullarmiuq Capernaumit Judeam aviktuqhimanianut kivataanullu Jordan Kuugaata. Inuit tahamanirmiut upaqattaqtaat ilihautihimmaaqtait.
2Phariseet ukturumaplugu apirijaat, “Naammakpaa angutip nuliani avitkumiuk?”
3Jesusim kiujait apiriplugit, “Qanuq Moses uqaqhimava maligani avinnikkut?”
4“Humaaginngittaat,” kiujaat. “Uqaqhimajuq angutip titirarvigilugu avittaqtaa.”
5Jesusim kiungmijait, “Una maligaq titiraqtaa imaatun pitqupluhi uummatihi naptuvallaarmata. 6Kihimi ‘God angutiliuqtuq arnaliuqhunilu nunaliurnirminit. 7Taimaa angun qimakpaktuq angajuqqaaminit nulianikhuni, 8Malruk atauhinguqhutik.’ Malrujungnairmanik atauhiuliqhutik, 9avititauttailutik Godim katitaik.”
10Uvattiagunngurmat avaliiramik igluqpangmi, malirutaita apiringmijaat. 11Uqautijait, “Inuup nuliani avitkumiuk nulianikhuni aallamik aallatuqtuq. 12Arnaup avitkumiuk aippani aallamik aippanikhuni, aallatuqtuq.”
Jesusim Aktuqtait Nutaqqat
13Angajuqqat nutaqqatik aggitijait Jesusmun aktuqtauquplugit. Kihimi malirutaita taniqtait inavirilirmatjuk.
14Jesusim takugamigit, ninngautijait malirutini. Uqautijait, “Nutaqqat uvamnut qailit. Nutqaqtittailugit! Pigingmatjuk Godim Atan'nguvia tapkuat. 15Ilumuuqtunga, kialiqaak Godim Atan'nguvia pinngitkumiuk nutaraqtut itilimaitaa.” 16Talvanga nutaqqat iqitait algangmigut aktuqhugit niaquitigut qingautijait.
Angun Maniktujuq
17Jesus aullaliqtillugu Jerusalemut, angun aqpaqhuqtuq hiitquqtuq inminut, apiripluni, “Ilihaiji Nakuujutit, hulijariaqaqqik inuuhiqariami nunngulaittumik?”
18“Huuq nakuujumik taivinga?” Jesusim apirijaa. “God inmituaq nakuujuq. 19Kiuniaripkit, ilihimajatit maligait: ‘Inuaqtailutin. Aallatuqtailutin. Kukiktailutin. Iqulutin uqaqtailutin. Inungnut iquttailutin. Nanngarilugit angajuqqaatit.’”
20“Ilihaiji,” angun kiujaa, “Maliktakka tamaita ukua maligait nutaraunimnit.”
21Tautukhugu angun, Jesusim piqpagiliraa. “Huli atauhirmik pijakhaqaqtutit,” uqautijaa. “Niuvrutigijaqturlugit tamatkiqpiarlugit tamajatit mangillu tunilugit iliarjunut, akitujunik piqarniaravit qilangmi. Ahiit, maliglunga.”
22Angutip akkuliangik ahiruqtuk, irngumakhuni ahinungaujuq tamajaqquqtugami.
23Jesus qiviaqtuq malirutiminut, “Ajurnaqpiaqtuq maniqquqtujunut itiriami Godim Atanguvianut!” 24Arliguttaktut. Jesusim uqautingmijait, “Nutaqqatkaa, ajurnaqpiaqtuq itiriami Godim Atan'nguvianut. 25Imaa inmat, ajurnaitqiaq nuvihijaami camelmik mitqunmut maniqquqtujup itiqtarnianit Atan'nguvianut Godim!”
26Arliruttakpiaqtut. “Kinami annautjauniaqqa?” apiqhiut.
27Jesusim tautukhugit uqallaktuq, “Inuupluni uqarluni, piuminaittuq Godikkuunngitpat. Hunaliqaak piuminaqtuq Godikkut.”
28Peter nipliqtuq, “Hunaijaqpiaqhuta maliktugut ilingnik.”
29“Hii,” Jesusim kiujaa, “tamaita inuit qimaktut igluminit, qatangutiminit, angajuqqaminit, nutaqqaminit, tamajaminit, pitjutigiplunga Tuharnaarnaqtunullu, 30tunijauniaqtut haannat avatqullugit igluqanngik, qatangutinik angajuqqanik nutaqqanik tamajaniglu, naglikhaqtitaulunilu. Nunarjuakhami nungulaittumik inuuhiningniaqtuq. 31Amihut hatja hivulliujut kingulliulirniaqtut, kingulliujullu hivulliiulirlutik.”
Jesusim Nalauttaarmijaa Tuquvikhani
32Jerusalemungauliqtut, Jesus hivuniqhuijuq. Malirutait arligutaktut, inuittauq kingumingni iqhiuqtut. 12lu malirutini katittugit, Jesus unipkarilirmijaa pijauniarmirminik. 33“Naalagitti,” uqaqtuq, “Jerusalemungauliqtugut, talvani Inuum Irnia tunijauniaqtuq hivulliuqtiinnut minihittaqpait ilihaijinullu maliganik. Tuqutauquniaqtaat ahiit tunilugu Romemiunut. 34Tapkuat mitautiginiaraat, tivvuaqturlugulu, unullaglugu, tuqqullugu, kihimi uplut pingahuanni makinniaqtuq.”
Jesus Ilihautjiuq Ikajuqtuinirmik
35James Johnlu Zebedium irniik, qaijuk uqaqatigiplugu. “Ilihaiji, ikajuqtaujumajuruuq ilingnit.”
36“Qanuq tukhiqqitik?” apirijaik.
37Kiujuk, “Ingitkuvit ikhivautarjuarnut, ingittumajuguuq nanngarijaunirmi haningni, atauhiq taliqpingni aippa haumingni.”
38Jesusim kiujaik, “Nalujumik apiqhiutik! Niuqqarniaqqitiik qallunmit naglighaaqnaqtumit niuqqarvigiuqiliqtamniit? Baptaiqtauniaqqitiik baptaiqtaunirmit naglighaaqnaqtumiit baptaiqtauviginialiqtamnit?”
39Kiujuk, “Ii, pittaaqtuguk!”
Jesusim kiunginnaqtaik, “Niuqhiniaqtutut-ittuq mamaitpiaqtumit qallunmit baptaiqtaulutiglu baptaiqtaunimnit nagliknatukkut. 40Kihimi uqarvikhaqanngittunga kina ikhivattariakhaa taliqpimni haumimniluuniit. Godim iniriiqhimajait tahapkua ikhivavikhak niruaktaminut.”
41Qulit malirutaita tuhaagamikkik James Johnlu taimaatut apiqhiuk, quviahugunaiqtun. 42Jesusim tamaita katiqujait, “Ilihimajahi atan'ngujaujut umani nunarjuami atanniqtuivallaaqtut inungnik, atan'ngujallu hukhamaarinngittugit atanniqtuqtatik, 43iliffi kihimi taimaittukhaungittuhi. Kinaliqaak hivulliuqtiujumajuq kivgaqtuijukhaujuq iliffingnik, 44kinaliqaak iliffingnit hivulliuqtiujumajuq kivgaqtuijariaqaqtuq tamaffingnik. 45Inuum Irnia kivgaqtuqtaujaqtunngittuni qaihimajuq kihimi kivgaqtuijaqtuqhuni tuqutaujaqtuqhuni inmi inuuhini akiliqtuutigiplugu inungnut amihunut.”
Jesusim Nakuuhipkaqtaa Takpiittuq Bartimaeus
46Tikinnamik Jerichomut. Jesus malirutinilu igluqpaqarvingmit qimaliramikku, inuit amihut malilingniliqtut. Takpiittuq iliarjuk Bartimaeus (irnia Timaeus) ikhivajuq apqutim haniraani. 47Bartimaeus tuharami Jesus Nazarethmiutaq qaglijuq, tuqhulauqtuq, “Jesus, Davidim Irnia, nagliginga!”
48“Nipairit!” amihut inuit tuqhulajaat.
Nipiqqutuhijuummiqhuni tuqhulauqtuq, “Davidim Irnia, nagliginga!”
49Jesusim tuharamiuk nutqaqtuq uqallakhuni, “Qailiguuq.”
Qaitquvaat takpiittuq. “Aliattagit, Qaitqungmatit!” 50Bartimaeus makittuq atigaiqhuni Jesusmungaujuq.
51“Huliquvinga ilingnut?” Jesusim apirijaa.
“Ilihautji,” takpiittuq uqallaktuq, “Tautuktaalirumajunga.”
52Jesusim uqautijaa, “Aullalirit, ukpiruhungniqqit nakuuhipkaqtaatit.” Tatjainnaq takpikhijuq, maliliqhugu Jesus.
Currently Selected:
Mark 10: AQ
Highlight
Copy
Compare
Share
Want to have your highlights saved across all your devices? Sign up or sign in
Canadian Bible Society
Learn More About Atuutit Qin'ngautillu
