Mark 6

Nazarethmiut Piumanngittaat Jesus

1Jesus aullarami talvanga malirutinilu utiqtuq Nazarethmut, nunagaluaminut. 2Sabbathngurmat ilihautjiliqtuq angaatjuvingmi, amihut arligutaktut. Apiqhiut, “Humit ihumattakpa hapirnaqtuniglu havakaanginnaqqa?” 3Iurijaat, “Tamna hanajiunnginnaq, irnia Maryim aniqatait James, Joseph, Judas Simonlu. Najait hamaniiqataujullu.” Ihuiguhukpiaqtut ukpiriumanngittugulu.

4Jesusim uqautijait, “Nalauttaiji nanngarijaujuq humiliqaak nunaminiunngittuq kihimi ilavalungmini qitunngaminilu.” 5Ukpiruhunnginmata, arlingnaqtunik pilimaittuq kihimi kahaktait tapkua ikittut inuit aanniaqtut nakuuhipkakhugit. 6Inmi arlirutakhuni ukpiruhunnginniinut.

Malirutit Tiliuqtaujut Aullaqtitauplutik

Jesus igluqarvinunngauqattaqtuq, inungnik ilihautjipluni. 7Qaitqujait 12lut atauttimut maliktini malruullaaktittugit tunijait piijaitjutikhanikhugillu agiurutinik. 8Hunaittumik aullaqujait ajauppiannginnaarlutik—niqaittumik, puukattaittumik maniittumiglu. 9Kamiinaqujait aannuraalgiaqunngitait atuqtamingnituaq.

10Uqautijait, “Humungaugaiguffi iglumi atauhirmiinnginarluhi aullaqtinahi.” 11Tunngahuktitaunngitkuffi naalaktauluhiluuniit itikkakkit hiuraijarlugik, naunaitkutauniarmat tapkununga inungnut qanuriliujuqarniarninganik.

12Malirutait anijut, uqautiplugit inuit takujatik huinniqqutaijaquplugit Haallutiglu Godmun. 13Agiuktuniglu piijaivaktut amihuniglu nakuuhipkaqtittivakhutik nanukhugit uqhurmik olivenit.

John Baptaiqtium Tuqutjutaa

14Herod Antipas, king'ngujuq, tuhaqtuq Jesusmik inuit uqarilirmatjuk. Ilangit uqaqhutik, “Unaqaak John Baptaiqti makittuq tuqunganirmit. Taimainmat arlingnaqtunik pivaktuq.” 15Aallattauq, “Nalauttaijiujuq Elijah.” Aallallu uqaqhutik, “Nalauttaijiujuq ingilraatun nalauttaijiuvaktutut.”

16Herod tuharami Jesusmik, uqaqtuq, “John, angun niaquiqtitauhimajara, makitpuq tuqunganirmit.”

17Hivuani Herod itiqtauhimangmagu John ikajuqtuqhugu Herodias. Angajungmi Philip nuliaraluanga, kihimi inmi nuliariliqhimajaa. 18John uqaqhimajuq Herodmut, “Godim maligainnut ihuanngittuq angajuvit nulianganik nuliaqaliravit.” 19Taimangaanit Herodias qinugijaa John tuquttumaliqhugu. Herodmit angiqtauhimaittumik pilimainami. 20Herod pimmarigamiuk John; ilihimagamiuk angun nakuujuq ukpiruhukhunilu, munaqpagaa. Uqaqatigigangamiuk John, Herod ihuiguhuktuq, kihimi huli naalakhimaaqtaa.

21Herodias pivikhaniktainnaqtuq Herod anniviani. Herod niripkaijuq gavamaujunit, angujaktinik Galileemilu atangujanik. 22Pania atiliktauq Herodiasmiglu itiqtuq numiqhuni quviatautiplugit Herod kaitqujauhimajullu. “Humigliqaak tukhirit,” king uqaqtuq arnarmut, “tuniniaqqara.” 23Uqariijaqhunilu, “Humigliqaak tukhiutingnik tuniniaqtagit, aktilaanganut avvaanik atan'ngujauvimnik!”

24Anigami apirijaa amaamani, “Humik tukhirlanga?”

Amaamata kiujaa, “Tukhiruk niaqua John Baptaiqtium!”

25Qilamiuqhuni arnaq utiqtuq kingmun, “Piumajara niaqua John Baptaiqtium, hatja, uungaijaivingmi!”

26King mamiagijait uqauhiraluani; uqarijaqhimagami qaitqujauhimajuqaqtillugu, qingilimaiqtaa panini. 27Tatjainak tilihijuq tuqutirijimik itiqtauvingmunngauquipluni, niaquiquplugu John qaritiquplugulu. Tuqutirijim niaquiqtaa 28aggitiplugu niaqua uungaijarvingmi tunijaat arnarmut, ahiit tuningmijaa amaamangminut. 29John malirutaita tuharamitku, timaa aijaat iluviqhugulu.

Jesus Niqhiuqtuq 5000nik

30Ilihautjijiit utiqtut Jesusmun ilihautjivingmingnit unipkarvigiplugu. 31Jesusim niplirvigijait, “Nipailrumut unaguiqhiriaqtuqta.” Taimailijuq inuit inugiakpallaannginarmat niripkaktitaulimaiqhutiglu.

32Umiakkut aullaqtut nipailrumut avaliingarnaqtumik. 33Amihut kihimi ilitaqhijut aullaqtiqtunik amihullu inuit igluqarvinit aqpaqhuqtut hinaagut hivunniqhukhugit. 34Jesus qajailrinnami takujait inugaaluit, nagligijait imnaitut imnailirijiittutut ilingmata. Ilihautiliqtait amihunik.

35Malirutaita unniutijaat unnuktiliqtinnagu, “Inuilruq hamna unnuliqhunilu. 36Inuit ahinungautqukkit igluqarvinut niriaktuqulugit.”

37Kihimi Jesus uqaqtuq, “Ilvit niqhiukkit.”

“Humik?” apiqhiut. “Havagaakpariaqaqtugut niuvrutikhaliurluta niriurutikhanik inugaalungnik!”

38“Qaffinik muqpaujaqaqqit?” apirijait. “Ilitturinahuarit.”

Qaiffaaramik unniutijaat, “Tallimanik muqpaujalik malrungniglu iqalungnik.”

39Jesusim uqautingmijait malirutini inuit ingitqulugit iviqarnirmi. 40Inginnamik 50tiullaaqtaqhutik 100ngullaaqhutigluuniit. 41Jesusim pijait talimat muqpaujat malruglu iqaluit qingautiplugit. Avgukhugit muqpaujat malirutiminut tuniuqqaqhimaaqtait niqhiurutigiplugit inungnut. Iqaluillu avgukhugit inungnut. 42Aqiatturmata, 43malirutait pukuktut arjujaujunik muqpaujanik iqalungniglu tatattiplutik 12nik puunik. 44Atauttimut 5000 angutit qitungaillu niqhiuqtaujut tapkunanga muqpaujanit!

Jesus Immam Qaangani Pihuktuq

45Nirijariiqmata Jesusim malirutini umiarmut ikiffaaqujait ikaujaamini Bethsaidamut, inuit angilrauquplugit. 46Uqallakhuni ilaanittauq maniilrumut qin'ngariaktuqtuq.

47Unnuami, malirutait umiarmiittut tattip qitkani, Jesus avaliittuq nunami. 48Takujait ajuqhaliqtut, paurahurittut anuriraalungmi. 3mungaqtumi uplaannuami, Jesusim upaktait, pihukhuni immam qaangagut. Qaangiqniaqhimajaraluangit. 49Kihimi takugamitku irrialajut iqhiuliqhutik anirniunahugijaat tuqungajumit. 50Iqhittakpiaqtut tamarmik takugamitku.

Jesusim uqautiinnaqtait, “Iqhiuqtailuhi. Hapiruiluhi! uvangaujunga!” 51Umiarmut ikigami, anuraiqpiaktuq. Arliguttaktut, 52kangiqhiannginnamitku arlingnaqtuq tautukpaktaqtik muqpaujanik. Ummatait qutjaumavallaramik kangiqhiajamingni.

53Ikaaramik tahirmik, tulaktut Gennesarenmi umiaq ipiqhugu. 54Nuijut. Inuit ilitaqhiinaqtut Jesusmik, 55aqpaqhulaqijut humiliqaak karitjiplutik aanniaqtunik nalajunik. 56Humungaunianut—igluqarvini maniqqamiluuniit—qaritjiqattaqtut aanniaqtunik hilami niuvirviujunut. Jesusmun uqaqtut, “Aanniaqtut aktuqtitlugit aannuraavit nigjainnik.” Taimaita aktuqhiut Jesusmik nakuuhijut.

Currently Selected:

Mark 6: AQ

Highlight

Copy

Compare