Mark 4

Nauttiiji Nauttiijuq

1Jesus ilihaijilirmiuq tahium hinaani. Inugiakhiqpiarmat avalugamitku, ikijuq qajarmut. Ikhivainnaqtuq inuit hinaanitillugit. 2Ilihautijait atuqhuni amihunik unipkanik uqarvigiplugit:

3“Naalagit! Nautiiji naujukhanik hiamitiriaktuqtuq. 4Hiamitilluni nunamut, ilangit katagaktut pihugvingmut qupanuanit nirijauplutik. 5Ilangittauq katagakhutik nunaqavjangnirmut ujaraliaqarnirmut. Nauliinnaqtut nunainnaqarnirmi. 6Kihimi hiqiniup paniqtitait tunngaviqarluanginnamiglu tuquinnaqtut. 7Ilangit nauttiakhat katagaqtut kakillaqarnirmut nauliraluaqhutik ipititaujut kakillarnaqtunit naunngitpiaqhutik niqikhanik. 8Ilangittauq katagaktut nunagiktumut, nauliqhutik, nauttiaqhutik 30nik, 60nik 100niglu avatqutiplutik nauttiqtamingnit!” 9Uqallangmiuq, “Kinaliqaak hiutilik tuhaatjutikhalik naalaktukhaujuq kangiqhialunilu.”

10Uvattiarunngurmat, Jesus avaliiqatigigamigit qulit malgurlu maliktini tapkualu iqataujut, apirijaat qanuq tukiqariakhaa unipkaat.

11Kiujait, “Tuhaqtitauvuhi nalunaqtugaluamik Godim Atan'nguvianik. Unipkakpaktunga hilatiptingniittunut uktuutitigun, 12uqauhiit tuhaktaujaangini:

‘Takugangamik pijamnik,

ilittunaittut.

Tuharaangamik uqaqtamnik,

kangiqhiajunaittut.

Ahiagut, uvamnut haanniaqtut

huinniqutaiqtaulutik.’”

13Jesus uqallautingmijait, “Kangiqhianngitkuviuk unipkaaq, qanuq kangiqhianiaqqigit aallat unipkat? 14Nauttiiji nautiivaktuq Godim uqauhia tikiutiplugu aallanut. 15Nauttiakhaq kataktuq pihugvingmut uktuutaujuq tapkuninga tuhaajunik unipkamik, kihimi Tupilangmit tikilviunnginakhuni aqhaaqtaupluni tuhaktaulihaaq. 16Nauttiakhaq kataktuq ujaraliaqarnirmut uktuutaujuq tuhaajunik unipkamik tuhaqhugu quviahukhutik. 17Kihimi tunngaviqarluannginnamik naukhaajuittut. Haatpaktut ahinut ajuqharnirmit ajuqhaqtitaugangamigluunniit ukpiruhungnirmingnit Godim uqauhiinnik. 18Nauttiakhaq kataktuq kakillaqarnirmut uktuutaujuq tuhaajunik Godim uqauhianik, 19kihimi tuhaajait tammainnaqhutik ihumaaluutainnit, maniliurumannirmit, hunaqarumanirmit taimanga ahiat naujuitput. 20Nauttiakhaq kataktuq nakuujumut nunamut uktuutaujuq tapkuninga tuhaajunik atuliqhugu Godim uqauhia ilaliutijut nauttijunut 30nik, 60nik 100niglu avatqutiplutik nauttiqtamingnit!”

Unipkaaq Qullirmik

21Jesusim apiringmijait, “Qullirmik ikittijuqarniaqqaa aahiit ililugu igliup qattaupluuniit ataanut? Imannaq! Qulliq ilijauvaktuq ikpangmut, qaumaqutauniarmat. 22Hunaliqaak iiqtauhimajuq qakugu hagjaiqtauniaqtuq iiqhimajut hagjaiqtaulutik qaumanirmut. 23Kinaliqaak hiutilik tuhaatjutikhanik naalaktukhaujut kangiqhialutiglu.”

24Ilaurijuq imaa, “Naalattiarluhi tuhaajaffingnik. Naalattiaruvit, kangiqhiajumirnirmik tunijauniaqtutit—tunijaujumirniaqtutit. 25Tapkununga naalakpaktunut ilihautimnik, kangiqhiajumirnirmik tunijauniaqtuhi. Kihimi tapkununga naalanngittunut kangiqhianiat mikijugaluaq aqhaaqtauniaqtuq.”

Nauliqtumik Unipkaq

26Jesus uqaqturlu, “Atan'nguvia Godim nauttiijitut ittuq hiamittirijuq nunamut. 27Upluummaat unnugiarlu, hiniktillugu tupaumatilluguluuniit, nautiiliqpaktut qanuq kangiqhianngittait. 28Nunarjuam inmi naupkaqpagait. Hivullirmik ivia naupluni, ahiit niaqunnguqhuni kingullirmik muqpaujakhaliugakhannguqhuni. 29Muqpaujakhanngurangata kipluqhugit havigjuamut katitiqhugit, katitirinnaqhingmat.”

Mustardmik Nauttiamik Unipkaq

30Jesus uqaqtuq, “Qanuq unipkarniaqqigu Atan'nguvia Godim? Kitumik unipkarlunga. 31Mustard nauttiakhaatut ittuq ilihimajuq nunamut. Mikitqijaujuq nauttiakhanit tamainnit, 32nauttianit kihimi angitqijauliqpaktuq; takijunik nauviqaliqhuni, qupanuat upluliurvikhait tarrarnirmi.”

33Jesus amihunik unipkaqpaktuq uktuutiqakhunilu ilihautiumaplugit inuit kangiqhiapiaquplugit. 34Inungnut uqautjigangami ilihautjijuittuq unipkaqanngituni; kihimi kinguani, avaliiqatigigaangamigit malirutini, kangikhiatjuhiuqpagait.

Jesus Piqtuirutiuq

35Unnulirmat, Jesus uqautijait maliktini, “Ikauta tahiup akianut.” 36Jesus malirutinilu qajarmut ikijut aullaliqhutik, qimakhugit inuit (aallat qajat malingniktut). 37Atauttikkut piqhilaqiqpiaqtuq. Mallilaqiqpiarami qajaq immaktiliqtuq.

38Jesus hiniktuq kinguani akitiqaqhuni. Tupaaqtaat, “Ilihaijii, ihumalunngitpiit imminnialiqtuguut?”

39Tupakkami Jesus, anuraiqtitaa uqallaqhunilu malingmut, “Anurairli! Maliirli!” Atauttikkut anuraiqtuq, uqhuaqpiaqhuni. 40Apiringmijait, “Huuq iqhiuqpihi? Ukpirniqannginnaffii?”

41Maliktiit kamaguhuliqpiaqtut. “Kinauva una angun?” inmingnik apiqhuiliqtut. “Anurip maliuplu naalaktaat!”

Currently Selected:

Mark 4: AQ

Highlight

Copy

Compare