Mark 3

Jesus Mamittijuq Unaguiqhirvingmi

1Jesus itiqtuq angaatjuvingmut takupluni angunmik igluanik algagluktumik. 2Sabbathngurmat, Jesusim akiraita iigiqpiaqtaat. Mamititpagu angutip algaa, ihuigiumajaat havangnigaqhugu Sabbathmi.

3Jesus uqallaktuq angunmut algagluktumut, “Qaiguit nangirit hivun'ngani inuit.” 4Haattugit akirani apirijait, “Nakuunirmik pittaqqiik Sabbathmi, upluuvaluuniit nakuunnginnirmik? Upluuvaa annautjijaamii inuuhirmiik huungijarluguluuniit?” Kiutjutikhaittut.

5Iigijain ningakhuni inngumakhunilu nagliktaitpiarmata. Uqallaktuq angunmut, “Ihaagit.” Angutip algani hagjaiqtitaa, algaa nakuuhijuq! 6Tatjainnak Phariseet qimaktut upakhugit ikajuqtuijut Herodmik ihumakhakhiuliqhutik qanuq Jesus tuquttangani.

Inuit Jesus Maliktaat

7Jesus tahirmungaujuq malirutinilu, amihullu inuit maliktut. Qaijut humiliqaak Galileemit, Judeamit, 8Jerusalemit, Idumeamit, kivataanit Jordan Kuugaanit, tahamanillu Tyrem Sidonlu avatainnit. Tuhaajauliramik pivaktuq arlinaqtut ungahiktumit amigaitut inuit takujaqtuivaktut.

9Jesusim tiliuqtait malirutini qajarmik upalungaikhimaquplugit avalujautailijami inungnit. 10Nakuuhipkaivaktuq amihunik inungnik, tamaita inuit aanniaqtut niriukhutik taatjaqtut kahagumaplugu. 11Tapkua agiuktun takugaangamikku, ilummiutaita nunamut ulrutitpagait hivunganut irialaplutik, “Ilvit Godim Irnia!” 12Jesusim huaktuqtait kinaujakhaa uqaqtailiquplugu.

Jesusim Niruaktait Qulit Malruglu Ilihautijijukhanik

13Kinguagut Jesus majuaqtuq kin'ngingnirmut tuqhulauqhugit maliqujaminik. Upaktaat. 14Tikkuaqtait qulit malruglu taiplugit ilihautjijikhaminik. Piqatigijakhaat aahiit uqautjiuniaqtut, 15tuniniaqhugit pijunnarnirmik agiurutiijaittalirlutik. 16Ukua ilitarijait:

Simon (atiqtaa Petermik),

17James Johnlu (irniik Zebedium, kihimi Jesus atiruaniktaik “Irniik Kalluup”),

18Andrew,

Phillip,

Bartholomew,

Matthew,

Thomas,

James (irnia Alphaeus),

Thaddeus,

Simon (Canamiutaq),

19Judas Iscariot (kinguagut iqqutihimajaa).

Jesus Tupilaglu

20Atauhiaqhuni Jesus igluqpangmut itiqtuq, inugiakhiinnarmijuq Malirutinilu nutqarvikhaiqhutik nirijaamingni. 21Ilaruhiita tuhaagamitku, ahivautinahuaqtaat. “Naluqhalirmat,” uqaqhutik.

22Ilihaijit maliganik Jerusalemit tikihimajut uqaqtut, “Ilumiqtaujuq Tupilangmit, agiuktun atangujaat. Taffumanga hakugikninikpaktuq ilumiqqutaujunik piijaijaamini.”

23Jesusim qaitqujait kiuplugit imaa takuhiuripluni. “Qanuq Tupilak igittiniaqqa Tupilangmik?” apirijait. 24“Atan'nguvik aviktaujuq angujangnirmit ulruniaqtuq. 25Atjikkutaa, qitungariit inuuqatigiittiarungnaiktut pittiarungnaikhutik avitpallianiaqtut. 26Tupilaktauq avikkumi inminik akiniagluni, qanuq nangiqniaqqa? Annagunaittuq. 27Takuhiurijumiglanga ai. Kina hakugitqijauva itiriamini igluanut hakugiktup angutip ahiit kukiglugit piqutait. Hakugitqiaqpiaq kihimi—qiliqtuittaqtuq kukigvigilugulu iglua.

28“Uqautijagit itqumajunik, tamaita huinniqqiniit Godmun uqanigluutillu puiguqtauttaaqtuq, 29kihimi kinaliqaaq uqanigluutigigumiuk Anirnik Nakuujuk huinniqqutait puiguqtaujunaittuq. Hamna huinniqqutaujuq taimunga nungulaittumun pivikhaittuq.” 30Uqautijait imaa uqalirmata, “Agiuktitaungman.”

Jesus Ilalluangit

31Jesusim amaamaata aqqaluangitalu takujaqtuqtaa. Hilami nangiqtut unniutiquplugu uqaqatigiaktuquplutik. 32Inugiaktut ikhivajut Jesusmi, inuk uqallaktuq, “Amaamait aqqaluatillu hilamiittut utaqqijut ilingnik.”

33Jesus kiujait, “Kina amaamaga? Kitkut aqqaluatka?” 34Ikhivaqatini tautukhugit uqallaktuq, “Ii, ukua amaamatka aqqaluatkalu. 35Kinalikaak Pivaktuq Godim pitqujainnik aqqaluarijara nukaralu amaamagijaralu.”

Currently Selected:

Mark 3: AQ

Highlight

Copy

Compare