Mark 2

Jesusim Mamititaa Tumangajuq

1Aqaguaningurmat Jesus utirami Capernaumun, tuhainnaqtut angilrarnianik. 2Igluqpak najuqtaa pulaaqturiakhiqpiarami inikhaiqtuq, ukkuam hilataanilu. Godim uqauhianik unipkaktillugu, 3hitamat angutit qaijut tigumiaqtut angunmik tumangajumik. 4Jesusmungalimairamik inugiakpallarmat, iglum qilaa algakhugu nalaunnahuaqhugu Jesusim inia ataani angmaqtaat ahiit anmuktittugu angun nalajuq qaarmini. 5Ukpiruhungniat takuplugu, Jesus uqaqtuq angunmun pihulimaittumut, “Nutarara, huinniqutitit puiguqtaujut.”

6Ilangit ilihaijit maliganik ikhivajut tahamani ihumaliqtut inmingnut, 7“Qanuq una uqaliqqa? Godmun uqanigluktuq! God inmituaq huinniqqutaijaittaaqtuq!”

8Jesus tatjainnak ilihimalirami ihumanginnik, apirijait, “Huuq uummatiffingni apiqhuqqihiuk? 9Ajurnaitqijauvaa uqariami tumangajumut, ‘Huinniqutitit puiguqtauvut,’ imaaluuniit ‘Nangipagit, aalliniit pilugu pihulirit’? 10Ilihimaliriarni Inuum Irnia tunijauhimajuq huinniqutaijaittarnirmik nunami.” Jesus haattuq tumangajumut uqallakhuni, 11“Nangipagit, aalliniit pilugu, angilrauguit!”

12Angut makiinnaqtuq, tiguhakhugu aallinini, anijuq arliguhuktut akunngatigut. Arliguttakpiaqtut tamaita nanngarijaat God, uqaliqpiaqhutik, “Takunngaqhimanngittugut imaatut!”

Jesus Qaitqujaa Levi (Matthew)

13Jesus tahium hinaanungaungmiuq ilihailiqhuni inugiaktunik inminut qaijunik. 14Pihugaakhuni takujaa Levi irninga Alphaeus ikhivajuq taaksijautinik katitirivingmini. “Maliglunga maliktiginga,” Jesusip uqallakvigijaa. Levi makittuni maliktaa.

15Uvattiagunnuaq Leviam qaitqujaa Jesus malirutaillu niriqatigijangini amigaittut taaksijaijit huinniqitujullu. (Amihut inuit imaittun Jesus maliktigijain.) 16Kihimi ilihaijit maliganik Phariseengujut takugamitku niriqataujuq taaksijaijini huinniqitujunilu, apirijait malirutait, “Huuq niriqatigivagit taaksijaijit huinniqitujullu?”

17Tuharamiuk Jesusim uqallautijait, “Aannianngittut taaktiqariaqanngittut—aanniaqtuinnait. Qaihimajunga qaitqunngittugit huinniqijuittut, kihimi qaitqujatka huinniqivaktut.”

Uqauhiqaqtut Nirittailinirmik

18Atauhiaqhutik John malirutait Phariseetlu nirittailitillugit, inuit qaivaktut Jesusmun apiqhiplutik, “Huuq malirutitit nirittailijuitpat John malirutaitut Phariseetullu?”

19Jesus kiujait, “Katihiqhijuni inuit nirittailivakpat quviahuqatigitillugu nulianilihaak? Imannaq. Nirittaililimaittut nulianilihaaq iqatautillugu. 20Qakugu kihimi nulianiktuq qimaktitauniaqtuq inmingnit, talvanga nirittailiniaqtut.

21“Imaatut, kina ilaaqtuiniaqqa utuqqanik aannuraanik nutaamik kaliqurmik? Nutaaq kalikuq mikhiniaqtuq hukatitlugu utuqqaq, angitqiamik aliqaaqluni.

22“Inuglu nutaamik vainimik puuqhijunaittuq utuqqamut vainiqarvingmut amirmut. Vainiup qaaqtiniaraa amiq vainiqarvik. Tamarmik vain puurlu hunngirniaqtuk. Nutaaq vain puuqaqtukhaq nutaamik amirmik.”

Uqauhiqaqtut Sabbathmik

23Sabbathngutillugu Jesus pihuktillugu nauttivingmi, malirutait navjuiliqtut nuvuinnik nauninit nirijumaplugit. 24Phariseet uqallaktut Jesusmun, “Ukua ii, huuq maliganik ahiruiliqqat katitiriliqhutik nauniinik Sabbathmi?”

25Jesus uqallautijait, “Taiguqhimangillahi Uqauhiinni David hulitjutaanik ilanilu kaaliramiik? 26Itiqpaktut Godim igluanut (Abiathar hivulliuqtiutillugu minihittanut) ahiruipluni maligamik nirigamikkit qingautjauhimajut muqpaujat minihitaqpainnait niqikhautainnik. Tunivagaillu ilannani.”

27Jesus uqautingmijait, “Sabbath tunijauhimajuq inuit pitjutigiplugit, inuit pitjutigijauhimanngittut Sabbathmut. 28Talvanga Inuum Irnia Ataniujuq, Sabbathngugaluaqtillugu.”

Currently Selected:

Mark 2: AQ

Highlight

Copy

Compare