Mark 1

John Baptaiqti

1Hamna Tuharnaarnaqtuq Jesus Christngujuq, Godim Irninga. Aullarutijuq imaatut 2nalauttaijip Isaiap titiraqhimajaatut:

“Ilitturigin, aullaqtinniaqtara tuhaqtittijiga hivunnirlutin,

upalungaijautiniaraatit.

3Tuqhulauqtuq maniqqami,

‘Upalungajarlugu apqutikhaa Ataniq qailirmat!

Apqutikhaliurlugu!’”

4John Baptaiqtiujuq maniqqamiittuq unipkaaqpaktuq inuinnguuq baptaiqtaujukhaujut ihumagijaujungnaiquplugit huinniqutimingnik Godmun haallutik. 5Tamaita Judeamiut Jerusalemiullu takujaqtuqtaat tuhaajumaplugu John. Uqaqtillugit huinniqutimingnik John baptaiqtait Jordan Kuugaani. 6Aannuraangit nuviqhaqhimajut tulrujunik camel mitquinnit, taffiqaqhunilu amirmik. Niqiqaqhuni qupilrunik hanimiglu.

7John tuhaqtittiuq: “Inuk qaijuqiliqtuq uvamnit hakugitqiaq—uvamnit hakugitqijauqpiarami uvanga ukuvigingittakhara hingiijaqtakhariingitaraluuniit. 8Baptaiqqaffi imarmut, baptaiqniaraahi Anirnikkut Nakuujukkut!”

Baptaiqtaunia Uuktuqtaunialu Jesus

9Talvunalu Jesus qaijuq Nazarethmit Galileemi, John baptaiqtaa Jordan Kuugaani. 10Jesus puilirami imarmit, takujaa qilak angmaqtiqtuq Anirnirlu Nakuujuq millalauqtuq qupanuatut inminut. 11Nipi qilangmit uqallaktuq, “Irnirijagit piqpagijauqpiaqtutit, quviattautivaktangma.”

12Ahiit Anirniup Nakuujup akhurutigijaa Jesus maniqqamuuquplugu. 13Talvani uktuqtaujuq Tupilangmit 40ni upluni. Ittuq nirjutini. Iharulgit munaqtigiplugit.

14Qakunngungurmat, John tigujaunianit, Jesus Galileemungaujuq, uqautjipluni Godim Tuharnarnarutainnik. 15Tuhaqtittiuq, “Tikitainnaqquq Godim uqariijautaa! Godim Atan'nguvia qaglijuq! Huinniqqutaijaritti ukpirilugilugit Tuharnaarnaqtut!”

Jesus Tiliurijuq Hivullinik Malirutinik

16Jesus pihuktilluni hiniraqhugu Tahiq Galilee, takujaa Simon aniqataalu Andrew kuvjiqhijuk iqalukhiuqtiugamik inuuhiriplugu. 17Jesusim tuqhulajaik, “Qaiguittik, malinga, takuhiurniaqtaptik katitirinirmik inungnik!” 18Kuvjatik ikhinnainnaqhugit maliktaat.

19Ungahivjaktumi hinaani Jesus takujaik Zebedium irniik, James, Johnlu qajarmi kuvjamingnik hanaqijuk. 20Tuqhulajaukallakkamik, maliktaallu, qimakhugu apaapaktik, Zebedee havaktinilu qajarmi.

Jesus Piijaijuq Agiuktumik

21Jesus ilagijanilu igluqarnirmut Capernaumunngaujut. Sabbathngurmat, angaatjuvingmut itiqhuni uqautjiliqtuq. 22Inuit arliguttaktut uqautjitjutainnik, ilihautjingmat ilihimaqpiaqtutut—ilihautjiutuinnaunngitutut maliganik.

23Tatjainnaq angut agiuktuq tuqhulauliqtuq, 24“Huuq inaviqqutauliqqit uvaptingnut, Jesus Nazarethmiut? Huunngijariaqtuqqitiguut? Kinaujakharnik ilihimajunga—pilluaqhimangmatit Godim.” 25Jesus nipaiqtitaa “Nipairit! Aniguit angunmit,” tuqhurlauqtuq. 26Hatjainnaq, agiun irialajuq, angut qiiqiqtittugu, talvanga angunmit anijuq.

27Arliguttakpiaqtut naalaktut, uqamalaqiplutik takujamingnik. “Hamna hunauva nutaaq ilihautjaujuq?” apiqhuiliqpiaqtut aliattakhutik. “Ataniuqpiaqtuq! Agiutulluuniit naalaliqtaat!” 28Qilamik tuharnarnarijauliqtuq Jesus talvani Galileem nunainni.

Jesus Aanniarutaiqtait Inuit

29Jesus angaatjuvingmit aniqatigijaik James Johnlu, Simon Andruplu igluanunngaujut. 30Simon hakinga nalajuq iglirmini kitjaumakpiaqhuni. Jesus uqallautiinnaqtaat. 31Iglianungakhuni, algaa tiguplugu ikajuqtaa ingitiqtuq. Kitjaumahuinnginnaqtuq, niqiliurutiliqtait.

32Hiqiniq nipinmat, amihut aanniaqtut agiukturlu qaritjauvaktut Jesusmun. 33Nunaqatigiit katittut qun'ngiaqtut. 34Jesus aanniarutaijaijuq amihunik inungnik aallatqiinik aanniarutilingnik, agiutunillu piijaipluni, ilihimagamigillu kinaujakhaa, nipliqtinngittait.

Jesus Uqautjijuq Galileemi

35Aqagunngurmat qautinnagu, Jesus makittuq inuilrumut qin'ngariaqtuqhuni. 36Uvattiagungurmat Simon ilaitalu qiniqtaat. 37Nanigamitku, uqaqtut, “Inuit ivaqhiajut ilingnik.”

38Jesus kiujait, “Aallanullu nunanungaujariaqaqtugut, uqautjiniaramalu. Qaitjutigihimajara.” 39Talvanga aullaqtuq Galileemi, uqautjipluni angaatjuvingni agiuktunlu piijaqhugit.

Jesusium Mamitittaa Angun Kilaarutilik

40Angun kilaarutilik qaijuq hitquqhuni Jesus haanganut, mamititaujumajuq. “Pijumaguvit, mamittitlunga halummaqtitlungalu,” uqaqhuni.

41Jesus nagligutakkami, ihakvigiplugu kahaktaa. “Pijumajunga,” uqaqtuq. “Mamittit!” 42Tatjainnak kilaangiqtuq mamittuni. 43Jesus ahivaqugamiuk uqautiqpiaqtaa: 44“Uqarittaililugu hamna. Kihimi, minihitamungauguit ihivriurumaraatit. Naghaglutit aittutikharnik Mosesip pitqujaatitut tapkununga mamitauhimajunut kilaarutimingnit. Hamna ilihimatjutauniaqquq halummaqtitaunirnik.”

45Kihimi angutip uqautigiliraa inungnut hatjannuaq atuqtani. Talvangaanit, amigaitpiaqtut inuit avalujaat Jesus itinalimaiqhuni igluqarninut. Inuilrumi maniqqamiunnginaghuni, inuit qaihimaaqtut huli.

Currently Selected:

Mark 1: AQ

Highlight

Copy

Compare