Mark 11

Jesus Tikinnia Aliagijaujuk

1Jesus malirutinilu tikiliramik Jerusalemun, apquhaaqtaik igluqarviik Bethphage Bethanylu Kingingniup Olives haniani. Malruk malirutini aullarnariqujaik hivuniqhiulutik. 2“Taikungauguitti igluqarvingmut,” tilijait. “Itiruffi, takuniaqtuhi qinmiqpaktutut-ittum nangmaktim nurraa ipiqhimajumik atuqtaujuittumik. Ipiirlugu qarritihiuk. 3Apirijauguffi, ‘Huliqqihi?’ uqarluhi, ‘Atan'ngum pijumajaa qilamik utiqtinniaraalu.’”

4Malruk malirutik aullaqtuk naniplugu nurraa apqunmi ipiqhimajuq ukkuam hilataani. 5Ipiijaitillugik tautuktut apiqhiut, “Huliqqitik, ipiijaqhugu tamna?” 6Jesusim uqauhiriqujait atuqhugit angiqtaujuk pijaak qinmiqpak. 7Nurraq Jesusmun aggitijaat annuraamingnik ulikhugu, Jesusim ingilvigijaa.

8Amihut inuit aanuraamingnik ihivitirijut apqutikhaanut, ilangittauq napaaqtut kihiktuutainnik kipluqhimajamingnik ihivitiriplutik. 9Jesus qitqani ingilrajuq, inuit avaluutiut tuhurlauqhutik,

God qujagijauli!

Qujagijauli tamna qaijuq Atan'ngum atiagut!

10Qujagijauli tikilirmat Atan'nguvia angutipta Davidim!

Qujagijauli God kingitqijaujumi!

11Talvanga Jesus Jerusalemungaqtuq itiqtuq angaatjuvikpagjuamun. Qinittiaqqaqhuni avatiminut unnuktilirmat aullarmijuq. 12lu malirutinik utiqqatigijait Bethanymut.

Jesusim Hummaraarinngittaa Ahiaqaqtukhaq Fig Napaaqtuq

12Uplaami aullaliramik Bethanymit, Jesus kaaliqtuq. 13Takujaa fig napaaqtuq nauqpiaqhimajuq qanilrumi, upaktaa ahiaqturumapluni. Kihimi ahiangit naunngittut huli ahianiknakhiinnginmat. 14Jesus uqallaktuq napaaqtumut, “Nirijauvagunaittutit!” Malirutaita tuhaajaat.

Jesusim Inuiqtitaa Angaatjuvikpagjuaq

15Utiramik Jerusalemun, Jesus itiqtuq angaatjuvikpagjuamun aniquliqpiaqhugit inuit niuvvaajuit nirjutinik. Ikpatait ikhivautaillu maniliqqijiit puhitittugit tapkuallu qupanuanik niuvrutiqaqtut, 16nutqaqtittugit inuit humigliqaaq tigumiaktut angaatjuvikpagjuakkuuqtut. 17Uqautijait, “Titiraqhimajut, ‘Godim iglua qingarviginiaraat nunarjuarmiut’ iliffi kukikvinguqtitaqhi.” 18Hivulliuqtiit minihitaqpait ilihaijillu maliganik tuhaagamikku, ihumakhakhiuliqtut qanuq tuquttumaplugu. Kihimi iqhigijaat, inuit arlirikpiarmatjuk ilihautjiinnik.

19Unnungmat Jesus malirutinilu aullaqtut.

20Aqagungurmat apquhaaqtaat fig napaaqtuq Jesusim huniaqpagaa, takujaat paniqpiaqtuq. 21Peterm itqaumagamigit Jesus nipliutait napaaqtumut ippakhautillugu nipliquta, “Una ii, Ilihaijii, fig napaaqtuq hummaraarinngittat paniqpiaqtuq tuquplunilu!” 22Jesus uqallaktuq malirutiminut, “Ukpirilugu God. 23Ilumuuqtumik uqautigiffi, nipliqtaqtuhi umunga kingingnirmut, ‘Kiviktauniaqqutit igitaulutillu tarijumut,’ taimainniaqtuq. Kihimi ukpiruhukpiariaqaqtutit taimainniarnianik nalunngitpiarlutin uummatingni. 24Uqautigiffi, humigliqaak tukhirluhi qin'ngaktaaqtuhi, ukpiruhukkuvit tunijaujuq, piginiarait. 25Kihimi qin'ngaliruvit, hivullirmik ihumagijungnairvigilugit kinaliqaak mamiahuutigivagat, taimaa Angutikpit qilangmi huinniqutairniaraatillu.”#11:25 Ingilraarnittat ilangit titiraqhimajut imaatut 26 “Kihimi itqaumaguhugumanngitkuvit, Angutit qilangmi itqaumagihuirunaitait huinniqutihi.”

Jesusim Hakugiknia Apiqhuqtaujuq

27Jerusalemkuurmijut. Jesus pihuktillugu angaatjuvikpagjuakkut, hivulliuqtiit minihitaqpait, ilihaijillu maliganik, inutuqaillu upautijut. 28Ilihimajumajut, “Qanuq hakugiknikkut imaatun pivakpit? Kia pitquvatit?”

29“Unniutiniaqtaffi kiugungni apiqhuutiga,” Jesusim kuijait. 30“John baptaiqtirittaarnia qilangmit qaihimavaa, uvvaluuniit inungnit? Kiunga!”

31Uqarilraaqhugu, “Uqarupta qilangmit pijuq, apiqhiniaqtuq huuq ukpirinngitpitigu John. 32Uqarniaqqitaluuniit inungnit pingmangaat?” Iqhiuliramik qanuriliurniariakhaita inuit, tamarmik ukpirigamikku John nalauttaijiujuq. 33Kiutainnaqqut, “Nalujugut.”

Jesusim kiujait, “Uqautiunaittaffi qanuq hakugiknikkut pivagiakhamnik.”

Currently Selected:

Mark 11: AQ

Highlight

Copy

Compare