LKK 4
4
Tɔntɔraa lɛ n boo diɛ
1N tá siĩn dɛ,
maa paa ǹ wɔ,
n tá siĩn dɛ!
N mɔnaa ke n yɔrɔ lɛ,
n yii nànan gamaa á kɔɔ̃n bɛ nɛ,
maǹ siĩni ka
zɛrɛkantoanan bɛ́ lɔn.
N mìi ka n tì kɔnɔnɔ,
ka bòe tìtì kuru n gisĩ
Galaati tenten la.
2N sɔn man fufu ka wɔba,
ka maǹ nə́ sèren ka kukuru sisia,
ǹ nə́ wusoo ǹ nə́ ǹ pii.
Ǹ nə́ kɔn yɛ tɛmɛtɛmɛ,
màn sã ǹ miã-a wa.
3N lɛ n tã ka gɛ̀sɛ tã bɛ́ lɔn,
á siĩn taãn-taãnɛ, n lon!
N mɔnaa ke n yɔrɔ lɛ,
n yɔrɔ á siĩni bɛ kio taãn-taãnɛ,
ka grenadie da nɛ lɛkara nɛ.
4N wìi n siĩni ka Davida a
sanabolo kɛ bɛ́ lɔn.
N bɔlɔ-a ǹ gii kɛn man a ganaa
ka góoro gigiã bɛ́ lɔn.
N bɔlɔ-a ǹ gii n zɔɔzaa,
n bɔlɔ ganaa,
ka zia-baali zanbian ǹ góoro ne.
5N nyɔ màn paa ke,
bɛn man ka yuùn nɛ màn paa nɛ,
ǹ dan nə́ ǹ yɛ bɛlɛmanan lɛa,
maǹ buu soɛ̃ da buũ bǎã nɛ.
6Wɔlɔ laan bɛ̀ a n fúli,
mà lɛ̀ n woe wɛɛ,
man die woe n
*miíri nyɔɔ gìĩ kɔɔ̃n kelen kɛn la.
7Maa paa ǹ wɔ, n siĩnbaa lɛ pã.
Haalɛ wɔ̀lɔ̀ boɛɛnɛ, a ba n-a wa.
8Da kiɛ̃, maa paa ǹ wɔ,
n bɔ Liban kelen kɛn li,
n da kun ma nɛ.
Gisĩ n nə n bɔ
Amanaa kele kɛ baã bii,
n bɔ Seniiri kele kɛ laanka
Ɛrmɔn kele kɛ baã bii.
Bɛa bǎã kɛ lɛ,
yàran giã ǹ bǎã nɛ,
bɛa kele yii kɛ lɛ,
gòen bǎã nɛ.
9Miãnɛn, maa nɛniɛ,
n sii n ka a gàã yoo ma li.
N ga ma-a gunyin goon din ni,
a n ka a gàã yoo ma li.
N nyaǹ mànan kɛn n bɔlɔ-a,
bɛn goon dinsɔɔ̃ n
ka a gàã yoo ma li.
10Miãnɛn, maa nɛniɛ,
n kɔn-narɛɛ á kɔɔ̃nɛ á la yii ni,
n sɔɔ min ni á kɔɔ̃nɛ á la duvɛ̃ nɛ.
N nyɔɔ gìĩ á kɔɔ̃nɛ,
á la nyɔɔ gìĩ kɔɔ̃n tumaa nɛ.
11Ee, maa nɛniɛ,
n lɛ kìrin man paparɛ.
N sɔɔ min ni n nɔnɔɔ
ka bɔ̀nyaa bɛ́ lɔn,
a n paparɛ ka zoo bɛ́ lɔn.
N wɔ ǹ mɔnaan gìĩ n kɔɔ̃nɛ,
ka Liban a da yon gìĩ kɔɔ̃n bɛ́ lɔn.
12Miãnɛn, maa nɛniɛ,
ma n dù gɔrɔ lɛa, a lɛ n tiɛ̃-n.
Ma n mu yala lɛa, a lɛ n tiɛ̃-n.
Ma n tù lɛa,
koa nɛ ma dinsɔɔ̃ wɔ lɛa.
13Ma n dù gɔrɔ sonbore lɛa,
piɛ̃-n ka grenadie da nɛ,
ka da nɛ kɔɔ̃n kɔɔ̃n nɛ.
Gɛ̀-bi da tan, naare da nɛ,
14safrɔn da laanka kanɛli da nɛ,
da nɛ, ka da gìĩ kɔɔ̃n
tɔrɔ tumaa nɛ.
Dagòã gìĩ kɔɔ̃n laanka
aloɛsi da dɔ tan,
ka dan mɛnɛn gìĩ bɛ́ kɔɔ̃nɛ a tɔ-a.
15Dù gɔrɔ lɛ a mu yala tan,
a tù a mu zii tá n toɛ Liban,
baa sii die.
16Haya koɛ!
Gɔsɛ a lɛ̀gɔn la a piɛ̃,
gusin a lɛ̀gɔn la a piɛ̃,
ka yoo!
Ka bɔ maa dù gɔrɔ kɛ nɛ,
ka a da gìĩ kɔɔ̃nɔn kɛn
gìĩ da bɔ-a.
Ma din foo dùũ wɔ kɛ die
a da a dù gɔrɔ lɛ nɛ,
a na a da nɛ kɔɔ̃n kɔɔ̃nɔn kɛn bii.
Currently Selected:
LKK 4: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
