LKK 3
3
Man giɛ ma din foo dùũ wɔ lɛ li
Nɛlɔ lɛ n boo diɛ
1Min mɛn lɛ sii bɛ́
kɔɔ̃n ma ganaa,
bɛ̀ ma á tán maa pii la tèlò-n,
ma nə n gɔn talɛɛ bɛ li,
ma nə n gɔn talɛɛ li,
sɛnɛ a wɔlɔ banban.
2Man die yui kanna,
ma kiwi lɛ kɔkɔn,
ma kɔkɔ ziin lɛ,
ma bɔbɔ bǎãn nɛ,
min mɛn lɛ bɛ́ kɔɔ̃n ma ganaa,
ma ga bɛ li.
Má ga li,
sɛnɛ man na a-n wa.
3Kiwi a bǎã-lɛduə̃lin man ke,
má kaa ǹ lɛ,
má nɔ̀n da bɛn la kɛnɛn:
«Min mɛn lɛ bɛ́ kɔɔ̃n ma-a,
ka n na bɛ-n wa?»
4Ma din bɛ́ má
ǹ na boɛɛn lɔn gɔrɔ,
min mɛn lɛ bɛ́ kɔɔ̃n ma-a,
bɛ̀ bɛ á ke má kaa lɛ.
Má kũ, ma a n gɔn boe-a doo wa,
yǎa ma woo we ne ma dan a kion,
maa yɛ ǹ dan a waa ǹ kion.#3.4 Min tɛn nə taasɛ mà nɛlɔ lɛ n tɔn boo diɛ.
Tɔntɔraa lɛ n boo diɛ
5Zeruzalɛmu nɛnɛn lɛn,
ma gɛlɛɛ ka nɛ!
Ma n ka nyankoe ka don woreen
laanka don a yuùnun tɔ nɛ.
Ka baran bũ wa,
ka baran ma din foo dùũ
wɔ lɛ yii kaa,
bɛ̀ a ná a tɔn dɔ a din wɔ lɛ-a wa.
Loe sɔɔbaa ǹ wɔ
(3.6–5.1)
Nɛniɛ lɛ n boo diɛ
6Die n ke á soo diə gole li die,
gusuũ yui ka tɛmaa bara bɛ́ lɔn?
A gìĩ tumaa n
*miíri nyɔɔ gìĩ kɔɔ̃n lɛa,
da yon gìĩ kɔɔ̃n lɛa,
ka pii-kɔlen bɛ́ die
ka màn gìĩ kɔɔ̃n tɔrɔ mɛn tumaa nɛ.
7Salomɔn gũ ǹ màn lɛ á ke.
Giĩn mɛnɛn bɛ́ doa boe,
Izirayeli a zia nɛ doa-bɔlen bii,
bɛn min pɔsɔrɔ na á da bii.
8Gɔya sa nə ǹ tumaa ganaa.
Ǹ tá zia biɛ doɛ̃ a tɔ-a.
Didie a gɔya sa na a gisi ganaa.
Bɛ̀ sii kaka daa tèlò-n,
ǹ yɔ bɔ a ganaa.
9Kii Salomɔn lɛ
min gũ ǹ yoroon zɛnaa,
a dinsɔɔ̃ wɔ lɛa,
Liban gɔn na a lɛa.
10Á ná a gòãn zɛnaa ka wɔrɔ nɛ,
á ná a tiləə ǹ bǎã zɛnaa
ka sana nɛ,
á ná a giã ǹ bǎã zɛnaa
ka mɔnaa sonbore ne.
A gɔ́ɔ̃ ke,
Zeruzalɛmu nɛlɔn man nə́ bɛ zɛnaa
ka kɔn-narɛɛ nɛ.
11 *Siɔn nɛlɔn lɛn,
ka da soo ka ga!
Ka ga kii Salomɔn ganaa,
a ná a kɔn wɔ ǹ bafolo wɔ.
Ǹ dan nə bafolo mɛn lɛ kɔ la
a kɔn-wɔ pinaa,
a foo kɔɔ̃nbaa gole pinaa.
Currently Selected:
LKK 3: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
