Loe 147
147
Min mɛnɛn sii bɛ́ kiɛ Lawa foo la
1Aleluya, ka Dɛnaa Lawa tɔ bɔ!
Wɔ wɔa Lawa tɔ bɔ ka loe ne, bɛ lɛ n siĩni.
Wɔ a tɔ bɔ ǹ loe lɔ sɔnbɔraanɛ, bɛ lɛ n kɔɔ̃nɛ.
2Dɛnaa Lawa n wusii Zeruzalɛmu doe.
A n Izirayeli nɛnyaanan boe bɛ̀rɛbaa nɛ, ǹ soekɔn.
3Min mɛnɛn foo bɛ́ busii ni, a din nə bɛn foo-busii nyɛɛ,
a din nə foo-basiɛ̃ koe ǹ la.
4A din nə leeren nimii,
a tɔ kɔ ǹ gogoonmaa ganaa.
5Wɔa Dɛnaa lɛ á gole, Pàãyiidɛnaa nɛ.
A sii-doɛ̃ kɛ lɛ dan banban.
6Dɛnaa Lawa nə n doe nɔmaa-wɔlen lɛ, á nə́ ǹ siɛ ǹ diɛ lon.
Min baraan kɛn, a n bɛn gisĩ yǎa tán.
7Ka loe lɔ ka barka da Dɛnaa Lawa nɛ.
Ka loe lɔ ka tùtu da li, ka wɔa Lawa tɔ bɔ nɛ.
8A din nə labaran koe lon lɛ.
A din nə la mu zɛnɛɛ tán wɔ lɛa,
a din nə buu diɛ bɔ ganaa kelen la.
9A n màn-bii koe tɔɔn kɛn la,
a n koe zankoo nɛn kɛn dɔn la, n lɛ dii li.
10Sùi pàã bie a foo kɔɔ̃n koe wa,
gòã kaka-a a sii zɛnaa bie kiɛ a foo la wa.
11Sɛnɛ, min mɛnɛn bɛ́ nyɛ́ɛ biɛ Dɛnaa Lawa nɛ,
min mɛnɛn bɛ́ n foo doɛ a kɔn-narɛɛ gole kɛ ganaa,
bɛn lɛn sii n kɔɔ̃n a ganaa.
12Zeruzalɛmu minin, ka Dɛnaa Lawa gugurukɔ,
*Siɔn minin, ka loe lɔ ka Lawa tɔ bɔ nɛ.
13A giala, kaa kiɛnlɛ-aǹ goon kɛn, a din na á ǹ fɔlɔ bàlàn baa kaka.
A din na á barka da kaa nɛnyaanan ganaa kaa kiwi lɛ gɔ́ɔ̃ nɛ.
14A din nə là nyantoro koe kaa gána la.
A din nə ka toe ka tán-kɔsiɛ màn tumaa a sonbore ne.
15A na a dí-pɛn diɛ kanaa minin la,
a boo lɛ n woe ka baa nɛ, a gòã yii n fuu.
16A din nə *mu nyuù-wɔle fu kiɛ, ka koara nɛ,
a din nə burumu pɛsɛ̃ ka ton bɛ́ lɔn,
17a n la gii kiɛ ka kɔlɔ bɛ́ lɔn.
A bɛ́ nyan mɛn boe, die n boe la a si a ganaa?
18Sɛnɛ, bɛ̀ Dɛnaa Lawa boo da, kɛ tumaa n yoe.
Bɛ̀ á piɛ̃ bɔ, a tumaa n mu biɛ.
19A din na a boo nyɛɛ Zakɔba tɔrɔn manɛ.
A na a landan laanka a dí-pɛn koe Izirayeli minin la.
20A kɛ miã zɛnaa tɔrɔ kɔsɔ kɔn nɛ wa,
Tɔrɔn mɛnɛn bɛ́ ǹ ba a dí-pɛn doɛ̃ wa.
Aleluya, ka Dɛnaa Lawa tɔ bɔ!
Currently Selected:
Loe 147: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
